އާދިއްތަ ދުވަހުގެ ރޭގެ ވަގުތެއްގައި ދަ ފްރޮންޓް އޮފީހުގައި ބޭއްވި ޖަލްސާއެއްގެ ތެރެއިން ރައީސް އަބްދުﷲ ޔާމީން ދެއްކެވި ވާހަކަފުޅަކާ އެކު މުޅި ދައުލަތް އަނެއްކާވެސް ޑިފެންސަށް ފޭބި މަންޒަރު ފެނިގެންދިޔައެވެ.

ރައީސް ޔާމީން މިނިވަންކުރަން ކުރި މުޒާހަރާތަކުގައި ކަންކަން ވެގެން ދިޔަ ގޮތުގެ ހަގީގަތް އެމަނިކުފާނު ހާމަކުރެއްވުމުން ބަޔަކަށް ހަޖަމް ކުރަން ދަތިވީއެވެ.

ރައީސް ޔާމީން މިނިވަންކުރަން ކުރެވުނު ހުރިހާ ކަމެއް ކުރާނެ ކަމަށް އެ ކޯލިޝަންގެ ވަގުތީ ލީޑަރު އަދުރޭ އޭރު ބުނި ހަނދާން ޔަގީނުންވެސް ދިވެހި ރައްޔިތުން އަޑު އަހާ ބަލާފައިވާނެކަން ޔަގީނެވެ.

އެގޮތުން ރައީސް ޔާމީން މިނިވަންކުރަން ކޮންމެ ރެއަކު އެމަނިކުފާނަށް ވަފާތެރި ސަޕޯޓަރުން ނުކުމެ ވީ ގުރުބާނީގެ ތެރެއިން ލީޑާރޝިޕުގެ ބައިވެރިވުން ނުފެންނަ ކަން ރައީސް ޔާމީން ފާހަގަކުރެއްވިއެވެ. އެއްވެސް ހާލެއްގައި އެމަނިކުފާނު އާންމު މެމްބަރުންގެ ވާހަކައެއް ވިދާޅެއް ނުވެއެވެ. އެމަނިކުފާނު ވިދާޅުވީ ޕާޓީގެ ލީޑާރޝިޕުން ކަންކުރި ގޮތް އެމަނިކުފާނަށް އެނގިވަޑައިގަންނަވާ ކަމަށެވެ.

ޕާޓީގެ ލީޑާރޝިޕުގެ ގިނަ ބޭފުޅުން އެކަމުގައި ބައިވެރިނުވާ ކަމަށެވެ. ލީޑާރޝިޕުގެ މީހުން ބޭނުންވީ އެމަނިކުފާނު ޖަލުގައި ބާއްވައިގެން އިންތިހާބުގައި ވާދަކުރަން ކަމަށެވެ. އެގޮތުން ލީޑާރޝިޕުން އެ މުޒާހަރާތައް ހުއްޓުވަން މަސައްކަތްކުރި ވާހަކަވެސް ރައީސް ޔާމީން ފާހަގަކުރެއްވިއެވެ.

އެގޮތުން ސީދާ ޕާޓީ އޮފީސް ތެރެއިން ލިސްޓު ހަދާ ފުލުހުންނާ ހަމައަށް ލިސްޓު ފޮނުވާ ހައްޔަރުކުރަންވީ މީހުން ކިޔައިދިން ވާހަކައެވެ. އޭރުން މުޒާހަރާ ހުއްޓޭނެ ވާހަކައެވެ. މިވާހަކަތަކަކީ މިއި އޭރު އެންމެނަންވެސް އެނގޭ ބޮޑު ސިއްރެކެވެ. ނަމަވެސް ގިނަ ބައިވެރިން ބުނަމުން ދިޔައި ކިއްހޭ ކުރާނީ މިއަދު ރައީސް ޔާމީންގެ ހައްގުގައި މި މަސައްކަތްކުރަން އެބަ ޖެހޭ ކަމަށާ ލީޑާރޝިޕުގެ އެއްބާރުލުން ނުލިބުނަސް އެކަން ކުރާނެ ވާހަކައެވެ.

ރައީސް ޔާމީންގެ މިވާހަކަތަކާ އެކު، ކުޑަ އިރު ފުޓް ބޯޅަ ކުޅެން ބޭނުންވި ނަމަވެސް އެކަން ހާސިލުނުވި، ޑިފެންސަށް ކުޅެން ފޯރި ހުންނަވާ ޑރ. މުހައްމަދު މުއިއްޒުގެ ސަރުކާރުން ޑިފެންސް ލައިނަށް ފޭބީ ފޯވާޑުންނާވެސް އެކުއެވެ.

