ޒަކާތު ފަންޑުން ފަލަސްތީނުގެ ޢައްޒާއަށް އެހީތެރިކަން ފޯރުކޮށްދިނުމަށް ނިންމައިފިއެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖޭގެ ޒަކާތު ފަންޑުން ޢައްޒާއަށް ކާބޯތަކެތީގެ އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމަށެވެ.

އޭގެ އިތުރުންވެސް މިނިސްޓަރ ވިދާޅުވީ ޣައްޒާގެ އަޚުންނާއި އުޚުތުން, ކުޑަކުދިން ބަނޑަށް މަރުވަމުންދާތަން ދެކެން ބޭނުން ނޫންކަމަށެވެ.

މިނިސްޓަރ ވިދާޅުވީ އަހަރެމެން އަތުގައި ހުރި އެއްޗަކުން އަހަރެމެންގެ އަޚުންނާއި އުޚުތުންނަށް އިންޝާ ﷲ އެހީ ފޯރުކޮށްދެވޭނެ ކަމަށެވެ.

މިއީ ދިވެހިރައްޔިތުންގެ ދީލަތި އިޙުސާސްތައް ކަމަށާއި ތާރީޚީ ގޮތުން ބަލާއިރު ދިވެހިރާއްޖޭގެ ޒަކާތު ފަންޑުން މިއީ ފުރަތަމަ ފަހަރަށް ބޭރަށް އެހީއެއް ފޮނުވުން ކަމަށްވެސް މިނިސްޓަރ ވަނީ ވިދާޅުވެފައެވެ.

މިއީ ޒަކާތަށް ޚާއްޞަ އިދާރާއެއް ރާއްޖޭގައި ޤާއިމު ވެގެން ދިއުމުގެ ހެޔޮ ނަތީޖާ ކަމަށާއި ރާއްޖޭގެ ތަނަވަސްކަމުގެ އަހުލުވެރިން ޒަކާތު ހައުސްއަށް ޒަކާތް ދައްކަވަމުން ދިއުމުގެ ހެޔޮ ނަތީޖާ ކަމަށް ވިދާޅުވެ މިނިސްޓަރ ވަނީ ރާއްޖޭގެ ރައްޔިތުންނަށް ތައުރީފްކޮށްފައެވެ.

ޒަކާތު ފަންޑަކީ ފަގީރުންނާ މިސްކީނުންނަށް އެހީވުމުގެ މަގުސަދުގައި އިސްލާމިކް މިނިސްޓްރީގައި އުފައްދާފައިވާ ފަންޑެކެވެ.

އަދި އެ ފަންޑުގެ މެނޭޖުމަންޓު ވަރުގަދަ ކުރުމަށް ޒަކާތު ހައުސްގެ ނަމުގައި އިދާރާއެއް ވެސް ވަނީ ގާއިމްކުރެވިފައެވެ.