"ސިޓީ އޮފް ހޯޕް" އަކީ ރައީސް އަބްދުﷲ ޔާމީންގެ ދުރު ވިސްނުންފުޅުގެ ތަސައްވުރީ ފާލަމެކެވެ. އެގޮތުން ބޯހިޔާ ވަހިކަމަށް ހައްލު ގެނައުމަށް އެ ސިޓީގައި ބޯހިޔާ ވަހިކަމުގެ ގިނަ މަޝްރޫއުތަކެއް ފައްޓަވަން އެމަނިކުފާނު ވިސާނަވާ ޕްލޭންވެސް ކުރެއްވިއެވެ. ނަމަވެސް ބަޔަކު ފޭރިގަތް ވެރިކަމަކުން ދިވެހި ތަހުތު ޖަހައިގަނެ 2018 އިން 2023 އަށް ކުރި ޚުދުމުހުތާރު ވެރިކަމުގެ ތެރެއިން އެ ތަނުގެ ޒިންދާގީ ދުއްވާލާ ތަން ވަނީ ހަފުސްކޮށްފައެވެ.

އެމްޑީޕީއިން 2018 ގެ ވެރިކަމަށް އައުމަށް ދެއްކި އެންމެ ބޮޑު އެއް ދަޅަ އަކީ ބޯހިޔާ ވަހި ކަމެވެ. ނަމަވެސް ވެރިކަމަށް އައި ގޮތަށް އައިސް ހިޔާ ޓަވަރުތަކުން ކުރީ ވަކަމެވެ. ހިޔާ ފްލެޓުތަކުން ބައެއް ވުޖޫދުން ގެއްލުވާލާ ރައްޔިތުންނަށް އޮޅުވާލިއެވެ. އެ ފްލެޓުތައް ދިޔައީ ބިމު އަޑިއަށް ކަމެއް ނުނީ މައްޗަށް ކަމެއް އެނގޭކަށް ނެތެވެ. އަލަތު ކައިވެނީގައި އަމިއްލަ ބޯހިޔާވަހިކަމުގެ އުއްމީދުގައި ތިބި އެތައް ޒުވާނުންގެ އެ އުއްމީދު ފެނަށް ދުއްވާލި ބަޔަކީ އެމްޑީޕީއެވެ.

ފްލެޓާ ގޯތި ފަސް އަހަރު ދުވަހުގެ ތެރޭގައި ދީ ރައްޔިތުންނަށް ބޯހިޔާވަހިކަމުގެ ހައްލު ގެނެސްދޭނެ ކަމަށް ބުނެ އެކަން ފަސް އަހަރުގެ ދައުރު ނިމެން ގާތްވިއިރުވެސް ނުވެ އޮތުމުން އަނެއްކާވެސް ކުރި ވައްކަމެވެ.

ސަރުކާރުން މާލެ ރައްޔިތުންނަށްވީ ބޯހިޔާވަހިކަމުގެ ވައުދު ފުއްދުމަށް ކުރު މަގަކުން ގޮސް ހުޅުމާލެ ގުރުބާން ކޮށްގެން އެ އެދުން ފުއްދޭނެ މަގެއް ހޯދިއެވެ. ހުޅުމާލެ ދެވަނަ ފިޔަވަހިން ގޯތި ކެނޑުމެވެ. އެ ނޫން އެއްވެސް ގޮތެއް މުރަނގަ ގަސްދޮށު މާލިމީއިން ތިބި އެމްޑީޕީ ސަރުކާރަށް ނޭނގުނެވެ.

ހުޅުމާލެ މަޝްރޫއު ދެކޮޅު ޖައްސަން ހެދި ކްރޫޒްލައިން ޓާމިނަލް އާއި ކްރޫޒްލައިން ހޮޓާތައް ހުންނަ ސަރަހައްދު ހިއްކައި ގޯތި ދޭން ނިންމާލާ އެވަރުން އަދި ފުއްދާލީއެއް ނޫނެވެ.

ސަރުކާރު އޮފީސްތައް ބަދަލުކޮށް ބިޒްނަސް ޑިސްޓްރިކްޓްތަކާއި އައިޓީ ޕާކްތަކާއި ނޮލެޖް ޕާކުތައް ހަދަން އޮތް ވިޔަފާރީގެ ސަރަހައްދުން ހިލޭ ގޯތިދޭން ނިންމުމުގެ ނަތީޖާއަކަށް ވެގެން ދިޔައީ ސިންގަޕޫރުން ޕްރޮފެސަރުން ގެނެސްގެން އެތައް މިލިއަން ރުފިޔާއެއް ހަރަދު ކޮށްގެން ހެދި ވަރުގަދަ މާސްޓަ ޕްލޭން އެފުށް މިފުށަށް ޖެހިގެން ދިއުމެވެ.  ހުޅުމާލޭގެ މުޅި ޕްލޭން ގޯސްވެ، މުޅި ރަށް މުސްތަބަލު ގެއްލިގެން ދިޔައެވެ.

