ގައުމެއްގެ ރައްޔިތުންނަށް ނަމޫނާ ދައްކަން ތިބެނީ އެގައުމެއްގެ ވެރިންނެވެ. ވެރިންގެ ކިބައިން ނުކިސިޔާރު ކަންކަން ފެންނަން ފަށައިފިނަމަ މުޖުތަމައުގައި އެވާހަކަ ދައްކާ އަދި މަލާމާތް ވެސް އެ ވެރިންނަށް އަމާޒުވެއެވެ. ކަން މިހެން އޮތްއިރު ނިމިދިޔަ ފަސް އަހަރަކީ އެކަމުގައި ދިވެހިރާއްޖެ ހައްދުން ނެއްޓި ފަސް އަހަރޭ ބުނުމަކުން ދޮގަކަށް ނުވާނެއެވެ.

އެގޮތުން ބަލާއިރު ނިމިދިޔަ ފަސް އަހަރު، ނާސި ގެއަކަށް ދިވެހި ދައުލަތުގެ ވަޒީރުންގެ ކެބިންތައް ބަދަލުވެގެން ދިޔަ ވާހަކަ އަހަރުމެން އަޑުއެހީމުއެވެ. މުލި ދައުލަތުގެ އަބުރާ އިއްޒަތް ވެއްޔާ މޮޑެލިއެވެ. ދައުލަތުގެ ޝަރަފާ އިއްޒަތް މަގުމައްޗަށް ނެރެ އެއްލާލިއެވެ. ދައުލަތުގެ ވެރިންގެ ގޮތުގައި ތިބި ބަޔަކު ކޯވިޑްގެ ތެރޭގައި ކުޅުނު ކުލަ ކުލައިގެ ފިލްމުތަކުން މުޅި ދައުލަތުގެ ކަރާމާތާ އިތުބާރު ރައްޔިތުން ކުރިމަތީ އުނިވެގެން ދިޔައެވެ.

ރައްޔިތުންގެ ފައިސާ މާގިރީގައި ހިފާފައި ހުރި ކޮޓަރުތަކުގެ ތެރޭގައި ހިންގަމުން ދިޔައީ ކޮން ފަދަ ޖަރީމާތަކެއްކަން އެނގުނީ ޝިކާރަވެރިންނަށް ކެތް ނުވެގެން ބަޑި ފަޅައިގެން ދިއުމުންނެވެ.

އެގޮތުން 2019ގައި ކުރިމަތިވި އާލަމީ ވަބާ "ކޮވިޑް"ގެ ބަލިމަޑުކަން ރާއްޖެއަށް ވެސް އެތެރެވެ ގިނަ ހިތްދަތިތަކާ ކުރިމަތިލީ ފަހުން 2020 ވަނަ އަހަރުގެ ޖުލައި މަހުގެ 15 ގައި ބޯޑަރު ހުޅުވާލަން ނިންމާ ރައީސް އިބްރާހިމު މުހައްމަދު ސޯލިހު އެކަން އިއުލާންކުރެއްވީ އެ އަހަރުގެ ޖޫން މަހުގެ 23 ވަނަ ދުވަހުއެވެ.

ފަތުވެރިކަން އާ މަންޒިލަކަށް ގެންދިއުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށް ވެސް ރައީސް މީހާ ވިދާޅުވިއެވެ.
އެހެންކަމުން އެކަމުގައި އެންމެ ބުރަ މަސައްކަތެއް ކުރަން ހުންނާނީ ޓުއަރިޒަމް މިނިސްޓަރުކަން ޔަގީނެވެ. ޓުއަރިޒަމް މިނިސްޓަރަކަށް އޭރުހުރީ އަޅުގަޑު އަޚު އަލީ ވަހީދެވެ. ކޮވިޑްގެ ތެރޭގައި އައްޔަ ވަނީ ވަރަށް ބުރަކޮށް މަސައްކަތްކޮށްފައެވެ.

އައްޔަގެ ބުރަ މަސައްކަތުގެ ވާހަކަ ކިޔައިދިނީ އަޅުގަޑު ކުރިންވެސް ދެންނެވި ފަދައިން އައްޔާއާއެކު އެ މަސައްކަތުގައި އުޅުނު ކުދިންނެވެ.

