މިހާތަނަށް 300 އަށްވުރެ ގިނަ އުޅަނދު ޓޯކޮށްފައިވާކަމަށް ފުލުހުން ހާމަކޮށްފިއެވެ.

އާއްމުންނަށް އުނދަނގޫވާ ގޮތަށް ބަހައްޓާފައިވާ އުޅަނދުތަކާއި ޤަވާއިދާއި ޚިލާފަށް ޕާކްކޮށްފައިވާ އުޅަންދުތައް ޓޯކުރުމުގެ މަސައްކަތުގެ ތެރެއިން ހޯމަ ދުވަހު އެކަނިވެސް 19 ވެހިކަލްއެއް ޓޯކޮށްފައިވެއެވެ.

މާރޗު މަހުގެ 31 ވަނަ ދުވަހު ފެށި މި މަސައްކަތުގެ ތެރެއިން މާލެ އަދި ހުޅުމާލެއިން ގިނަ އަދަދެއްގެ އުޅަނދުތައް ނަގާފައިވާ ކަމަށާއި އެ އުޅަނދުތައް ނައްތާލުމުގެ މަސައްކަތް ކުރިއަށްގެންދާނީ ތިލަފުއްޓަށް ގެންގޮސްގެން ކަމަށް ފުލުހުން ހާމަކޮށްފައިވެއެވެ.

ގިނަ ދުވަސްވަންދެން ބޭނުންނުކޮށް ބަހައްޓާފައި ހުންނަ އުޅަނދުތަކާ ގަވައިދާ ހިލާފަށް ޕާކުކޮށްފައި ހުންނަ އުޅަނދުތައް ނެގުމަށް ކުރަމުން އަންނަ މަސައްކަތުގެ ތެރެއިން މާލެ ސަރަހައްދުގެ މަގުތަކުގައި ބަހައްޓާފައިވާ މިފަދަ އުޅަންދުތައް ނެގުމަށް ކަމާބެހޭ އިދާރާތަކުން އަންނަނީ ގުޅިގެން މަސައްކަތް ކުރަމުންނެވެ.

ފުލުހުން ބުނެފައިވަނީ އެއްގަމު ދަތުރުފަތުރުގެ ގާނޫނުގެ 7 ވަނަ މާއްދާގެ (ނ) އަދި އެއްގަމު އުޅަނދު ޕާކުކުރުމުގެ ގަވާއިދުގެ 14 ވަނަ މާއްދާގެ (ށ) ގެ ދަށުން ފިޔަވަޅު އަޅާނެ ކަމަށެވެ.

މި ސަރުކާރުން ވަނީ ޕާކިން ބިލްޑިންތައް ހަދައި ނިމެންދެން ޕާކިން ވަޔަލޭޝަން ސްޓިކާ ނުޖަހަން ނިންމައިފައެވެ. ނަމަވެސް، އޭގެ ފަހުން މާލޭގެ މަގުތައް، ހާއްސަކޮށް ބޮޑުތަކުރުފާނު މަގުގައި ޕާކިންގެ މައްސަލަ ވަނީ ބޮއްސުންލައިގެން ގޮސްފަ އެވެ. ބޮޑުތަކުރުފާނު މަގަކީ ޕާކް ކުރުން މަނާ މަގެއް ނަމަވެސް، އެ މަގުގެ ދެ ފަރާތުގައި ވެސް ބޮޑެތި ވެހިކަލްތައް ޕާކް ކޮށްފައިވާއިރު، މަގުގައި ދުއްވާ މީހުންނަށް ވެސް އޭގެ ސަބަބުން ވަނީ ދަތިވެފައެވެ.