އައްޑޫއަށް ވެފައިވާ ވައުދުތަކާއި އެޔާގުޅިގެން ފަށަން ނިންމާފައިވާ މަޝްރޫއުތަކުގެ ތެރެއިން އެއްވެސް މަޝްރޫއެެއް ކުރިއަށް ނުދާ ސަބަބާ މެދު ސުވާލުކުރުމަށް ހައުސިން އެންޑް ކޮންސްޓްެރަކްޝަން މިނިސްޓަރު ޑރ. އަބްދުﷲ މުއްތަލިބު ރައްޔިތުންގެ މަޖިލީހަށް ހާޒިރުކުރަން ހުށަހަޅައިފިއެވެ.

މުއްތަލިބު މަޖިލީހަށް ހާޒިރުކުރުމަށް ހުށަހަޅާފައިވަނީ، އައްޑޫ މީދޫ ދާއިރާގެ މިނިވަން މެންބަރު އަބްދުއްރަހްމާންއެވެ.

އައްދު ހުށަހަޅާފައިވާ ހުށަހެޅުމުގައި ވަނީ، އައްޑޫއަށް ވެފައިވާ ވައުދުތަކާއި އެޔާގުޅިގެން ފަށަން ނިންމާފައިވާ މަޝްރޫއުތަކުގެ ތެރެއިން އެއްވެސް މަޝްރޫއެެއް ކުރިއަށް ނުދަނީ ކައުންސިލާއި މަޖިލިސް މެންބަރުންގެ އެއްބާރުލުން ނުލިބިގެންތޯ ސާފުކުރުމަށް އެދިފައެވެ.

އެގޮތުން 2 ސުވާލެއްގެ މައްޗަށް ބިނާ އައްދު ވަނީ މުއްތަލިބާ ސުވާލުކުރުމަށް މަޖިލީހަށް ހާޒިރުކޮށް ދިނުމަށް އެދިފައެވެ. އެ ސަބަބުތަކަކީ:

• އައްޑޫ މީދޫގައި ސަރުކާރުން ހިންގަން ނިންމާފައިވާ މަޝްރޫއުތަކާއި ރައީސް މުހައްމަދު މުއިއްޒު އެރަށަށް ވަޑައިގެން ފައްޓަވާފައިވާ މަޝްރޫއުތަކުގެ އިތުރުން މުޅި އައްޑުއަށް ވެފައިވާ ވައުދުތަކުގެ ތެރެއިން އެއްވެސް ކަމެއް ނުހިނގަނީ އައްޑޫ ކައުންސިލް ނުވަތަ އައްޑޫއަށް ނިސްބަތްވާ މަޖިލިސް މެންބަރުންގެ އެއްބާރުލުން ލިބިނުލައްވައިގެންތޯ؟ އާ

• މިކަންކަން ފަށައިގަނެވޭނީ ކައުންސިލް އަދި މަޖިލިސް މެންބަރުން ކޮން ކަމެއް ކޮށްދެއްވީމަތޯ؟ އެވެ.

އެ ހުށަހެޅުމަކީ އޭނާ ރައްޔިތުންނާ އެކު ބޭއްވި ބައްދަލުވުމުގައި އެ ސުވާލުތައް ކޮށްދިނުމަށް ރައްޔިތުން އެދިފައިވާތީ ހުށަހަޅާ ހުށަހެޅުމެއް ކަމަށްވެސް އައްދު ވިދާޅުވެފައިވެއެވެ.

އައްޑޫގެ ތަރައްގީއާ ގުޅިގެން ސުވާލުކުރުމަށް މިނިސްޓަރު މަޖިލީހަށް ހާޒިރުކޮށްދިނުމަށް އެދިފައިވާއިރު، އައްޑޫގެ ތަރައްގީ ކުރިއަށް ނުދަނީ ކައުންސިލްތަކުން އެއްބާރުލުން ނުލިބޭތީ ކަމަށް ރައީސް މުހައްމަދު މުއިއްޒު މީގެ ކުރިން ވިދާޅުވެފައިވެއެވެ.