މޯލްޑިވްސް މާކެޓިން އެންޑް ޕަބްލިކް ރިލޭޝަންސް، އެމްއެމްޕީއާރުސީގެ ޑީއެމްޑީ މުވައްޒަފުންތަކަކަށް ޖިންސީ ގޯނާކުރި މައްސަލައެއް ފެންމަތިވެއްޖެއެވެ.
އެމްއެމްޕީއާރްސީއާ ހަވާލާދި ބައެއް މިޑީޔާތަކުގައި ރިޕޯޓުކޮށްފައިވާ ގޮތުގައި އެ ކުންފުނީގެ މުވައްޒަފަކާ ގުޅޭ ގޮތުން ސޯޝަލް މީޑިއާގައި ދައުރުވަމުންދާ ފަދަ އެއްވެސް މައްސަލައެއް އެ ކުންފުނީގެ މުވައްޒަފެއްގެ ފަރާތުން ހުށަހަޅާފައި ނުވާ ކަމަށާއި، ނަމަވެސް މެނޭޖްމަންޓަށް ލިބިފައިވާ މައުލޫމާތަކާ ގުޅިގެން އެކަމުގެ ސައްހަކަން ކަށަވަރު ކުރަމުން އަންނަ ކަމަށެވެ.
ޝޯޝަލް މީޑިއާގައި ދައުރުވާ މައުލޫމާތުތަކުން އެނގޭ ގޮތުން މި މަހު ކުރީކޮޅު ރާއްޖެ ޕްރޮމޯޓްކުރަން ޖަރުމަނުގެ ބާލިންއަށް ދިޔަ ޓީމުގައި ހިމެނޭ އެ ކުންފުނީގެ ޑެޕިއުޓީ އެމްޑީ ބައްސާމް އާދަމް ވަނީ އަންހެން މުވައްޒަފަކަށް ޖިންސީ ފުރުއްސާރަ ކޮށްފައެވެ.
އެގޮތުން އެ އަންހެން މުވައްޒަފު ވަނީ އެ ދަތުރަށް ފަހު ހުށަހަޅާ ''ޓްރިޕް'' ރިޕޯޓުގައި އެ މައުލޫމާތު ހިމަނާފައިވެއެވެ. އިތުރު ތިން މުވައްޒަފަކަށް ބައްސާމު ޖިންސީ ފުރުއްސާރަކުރި ކަމަށް އެ ރިޕޯޓުގައި ބުނެފައިވާ ކަމަށް ބައެއް މީީޑިޔާތަކުގައި ރިޕޯޓްކޮށްފައިވެއެވެ.
މައްސަލައާ ގުޅިގެން ޑިސިޕްލިނަރީ ކޮމިޓީގެ ތަހުގީގަށް ފަހު އަޅަން ޖެހޭ ފިޔަވަޅުތައް އަޅާނެ ކަމުގެ ޔަގީންކަން އެމްއެމްޕީއާރްސީން ދީފައިވާ ކަމަށްވެސް މީޑިޔާތަކުގައި ރިޕޯޓުކޮށްފައިވެއެވެ.
