މާލެ ސިޓީގެ މަގުތަކުގައި ގަވާއިދާ ހިލާފަށް ޕާކުކޮށްފައި އޮތް 48 ވެހިކަލް ފުލުހުން ބުރާސްފަތި ދުވަހުގެރޭ ޓޯކޮށްފިއެވެ.

ފުލުހުން ބުނީ މާލޭ ސިޓީގެ މަގުތަކުގައި، ޤަވައިދާ ޚިލާފަށް ޕާކްކޮށްފައިވާ އުޅަނދުތައް ނެގުމަށް ކުރާ މަސައްކަތުގެތެރެއިން، އަމީނީމަގުން 15 އުޅަނދެއް ބުރާސްފަތި ދުވަހުގެރޭ ޓޯ ކުރެވިފައިވާ ކަމަށެވެ.

މި ރޯދަމަހު ސަރުކާރުން ދަނީ އުޅަނދުތައް ޓޯކުރުމުގެ މަސައްކަތް ކުރަމުންނެވެ. ފުލުހުން އެކްސްގައި ކުރި ޕޯސްޓެއްގައި ބުނީ ބުރާސްފަތި ދުވަހުގެރޭ އެކަނި ވެސް މާލޭ ސިޓީން 48 އުޅަނދު ޓޯކޮށްފައިވާ ކަމަށެވެ. އަދި ބުރާސްފަތި ދުވަހު ފުލުހުން ބުނެފައިވަނީ ބުދަ ދުވަހުގެރޭ 40 އުޅަނދު ޓޯކޮށްފައިވާ ކަމަށެވެ. 2 ދުވަސްތެރޭ ފުލުހުން ޓޯކޮށްފައިވާ ވެހިކަލްތަކުގެ އަދަދު މިވަނީ 88ށް އަރާފައެވެ.

ފުލުހުން ބުނެފައިވަނީ އެއްގަމު ދަތުރުފަތުރުގެ ގާނޫނުގެ 7 ވަނަ މާއްދާގެ (ނ) އަދި އެއްގަމު އުޅަނދު ޕާކުކުރުމުގެ ގަވާއިދުގެ 14 ވަނަ މާއްދާގެ (ށ) ގެ ދަށުން ފިޔަވަޅު އަޅާނެ ކަމަށެވެ.