އެގޮތުން ޕީއެންސީއިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުމުގައި ނޫސްވެރިންގެ ސުވާލުތަކަށް ޖަވާބު ދެއްވަމުން ސްޕޯސްކްޕާސަން ހީނާ ވަލީދު ވިދާޅުވީ، ރައީސް ޔާމީން އެ ފާހަގަކުރެއްވީ، ޑރ. ޖަމީލު އާ މަލީހު މުޒާހަރާ ބައިވެރިނުވާ ވާހަކަ ކަމަށެވެ. މަލާމާތާ ފުރައްސާރައިގެ މޭރުމުން ހީނާ މި ޖަވާބު ދެއްވީމާ ހައިރާނެއް ނުވެއެވެ. އެއީ އޭރުވެސް ލީޑާރޝިޕުން ހިންގި ހުރިހާ ޖަރީމާއެއްގެ އެއް ބައިވެރިޔާއަކީ ހީނާކަމަށްވުމުންނެވެ.

މުޒާހަރާ ހުއްޓުވަން މުޒާހަރާއަށް ނުކުންނަ މީހުން ހާޒިރުކޮށް ނުނިކުންނަން ޕާޓީ އޮފީހުން އެންގި ވާހަކަ ދޮގުކުރިއިރު ޕީޕީއެމްގެ ރެޖިސްޓްރާ އަހުމަދު ހަމްދާން ނާސިރު ކައިރިން ނިކަން އެއީ ދޮގެއްތޯ ބަޔަކު އަހާބަލާށެވެ. މި ނޫން ދުވަހެއް އޮތްކަން ހަމްދާން ހަނދާން ހުރިއްޔާ އެކަން ދޮގު ކުރަން ނުކެރޭނެއެވެ. ދެން އަވަހަށް ހަމްދާން ބޮލުގައި ބަޑި ޖައްސުވާ މިކަން ދޮގުކޮށް ޓްވީޓުކުރުވާށެވެ.

ދެން އޮތް ވާހަކައަކީ ކުރި މުޒާހަރާތަކުގެ ލައިވް ފޫޓޭޖުތަކުން މުޒާހަރާގައި ބައިވެރިވި މީހުން ފެންނާނެ ވާހަކައެވެ. ތެދެއްމެއެވެ. ވަރަށް ސާފުކޮށް އެ މަންޒަރުތައް ފެންނަން އެބަހުއްޓެވެ. ދެ ރެއަކު ތިން ރެއަކު ހީނާ މެން ނުނިކުންނަ ވާހަކައެއް ނޫނެވެ. އެންމެ ރެއަކު އަދުރޭ ހައްޔަރަށް ގެންދިޔައީމާ ބުނީ ކީކޭކަން ވެސް ތިޔަހެން ދޮގުތައް ހަނދާއިރު ނިކަން ބުނެލާނަމަދޯއެވެ.

ކުރީގެ މެމްބަރު މުހައްމަދު އިސްމާއިލް ޖާނާ މާލުން ގުރުބާން ވެގެން ކޮންމެ ރެއަކު އެތަނަށް އެއްވާ 20 އަކަށް މީހުން ގޮވައިގެން މާލޭގެ މަގުތަކުގައި އެނބުރުނު އިރު އަދުރޭ، ޝިޔާމް، ސައީދު، މުއިއްޒު، ޝުޖާއު، ނިމާލް، މުންދު، ފަޒުލް، ސަލީމްބެ، ޓޮމް، ސެމްބެ، ޣައްސާން ބައިވެރިވެފައިވަނީ ހާލަކުން ފަހަރަކުއެވެ. އެހެން އިބާރާތަކުން ބުނާނަމަ ދަމަކުން ބަޑިއެއް ޖަހާ ހެންނެވެ. އެހެން ނަމަވެސް ހައްގު ބަސް ބުނަން އަހަރުމެންނަށް އެނގޭތީ އަހަރުމެން މީގައި އާދަމް ޝަރީފުގެ ނަން ނުހިމަނަމެވެ. އެއީ އާދަމް ޝަރީފުއަކީ އެންމެ ގިނައިން ރައީސް ޔާމީން މިނިވަންކުރަން އެ މުޒާހަރާތަކުގައި ބައިވެރިންނާ އެކު ނުކުތް އެއް ލީޑަރުކަމަށް ވުމުންނެވެ.