މާގިރި ހޮޓެލްގެ އެއް ފްލޯރގައި ޓުއަރިޒަމް މިނިސްޓްރީގެ މުވައްޒަފުންނާ މިނިސްޓަރުގެ ހައިސިއްޔަތުން އަލީ ވަހީދު ވެސް ކޯވިޑްގެ ތެރޭގައި އެއްކޮށް މަސައްކަތްކުރިއެވެ. ނަމަވެސް އެ މަސައްކަތުގެ ތެރޭގައި އައްޔަގެ އެންޓަނާއަށް ލިބެމުން ގެންދިޔަ ބޭޑް ސިގްނަލްތަކުގެ އަސަރު އެކުގައި މަސައްކަތް ކުރި އަންހެން މުވައްޒަފުންނަށް ކުރަން ފެށިއެވެ.

އެއީ އަކީ އަލަކަށް ވާ ކަމެއް ނޫން ކަމަށްވެސް އަޑުތައްވަނީ ގަދަވެފައެވެ. އައްޔަގެ ޖަޒަބާތުތައް ކޮންޓްރޯލު ނުވެގެން އަންހެން މުވައްޒަފުންގެ ކައިރިން އެހީ އާ މަދަދަށް އެދުނު ކަމަށްވެއެވެ. ބައެއް މުވައްޒަފުން ނުރުހުމުގައިވެސް އެހީ ދިން ކަމަށް ވެއެވެ. އަދި އެހީއަށް އެދުން އާންމުކަމަކަށްވެ އެކަން ރައީސް އާ ޖެންޑަރ މިނިސްޓަރުގެ ސަމާލުކަމަށް އެ މުވައްޒަފުން ގެންދިޔައެވެ. އެހީވެސް ވެވޭނީ ވަކި ވަރަކަށްތާއެވެ.

މިހާ ހިސާބުން ރައީސް މީހާއާ ހަަމައަށް ވެސް ގޮސް އެމަނިކުފާނަށް ވެސް ވަރަށް ބޮޑަށް ކީރިތި ކުރެއްވުނު ކަމަށްވެއެވެ. ނަމަވެސް އެއީ ކިނބޫ ކަރުނަ ކަމަށް ގިނަ ބަޔަކު ސިފަކުރިއެވެ. އެހެން ސިފަކުރީ ސަބަބެއްވެސް އޮވެގެންނެވެ. އެއީ އަލީ ވަހީދުގެ މައްސަލައިގައި އޭރުގެ ސަރުކާރުން ކަންކުރި ޒިންމާދާރުކަން ކުޑަ ގޮތުންނެވެ.

ވަޒީރުކަމުން ވަކިކުރިއެވެ. ތެދެކެވެ. ދައުވާ ވެސް ކުރިއެވެ. ނަމަވެސް ކޯޓުގައި ޝަރީއަތް ކުރިއަށް ދަނިކޮށް ކޯޓުން ދިން ހުއްދައެއްގެ ދަށުން އިނގިރޭސިވިލާތަށް ވަޑައިގެން އަލީ ވަހީދު ފިއްލެވީ އެވެ. ސުޕްރީމް ކޯޓުން ވެސް އަލީ ވަހީދުގެ މައްޗަށް ހުރުމަތް ކެނޑުމުގެ ހުކުމެއް ޣައިރު ހާޒިރުގައި އިއްވައި، ފަހުން އެ ހުކުމް ބާތިލްކުރީ އެވެ. އޭނާގެ މައްޗަށް އުފުލާފައި އޮތް ދައުވާތައް ޕްރޮސިކިއުޓާ ޖެނަރަލްގެ އޮފީހުން އަނބުރާ ގެންދިޔައީ އަނިޔާ ލިބުނު ކަމަށް ބުނި މުވައްޒަފުން ހެކިބަސް ދޭން ދެކޮޅު ހެދިކަމަށް ވިއެވެ. ފަހަތުގައި ޔަގީނުންވެސް ކޮންމެވެސް ގޮތް ނޭގޭ ސިއްރެއް ވާނެކަން ޔަގީނެވެ.

