ޕްރޮގްރެސިވް ޕާޓި އޮފް މޯލްޑީވްސް (ޕީޕީއެމް)އަށް އެއްވެސް ދިރުމެއް ދޭން މިހާރުގެ ރައީސް ޑރ. މުހައްމަދު މުއިއްޒު ބޭނުންފުޅު ނުވާކަން ހާމަވަމުންދާ ކަމަށް، އެ ޕާޓީގެ ކުރީގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ފަރާތުން ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ކެންޑިޑޭޓުންގެ ސިޔާސަތުތައް ހާމަކުރުމަށް ބާއްވާ ޖަލްސާތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ޔާމީން ވަނީ މިފަހަރުގެ މަޖިލީހަށް ޕީޕީއެމްގެ ނަމުގައި މެމްބަރުކަމަށް ވާދަކުރަން ރައީސް މުއިއްޒު ފުރުސަތު ނުދެއްވިކަން ފާހަގަކުރައްވާފައެވެ.

އެގޮތުން މިހާރުވެސް ޕީޕީއެމްގެ ދަފްތަރުގައި ތިއްބެވި މަޖިލީހުގެ ދެ މެމްބަރުން ކަމަށްވާ އަހުމަދު ސަލީމުއާ އަހުމަދު ތޯރިގުއަށް މަޖްބުރު ކުރުވައިގެން ޕީއެންސީ ނަމުގައި މި ފަހަރު މަޖިލީހަށް ވާދަކުރުވާ ކުރުވުމުން ފެނިގެން ދަނީ ޕީޕިއެމް ފަސްއަޅާ ވަޅުލަން ސަރުކާރުން ކުރާ މަސައްކަތް ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ މިއި ޕީޕިއެމްގެ އާންމު މެމްބަރުން ވިސްނަން ޖެހޭ ކަމެއް ކަމަށާ އަދި އެ މެމްބަރުންނަށް އެނގުން މުހިއްމު ކަމެއް ވެސް ކަމަށެވެ.

ރައީސް ޔާމީން ވަނީ މީގެ ކުރިންވެސް، ޕީޕީއެމްގެ ދެ ނައިބުން ކަމަށްވާ އހަުމަދު ޝިޔާމް އާ ޣައްސާން މައުމޫނު އެ ޕާޓީއާ މެދު އަޅާނުލާތީ ކަންބޮޑުވުން ފާޅުކުރައްވާފައެވެ.