ހީނާ އާ ތޮލާލު އާ ދެންވެސް ތިބި ބަޔަކު އަދުރޭއާއެކު ދުފާ ތަބައް ހިފައިގެން ފުރަތަމަ ފަންގި ފިލާގައި އެތެރެ ކޮއިލުގައި ޓީވީއިން ކުޅި ބަލަން ތިބިކަން ކައުންޓަރުގައި އިން އިނާ ހެކިވާނެއެވެ. މިއަދު އިނާވެސް ލިބޭ ފައިސާ ކޮޅުގެ ބޭނުމުގައި މިކަން ދޮގުކުރިނަމަވެސް މެއެވެ.

އިނާ ލައްވާ ކޮފީ ގިރުވައިގެން އޮފީހުގައި ބޮނދަ ޖަހައިގެން ވެރިން ތިބޭތީ މުޒާހަރާގައި ބައިވެރިވި އާންމު ރައްޔިތުން ކިހާ ނުރުހުމެއް ފާޅުކުރި ހެއްޔެވެ. ނާއްތާއެވެ. ޝިޒްލީންއެވެ. އަޅެ ފަހެ މިއީ ދޮގެއް ހެއްޔެވެ؟ ނާއްތަމެން ޝިޒްލީން މެންނަކީ މިކަމާ އެންމެ ގިނައިން އަހަރުމެން ލައިވް ކުރޫ އާ ވާހަކަ ދެއްކި މީހެކެވެ. މިއަދު މަގާމުގެ ދިފާއުގައި އަނގަ މަތީ ޓޭޕު އަޅައިގެން ތިއްބަސްމެއެވެ.

ސިޓީ ކައުންލިން މުއިއްޒު، މުޒާހަރާއަށް ނުކުންނަ މީހުންނަށް ވަޒީފާ ދީ ސައުދީ މެދުވެރިކޮށް މުޒާހަރާއަށް ނުނިކުންނަން ނާންގާކަމަށް ނުވާނެއެވެ. ސައުދީ ސަރ ނިކަން މިވާހަކަ ދޮގުކޮށްބަލާށެވެ.

އޮފީސް ތެރޭގައި ޖެހީ މުޅިން އެހެން ސަކަރާތެކެވެ. ހެންވޭރު ހުޅަނގަށް ނުކުތް ކެންޑިޑޭޓު އަހުމަދު އިބްރާހިމު (ކައްޕި)އަށްވެސް މިކަން ނިކަން ރަގަޅަށް އެނގޭނެއެވެ. މިއަދު ފެނަކައިގެ ޑީއެމްޑީ އަދި އޭރު ޕީއެންސީގެ ޚަޒާންދާރު އިބްރާހިމު ނާއިފަށް މިކަން ވަރަށް ސާފުކޮށް އެނގޭނެއެވެ.

އެހެންކަމުން ހީނާ ވަލީދު، ފެންނަން ހުރި މިފަދަ ކަންކަމުގައި ރޯމާ ދުވާލު ރޯދަ މަހެއްގެ ފަހު ދިހައިގައި މައިކެއް ކައިރީ ހުރެ ދޮގުތައް ފުލުފުލުން ހަދަމުން ގެންދާއިރު، ސަރުކާރު ބަންދުކޮށް ފަހު ދިހައިގެ ދަރުމަ ހޯދަނީ ތިހެން ބާއެވެ.

މުޒާހަރާގެ ބައިވެރިން ނުކުމެ ފުލުހުންގެ އަނިޔާތަކާ ކުރިމަތިލާ ހާނިއްކަވެ ވާނެ ހައެއްތި ވެ ނިމިގެން އެރެއެއްގެ މުޒާހަރާ ނިންމާލަން އޮފީސް ދޮށަށް ޖަމާވީމާ އެތެރޭގައި ތިބެފައި ނުކުމެ އަދުރޭމެން ބަހެއް ދެބަހެއް ނުބެނެއެކޭ ނޫންނެވެ. ނަމަވެސް ސާފުކޮށް ފެންނަން ހުރި ކަންކަމުގައި ތިޔަހާ ވަރަށް ދޮގު ހަދާ އޮއްބަން މަސައްކަތްކުރާކަށް ހެޔޮ ނުވާނެއެވެ.

ހީނާއެވެ. މިއީ ރޯދަ މަހެއްގެ ފަހު ދިހަޔެކެވެ. އަހަރުމެން ވެސް ތިބީ ތިބުނާ ކަންކަން ހިނގި އިރު ހަމަ ހޭގައެވެ. މަންޒަރު ވަރަށް ގާތުން ވެސް ދުށީމުއެވެ. އެހެންކަމުން ދުލުގައި ހިފައި ދަމަން ނުހަދާށެވެ.

ހީނާއެވެ. ސްޕޯކްސް ޕާސަންގެ މަގާމަކީ ދޮގު ހަދަން ލިބޭ ލައިސެންސެއް ނޫނެވެ.