ކޮންމެ އަކަސް އެއާއެކު އެއީ އެންމެންނަށް އެނގޭ ބޮޑު ސިއްރަކަށް ވެ ނުދައްކާ ވާހަކައަކަށް ވެސް ވިއެވެ. ނިމި ދިޔަ ރިޔާސީ އިންތިހާބުގެ ތެރޭގައި އަލީ ވަހީދު ރާއްޖެ އެނބުރި އައިސް އިބްރާޙިމު މުހައްމަދު ސޯލިހުގެ ކެމްޕެއިންނާ ވެސް ގުޅުނެވެ. އަދި މިހާރު ހުރީ އެމްޑީޕީގެ ޓިކެޓުގައި ކުރިއަށް އޮތް މަޖިލިސް އިންތިހާބުގައި ވާދަކުރުމަށް ފޫ ގަޅާފައެވެ.

މިހެން ހުއްޓަ ލީކެއްވެއްޖެއެވެ. ބޮޑު ލީކެކެވެ. ލީކު ނުވާނެއޭ ހިތާ ޖެހި ސިޔާސީ ނެޕީއިން ލީކުވެ މުޅި ގައުމަށް ފަސް ފޯރައިފިއެވެ.

އެގޮތުން ދެތިން ދުވަސް ތެރޭ އެކްސްގައި އަމިއްލަ މީހެއްގެ އެކައުންޓުން ވަނީ މައްސަލާގައި އަނިޔާ ލިބުނު ކަމަށް ބުނާ ތިން މުވައްޒަފަކު ފުލުހުންގެ ތަހުގީގަށް ދީފައިވާ ބަޔާން ލީކްކޮށްލައިފަ އެވެ. އެ ބަޔާންތަކުގައި ހުރި ވާހަކަތަކުން މިއީ އާދައިގެ ތުހުމަތުތަކެއް ނޫން ކަން އެނގެއެވެ.

ފިއްކަޑައިގެން ދާވަރުގެ ވާހަކަތަކެވެ. ކުރިން ހީކުރެވިފައި އޮތް އާދައިގެ ބެހުމަކަށް ވުރެ މާ ދަރަޖަ މަތީގައި އޮތް ބެހުމެކެވެ. ދައުވާ ސާބިތުވެއްޖެ ނަމަ، ސީދާ ރޭޕްގެ އެތައް ކުށެއް އަލީ ވަހީދުގެ މައްޗަށް ސާބިތުވާނެކަން ޔަގީނެވެ.

މީގެ ކުރިން އަޑު އިވިފައި އޮތީ އަލީ ވަހިދުގެ ވަކިތަކުން ސަލާމާތްވާ މޫދަށް ފުންމާލި ކުއްޖެއްގެ ވާހަކތާއެވެ. ނަމަވެސް ލީކުކޮށްފައިވާ ބަޔާންތައް ހުލާސާކޮށްލާއިރު، އަލީ ވަހީދު އެ ކުދިންނާ ގަދަކަމުން ނުކުރާ އެއްވެސް ކަމެއް ނެތެވެ.

ހިތްދަތި ވާހަކަތަކެވެ. ބައެއް ކުދިން އެ ކުދިންގެ އަންނައުނު ގަދަކަމުން ބާލުވައި، ރޮއެރޮއެ އޮއްވައި ޖިންސީ ގުޅުން ހިންގި ކަމަށް، ބަޔާންތަކުގައި ބުނެފައި އެބަހުއްޓެވެ.

މަޖުބޫރުކޮށްގެންނާއި އޮބި އަޅައިގެންނާއި އޮޅުވާލައިގެންނާއި މަގާމުގެ ނާޖާއިޒު ފައިދާ ހޯދައިގެން ވެސް އޭނާ ބޭނުންވި ކަންކަން ބައެއް ކުދިންގެ ފަރާތުން ކޮށްފައިވާ ކަމަށް ތުހުމަތެވެ. ބައެއް ކުދިންނާ ގަދަކަމުން ބެހެން މަސައްކަތްކޮށްގެން ވެސް އެކަމެއް ނުވި ކަމަށް ވެސް ބަޔާންތަކުގައި އެބަ އޮތެވެ.

