ހޫތީންނަށް އަމާޒު ކޮށް އެމެރިކާއިން އަނެއްކާވެސް ވަރުގަދަ ހަމަލާތަކެއް ދީފިއެވެ.

ޔަމަނަށް އެމެރިކާއިން ފޮނުވާލި ބާރުގަދަ ވައިގެ ހަމަލާތައް ދީފައިވަނީ މައިގަޑު ގޮތެއްގައި ރާޑަރު ސްޓޭޝަންތަކަށް އަމާޒުކޮށެވެ.

ހޫތީންގެ އިސް ފަރާތްތަކާ ހަވާލާދީ ރޮއިޓާސް އިން ބުނެފައި ވަނީ އެމެރިކާއާ ސަނާއަށް ހަމަލާ ދީފައިވާ ކަމަށެވެ. މިދިޔަ 48 ގަޑިއިރުގެ ތެރޭ އިނގިރޭސީންގެ އެހީއާއެކު އެމެރިކާއިން ޔަމަނަށް 73 ހަމަލާ ދީފައިވާ ކަމަށެވެ. މީގެ އިތުރުން ހަމަލާތަކުގައި ހޫތީންގެ އަސްކަރީ މަރުކަޒުތަކަށް ވެސް ހަމަލާ އަމާޒު ކޮށްފައި ވެއެވެ.

އިޒްރޭލުގެ ބޯޓުތަކަށް ރަތް ކަނޑުގައި ހަމަލާދޭތީކަމަށްބުނެ އެމެރިކާ އަދި އިނގިރޭސި ވިލާތުގެ ޖެޓުތަކުން އޮސްޓްރޭލިޔާ އަދި ބަހްރެއިންގެ ސަޕޯޓާއެކު ޔަމަނުގެ އެކި ހިސާބުތަކަށް ގެންދަނީ ހަމަލާތައް ދެމުންނެވެ.

އެމެރިކާއިން ބުނެފައި ވަނީ ހޫތީން ފަހަތަށް ޖައްސާނެ ކަމަށާއި އެކަން ކުރަން އެމެެރިކާ ފަހަތަށް ޖެހިގެން ނޯންނާނެ ކަމަށާއި ރަތް ކަނޑުގައި ދަތުރުކުރާ ބައިނަލްއަގްވާމީ ބޯޓުތަކަށް ރައްކާތެރިކަން ކަށަވަރު ކުރުމުގެ ގޮތުން އެ އެމެރިކާގެ މި ހަމަލާތައް ތައްޔާރީ ހާލަތުގައި ބާއްވާނެ ކަމަށެވެ.

ރަތް ކަނޑުން ދަތުރު ކުރާ އިޒްރޭލަށް މުދާ އުފުލާ ބޯޓުފަހަރަށް ހޫތީން ހަމަލާ ދޭން ފެށީ އިޒްރޭލުން ގާޒާގައި ހިންގާ ގަތުލުއާންމުތަކަށް ބަދަލު ހިފުމުގެ ގޮތުންނެވެ. ޔަމަނުގެ ބޮޑު ބައެއްގެ މައްޗަށް ވެރިކަން ކުރާ އެ ޖަމާއަތުން ބުނެފައި ވަނީ އިޒްރޭލުން ގާޒާއަށް ދޭ ހަމަލާތައް ހުއްޓާލައި އެކަށީގެންވާ އެހީ ގާޒާގެ ރައްޔިތުންނަށް ފޯރުކޮށްދިނުމުން ނޫނީ، އިޒްރޭލާ ގުޅުން އޮންނަ އުޅަނދުފަހަރަށް ރަތް ކަނޑު އަމާން ނުވާނެ ކަމަށެވެ.

ހޫތީންގެ ހަމަލާތަކަކީ އިރާނުގެ އެހީތެރިކަމާ އެކުގައި އިރާނު އަޑީގައި އޮވެގެން ކުރުވާ ކަމެއްގެ ގޮތުގައި ސިފަކޮށް އެމެރިކާއިން ވަނީ އިރާނަށް ސީރިއަސް ތުހުމަތުތަކެއް ކޮށްފައެވެ. ނަމަވެސް އިރާނުން ވަނީ އެ ތުހުމަތުތައް ދޮގުކޮށްފައެވެ.