ޕީޕީއެމް މަގުމަތިނުވާކަމަށް އަދުރޭ ބުނުމުން 20 ވަނަ ރައްޔިތުންގެ މަޖިލިސް އިންތިޚާބްގައި ޕީއެންއެފްގެ ފަރާތުން ހެންވެއިރު ހުޅަނގު ދާއިރާ އަށް ވާދަކުރައްވާ ނާއިފް ޝައުކަތް ވަރުގަދަ ސުވާލެއް އަމާޒުކުރައްވައިފިއެވެ.

ނާއިފް މިފަދައިން ވިދާޅުވީ ޗެނަލް 13 އިން ގެނެސްދޭ ޕީއެންއެފްގެ މަސައްކަތުގެ އަދާހަމަ ލައިވްގައި ވާހަކަ ދައްކަވަމުންނެވެ.

އެގޮތުން ނާއިފް ވިދާޅުވީ 2023 ވަނަ އަހަރުގެ ރިޔާސީ އިންތިޚާބް ބޮއި ކޮޓް ކުރުމަށް އެންމެ ފުރަތަމަ އެވާހަކަ ދެއްކެވީ އަދުރޭ ކަމަށާއި، އޭރުގެ ޕީޕީއެމް/ޕީއެންސީގެ ލީޑަރޝިޕްގައި ތިއްބެވި ފަރާތްތަކުންވެސް ގޮވާލީ ބޮއިކޮޓް ކުރުމަށް ކަމަށެވެ. އެހެން ކަމުން އެބޭފުޅުން އެގޮތަށް އެދުނީމާ ރައީސް ޔާމީންވެސް ބޮއި ކޮޓް ކުރަން ނިންމެވި ކަމަށެވެ.

އޭގެއިތުރުންވެސް ނާއިފް ވިދާޅުވީ މިއަދު ވެރިކަން ލިބުނީމާ، އިންތިޚާބް ބޮއިކޮޓް ނުކުރާކަމަށާ، ޕީޕީއެމް މަގުމަތި ނުވާކަމަށް ބުނަމުންދާ ދިޔުމަކީ ހުސް ދޮގުކަމަށެވެ.

ނާިއފް ވިދާޅުވީ ހަގީގަތަކީ ޕީޕީއެމް އޮތީ މަގުމަތިވެފައި ކަމަށާއި، ޕީޕީއެމްގެ އާންމު މެމްބަރުން ތިބީ ހާލުގައިކަމަށެވެ.

ވެރިކަން ގެންނަން އެންމެ ބުރަކޮށް މަސައްކަތް ކުރެއްވީ ޕީޕީއެމްގެ މެމްބަރުން ކަމަށްވީއިރުވެސް ވަޒީފާތަކާއި އެއްޗެހި ބަހާ ނިންމާލީ ޕީޕީއެމްގެ މެމްބަރުންތައް މަހުރޫމްކޮށްލާފައިކަމަށްވެސް ނާއިފް ވިދާޅުވިއެވެ.

ނާއިފް އިތުރަށް ވިދާޅުވީ ޕީޕީއެމް މަގުމަތި ވެފައި އޮތީ ސީދާ އަދުރޭ ގެ ސަބަބުން ކަމަށެވެ.

މިސާލު ދައްކަވަމުން ނާއިފް ވިދާޅުވީ ކުރިޔަށް އޮތް 20 ވަނަ ރައްޔިތުންގެ މަޖިލިސް އިންތިޚާބްގައި ޕީޕީއެމްގެ ފަރާތުން އެއްވެސް މެމްބަރަކު ކުރިމަތިނުލާކަމަށެވެ.