މަގޫދޫ އެއާޕޯޓު މަޝްރޫއު ހުއްޓާލީ އަމިއްލަ މަންފާއަށްކަމަށް ބުނެ މަޖިލީހަށް ކުއްލި މައްސަލައެއް ހުށައަޅުއްވައިފިއެވެ.

މިކަމާ ގުޅިގެން މަޖިލީހަށް ކުއްލި މައްސަލައެއް ހުށަހެޅުއްވީ ބިލަތްދޫ ދާއިރާގެ މެމްބަރު އަހުމަދު ހަލީމެވެ.

މައްސަލަ ހުށަހަޅުއްވަމުން މެމްބަރު ހަލީމު ވިދާޅުވީ ނިލަންދޫގައި އެއާޕޯޓެއް އަޅަން ސަރުކާރުން ނިންމީ ރައީސް ޑރ މުހައްމަދު މުއިއްޒުގެ ކޮއްކޯފުޅު، ފާތިމަތު ސައުދާ އެ ދާއިރާއަށް ވާދަކުރައްވާތީ ސިޔާސީ މަންފާއެއް ހޯދުމުގެ ގޮތުން ކަމަށެވެ.

މައްސަލައިގައި އިތުރަށް ބުނެފައިވަނީ މިއީ ރައީސުލްޖުމްހުރިއްޔާގެ ބާރުތައް ގާނޫނާއި ހިލާފަށް، އަމިއްލަ އާއިލީ އަދި ސިޔާސީ މަންފާއަށް ބޭނުން ކުރުންކަމަށެވެ.

އެގޮތުން ގާނޫނު ނިވާފަތްގަނޑަކަށް ހަދައިގެން ރައީސްގެ ޖާތީ އަދި އަމިއްލަ މަސްލަހަތު އިސްކޮށް އަދި އެމަނިކުފާނު ގާނޫނީ ހުދޫދުން ވަނީ ބޭރުވެފައިވާ ކަމަށް ހަލީމް ވިދާޅުވި އެވެ. އަދި، މީގެ ކުރީގެ ސަރުކާރުތަކުން ފަށާފައިވާ މަޝްރޫއުތައް އެއަށްވުރެ ފުރިހަމައަށް ކޮށްދެއްވާނެ ކަމަށް ރައީސް ވެވަޑައިގެންފައިވާ ވައުދުފުޅާވެސް ހިލާފްވެފައިވާ ކަމަށް މެމްބަރު ހަލީމު ވިދާޅުވިއެވެ.

މައްސަލައިގައި ސިފަކޮށްފައިވާގޮތުން އިގްތިސާދީ ގޮތުންނާއި އިޖުތިމާއި ގޮތުން ދިވެހި ދައުލަތާއި ދިވެހި ރައްޔިތުންނަށް މި ނިންމުމުގެ ސަބަބުން ގެއްލުން ލިބޭނެއެވެ. އަދި މިކަން ބަދަލުކުރުމަށް ވަނީ ގޮވާލާފައެވެ.

މަޖިލީހަށް މި މައްސަލަ ބަލައިިގަނެފައިވާއިރު، ބަހުސްގެ މަރުހަލާ މިހާރު ދަނީ ކުރިއަށެވެ.

މަގޫދޫ އެއާޕޯޓް މަޝްރޫއު ހުއްޓާލުމުން އެރަށުގައި ދަނީ ސިލްސިލާކޮށް މުޒާހަރާ ކުރަމުންނެވެ. މަޝްރޫއު ކުއްލިއަކަށް ހުއްޓާލުމަށްފަހު، އެއާޕޯޓް މަސައްކަތްކުރާ މުވައްޒަފުން ގޭގައި މަޑުކުރަން އަންގާފައިވާ ކަމަށް އެރަށުން މައުލޫމާތުދެ އެވެ. ނަމަވެސް އެ މަޝްރޫއު ހުއްޓާލަން އަންގާފައި ނުވާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެފައިވެ އެވެ.