ތިމާމެންގެ ނާގާބިލުކަމުން ވައުދު ފުއްދަން ނޭނގުމުން އެހެން ބޭފުޅެއްގެ ހިޔާލާތާ ވިސްނުމުން ގެނެސްފައި އޮތް ބިޔަ ޕްރޮޖެކެޓެއް ކުޑަ ކުޑަ ހިނދުކޮޅެއްގެ ތެރޭގައި ޒަލްޒަލާއަކުން ފުނޑު ފުނޑުކޮށްލިއެވެ. މިހެން ދެނެނެވުމުން ބައެއް ބޭފުޅުން ހިތްހަމަ ވެސް ނުޖެހިދާނެއެވެ. އެއީ އެ ސަރަހައްދުން ބިމާ ގޯތި ލިބުނު މީހުންގެ ހައްގަށް އުނިކަން އައިސްފާނެ ކަމަށް ބުނެއެވެ. ނަމަވެސް މީގައި އެއްވެސް ހާލެއްގައި ގޯތި ދިނުމާ ދެކޮޅު ހަދަނީ އެއް ނޫނެވެ. ގޯތި ދީފައި ހުރި ގޮތާ އުސޫލުގެ ސަބަބުން މުޅި އެތި ހަރާބުގެ މަގަށް ހުށަހެޅިގެން ދިއުމަކީ އަޅުގަޑު ހިތުން ކޮންމެ މީހަކުވެސް ކަންބޮޑުވެ އަދި އިބްރަތްވެސް ހާސިލްކުރަން ޖެހޭނެ ކަމެކެވެ.

ހުޅުމާލެއަކީ ބިމުގެ އަގު މަތި ހައި އެންޑް ރިއަލް އެސްޓޭޓް ބިމަކަށްވާއިރު އެ ބިން ސިޔާސީ ގޮތުން މަންފާ ހޯދުމަށް ބޭނުންކޮށް ބިމުގެ އަގު ވައްޓާލީއެވެ. އަވާމެންދުރެއްގެ ތެރެއިން ރައްޔިތުންގެ ލޮލުގައި އެޅުވި އަނދުނަކީ މާލެ ރައްޔިތުންގެ ބޯހިޔާވަހި ކަމަށް ވެވަޑައިގެންނެވި ވައުދު ފުއްދުމެވެ.

ނަމަވެސް ހަގީގަތަކީ ކޮބައިތޯއެވެ؟ އެންމެ ފުރަތމަ 1000 ގޯތީގެ ވައުދުވެ ފަހުން 800 އަށް ކުޑަ ކުރީމަވެސް 1000 އަށް ގޯތި އަދަދު ހަމަކުރަން ސަރުކާރުން މަޖްބޫރުވީއެވެ. އަދަދު ކުޑަކޮށް ހިންގީވެސް ޖަރީމާއެކެވެ. ނަތިޖާއަކަށް ވެގެން ދިޔައީ، ގޯތިތައް ގޮސްފައި ހުރީ ފެނާ ނަރުދަމާ އަދި ކަރަންޓު ވިއުގަތައް ވެސް މަތިންނެވެ.

ބައެެއް ގޯތިތައް ހުރީ މަގަށް އަރާފައެވެ. އެވަރުން ނިމުނީއެއް ނޫނެވެ. ހުޅުމާލޭގައި މަސައްކަތް ކުރާ ބޮޑެތި ކޮންޓްރެކްޓަރުންގެ މަސައްކަތު ސައިޓް ތަކުން ވެސް ގޯތި ދީފައިވެއެވެ. އެ މީހުންގެ މުވައްޒަފުން ބައިތިއްބާ ލޭބަކުއާޓަރުގެ ގޯތި ތެރޭން ވެސް ގޯތި ކަނޑާފައިވެއެވެ. މި މީހުންނަކީ ކުރިއަށް އޮތް ހަތަރު އަހަރު ވެސް އެތަނުގައި މަސައްކަތް ކުރަން ތިބި މީހުންނެވެ.

ގޮތެއްފޮތެއް ނުބަލައި ހުޅުމާލޭން ގޯތި ބަހާލި ބަހާލުމަކީ ރައްޔިތުން ކަރަށް މަހާލި މަޅިއެކެވެ. މީގެ އިތުރުން ދެން އައި ސަރުކާރަށްވެސް ބޮޑު ބުރައެއް ޖައްސާފައިވެއެވެ. މަގުތައް ބަންދުކޮށް އާ މަގު ހަދަން 250 މިލިއަން ގެ ހަރަދެއް ދާނެއެވެ.

މިއީ އެމްޑީޕީއިން 5 އަހަރު ތެރޭގައި ބޯހބިޔާވަހިކަމުގެ ވައުދު ފުއްދަން ހިންގި ޖަރީމާއެވެ. ނަމަވެސް މިހާރު މަޖިލިަހށް ނުކުމެ މިކިޔަނީ މަޖިލިސް މެޖޯރިޓީ ލިބިއްޖެނަމަ ފްލެޓާ ގޯތި ދޭނެ ވާހަކައެވެ. ނަމަވެސް 5 އަހަރު އެކަން ކުރަން ލިބި ނުވި ބަޔަކަށް ދެން އިތުރަށް ކުރެވޭނީ ކޮން އިތުބާރެއް ހެއްޔެވެ؟