ޕީޕީއެމް ޕީއެންސީ މެމްބަރުންނާ ޕާޓީތައްވެސް މަގު މަތިކޮށްލާނެ ނަމަ، ސުޕްރީމު ކޯޓުން ހުކުމް އިއްވުމުގެ ކުރިން ޕީއެންސީއިން ކެންޑިޑޭޓަކު ދެއްކުމުގެ ފުރުސަތު ނުދެއްވީސް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، 20 ވަނަ ރައްޔިތުންގެ މަޖިލިހަށް ޕީއެންއެފްގެ ޓިކެޓުގައި ވާދަކުރާ ކެންޑިޑޭޓުންގެ ސިޔާސަތުތައް ހާމަކުރުމަށް ދަ ފްރޮންޓު އޮފީހުގައި ބާއްވަމުން ގެންދާ ޖަލްސާތަކުގެ ތެރެއިން އާދިއެްތަ ދުވަހުގެ ރޭ ބޭއްވި ޖަލްސާގައި ހިތާދޫ ދާއިރާއަށް ވާދަކުރާ ޝަރީފާ ސައީދަށް އަމާޒުކުރެއްވި ސުވާލެއްގެ ތެރެއިންނެވެ.

މި ފަހަކަށް އައިސް ރައީސް ޔާމީން ގެންދަވަނީ ޕީޕީއެމްއާ މެދު ކަންކުރަމުން ގެންދާ އިހާނެތި ގޮތާ މެދު ކަންބޮޑުވުން ފާޅުކުރައްވަމުންނެވެ.

ރައީސް ޔާމީން ވާހަކަފުޅުތަކަށް ރައްދު ދެއްވާ ސަރުކާރުގެ އިސްވެރިން ރައީސް މުހައްމަދު މުއިއްޒުގެ އަމުރަށް ސޯޝަލް މީޑިޔާގައި ރައްދުދީ ހިއްސާކުރަމުން ގެންދާ ވާހަކަތަކާ ގުޅިގެން ރައީސް ޔާމީން ވިދާޅުވީ، ޕީޕީއެމް ޕީއެންސީ އަދި އެ ދެޕާޓީގެ މެމްބަރުން ބިކަކޮށް މަގުމަތިކުރާނެ ނަމަ، ސުޕްރީމު ކޯޓުގައި އޭރު އޮތް އެމަނިކުފާނުގެ ކެންޑިޑެންސީ މައްސަލައިގައި ހުކުމްކުރުމުގެ ކުރިން ޕީއެންސީއިން ކެންޑިޑޭޓަކު ދެއްކުމުގެ ފުރުސަތު ނުދެއްވީސް ކަމަށެވެ.

އެހެންކަމުން ސަރުކާރުގެ އިސް ވަޒީރުވެސް ރައްޔިތުންނަށް ކަންކަން ހާމަކުރައްވާއިރު ފެކްޓާ އެކު ވާހަކަ ދެއްކެވުމަށް ރައީސް ޔާމީން އިލްތިމާސްކުރެއްވިއެވެ.

ރައީސް ޔާމީން ވިދާޅުވީ، އެމަނިކުފާނުގެ ކެންޑިޑެންސީ ބަލައިނުގަތުމަށް ނިންމުމުން ސުޕްރީމު ކޯޓަށް ދުސްތޫރީ މައްސަލަ ވެއްދި ހިސާބުންވެސް ޕީޕިއެމް ޕީއެންސީގެ ލީޑަރޝިޕުން އެމަނިކުފާނަށް ނޯޓު ފޮނުވަމުން ގެންދެވި ކަމަށާ އެގޮތުން އެމަނިކުފާނު ޚިޔާރުކުރާ ނަންތަކެއް ފޮނުވުމަށް އެދުނު ކަމަށެވެ.

އެމަނިކުފާނު އެ ފުރުސަތު އޮތްއިރުވެސް އެމަނިކުފާނު ޑިމޮކްރެސީގެ ރީތި ހަމަތައް އިސްކުރައްވާ ޕާޓީގެ ކަންކަން ނިންމަން ޕާޓީއަށް ފުރުސަތުދީ އެމަނިކުފާނުގެ ގާނޫނީ ވަކީލު ޑރ. މުހައްމަދު ޖަމީލު އަހުމަދު މެދުވެރިކޮށް ނޯޓުތައް ފޮނުއްވި ކަމަށާ އަދި އެމަނިކުފާނު އިންތިހާބު ބޮއިކޮޓުކުރަން ވިދާޅުވި ވިދާޅުވން ވަރު ވަރުން ނަގައިގެން ސަރުކާރާ ސަރުކާރު ދިފާއުކުރަން މަގާމުދީފައި ތިބި މީހުން ޓްވީޓުކޮށް ދައްކަމުން ގެންދާއިރު އެހެން އެކަން ކުރި ނަމަ އެމަނިކުފާނުގެ މައްސަލަ ރިވިއުކުރަން ފުރުސަތު ލިބި އިންތިހާބުވެސް ފަސްކޮށް އެތައް ރައްޔިތުންނެއް ބޭނުންވި ކެންޑިޑޭޓަށް ފުރުސަތު ލިބިގެން ދިޔައީސް ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، އަނގަމަތީ އަޅާފައިވާ ޓޭޕު ގަނޑު ނެއްޓުނުހާ އަވަހަކަށް ބޮއިކޮޓުކުރި ވާހަކަ އާ ގުޅޭ ގޮތުން ދައްކަމުންދާ ވާހަކަތަކަށް ރައްދު ދެއްވާ ރައްޔިތުންނަށް ހަގީގަތް އަދިވެސް އިތުރަށް ހާމަކޮށްދެއްވާނެ ކަމަށެވެ.

ރައީސް ޔާމީން ވިދާޅުވީ އޭރުވެސް އެމަނިކުފާނު މިނިވަންކުރުމަށް ކުރަމުން ދިޔަ މުޒާހަރާތަކުގައި އިސް ލީޑަރޝިޕުން ކަންކުރި ގޮތް ނިކަން ރަގަޅަށް އެނގިލައްވާ ކަަމަށާ އެގޮތުން އެމުޒާހަރާތައް ހުއްޓުވުމަށް ސީދާ ދެ ޕާޓީ ތެރެއިން އިސްވެރިން ވަނީ މަސައްކަތްކޮށްފައިކަމަށް ރައީސް ޔާމީން ވިދާޅުވިއެވެ.