2020 ވަނަ އަހަރުގެ ރޯދަ މަހުގެ ތެރޭ ޓޫރިޒަމް މިނިސްޓްރީގެ މުވައްޒަފުން ދައުލަތުން ހަރަދުކޮށްގެން ތިބި މާގިރި ހޮޓެލް "ޕާޓީކުރާ" ތަނަކަށް ހަދައި، އެ ތަނުގައި މަސްތުވުމުގެ އާލާތްތަކާ ތަކެތި ގެންގުޅުނު ކަމަށް ވެސް ބަޔާނުގައި ބުނެފައިވެއެވެ. މާގިރި ހޮޓެލްގެ ރޫމްތަކާއި އެތަނުގައި ހިނގި ކަންކަން ވެސް މުވައްޒަފުން ބަޔާންތަކުގައި ކިޔައިދީފައިވާ ގޮތް ދިމާވެއެވެ.

ދެން މިހާ ހިސާބުން އުފެދޭނެ ސުވާލަކީ މި ހުރިހާ ހެކި ހުރިއިރުވެސް މައްސަލަ އޮބުނީ ކިއްވެ ކަމަށްތޯއެވެ. ރަގަޅު ވާހަކައެެވެ. ނަމަވެސް ސީދާ ރައީސުލްޖުމްހޫރިއްޔާއާ ހިސާބުން ޔަގީންކަމެއް ލިބުމުން ދިން ބަޔާންތަކާ އެކު އިތުރު ކުރިއެރުމެއް ނުލިބެންޏާ ފޫނެއް ފާއްޔަށް ފެންފުރާނީ ކާކުތޯއެވެ؟ އަލީ ވަހީދު ބަންދު ނުކުރި ތާ އޭނާ ފުރުވާވެސް ލީއެވެ.

ހަމަލާގެ ޝީކާރަވެރިންނަށް އުއްމީދު ގެއްލުމުގެ ސަބަބުން ކަމަށް ގަބޫލު ކުރެވި ހެކިބަސް ދޭން ދެކޮޅު ހެދިއެވެ. ހަމައެކަނި ޝިކާރަވެެރިޔާ ބަނދުނާމުވާނެ ފަދައިން ބައެއް ވާހަކަަތއް ލީކުވެސް ކޮށްލީއެވެ. ބަޔަކު ގަސްތުގައި ވަކި މީހެއްގެ މަސްލަހަތު ހިފެއްހެއްޓުމަށް ޖަރިމާ ހިންގީއެވެ.

ސިޔާސީ ނުފޫޒު ގަދަ ބޭފުޅަކާ ދެކޮޅަކަށް ބަޔާން ދީގެން ވާނެ ކަމެއް ނޯންނާނެ ކަމުގެ ވާހަކައާ އެކު ޝިކާރަވެރިން ފަސްޖެހުނީއެވެ. ނަމަވެސް ސައްހަ ބަޔާންތަކެއްކަން ކަށަވަރުވެފަިއވާ މި ބަޔާންތަކުން ފެނިގެން ދަނީ އިހަސް ހީކުރި ވަރަށްވުރެ މާ ސީރިއަސް ވާހަކަތަކެކެވެ. މިވާހަކަތައް ނުދައްކާ ނޫނީ މި މައްސަލަ ނުބަލާ ދޫކޮށްލުމަކީ މިފަދަ ޘަގާފަެއްގައި ގައުމުގައި އަށަގަންނަން މަގު ފަހިކޮށްދޭނެ ލައިސަންސަކަށްވެސް ވެދާނެއެވެ.

ކުރި ސަރުކާރުން މިކަން ނުބެލީއެވެ. ނަމަވެސް އިންސާފު ގާއިމުކޮށްދޭން އައި މި ސަރުކާރުން މި މައްސަލަ ބަލާ ފިޔަވަޅު އަޅަން ޖެހެއެވެ.

އެމްޑީޕީއިން ގައުމުގައި ހާވާފައިހުރި ބޮޑެތި ހަޑިތައް ސާފުކޮށް ކަންކަން ހަމަމަގަށް އަޅުވަން ވެއްޖެއެވެ. މިސްރާބު ހަމަމަަގުން ކައްސުވާލުމަށް ފަހު ސަމުގާ ހިފައިގެން ނުކުތަސް ހަމަމަގަށް ނޭޅުވޭނެކަން ޔަގީންވަނީ މި ކަހަލަ ކަންކަމުންނެވެ.

އެމްޑީޕީއެވެ. މިވާހަކަތައް އަޑު އަހާފައިވެސް ރައްޔިތުން ހަމަ ވޯޓު ދޭންވީ ހެއްޔެވެ؟