2023 ވަނަ އަަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ފަލަސްތީނުގެ މައުސޫމު ރައްޔިތުންނަށް ހަމަލާދެމުން އަންނަތާ 100 ދުވަސް ވެއްޖެއެވެ.

ފާއިތުވެ ދިޔަ 100 ދުވަހުގެ ދިގު މުއްދަތަަށް ބަލާއިރު ހަމަލާތަކުގައި މިހާތަނަށް ފަލަސްތީނުގެ 23،000 ރައްޔިތުން ވަނީ ޝަހީދުކޮށްލާފައިއެވެ. އަދި ހަމަލާތަކުގައި 60،000 ބަޔަކަށް ވަނީ އެކި ވަރު ޒަޚަމްތައް ލިބިފައިވެއެވެ.

އިސްރާއީލުން ވަނީ ފަލަސްތީނުގެ ރައްޔިތުންނަށް ކަރަންޓާއި، ފެން އަދި ކާބޯތަކީގެ ހިދުމަތް ކަނޑާލާފައިއެވެ.

އެ ގައުމުގެ ހޮސްޕިޓާތަކާއި މަދަރުސާ އަދި ކޮލެޖު، ޔުނިވާސިޓީތަކާއި އިމާރާތްތަށް ސުންނާފަތިކޮށްލާފައިވާއިރު، މި މަންޒަރުތަށް ދުނިޔޭގެ ހުރިހާ ކަންކޮޅުތަކަށް ފޯރުކޮށްދޭ ނޫސްވެރިންނަށްވެސް އިސްރާއީލުގެ ސިފައިން ދަނީ ހަމަލާދެމުުންނެވެ.

2.2 މިލިއަން ފަލަސްތީނޖ ރައްޔިތުން ދަނީ ބަނޑަށްޖެހި ފެނާއި ކާބޯތަކެޗަށް އެދި އާދޭސް ކުރަމުންނެވެ. ނަމަވެސް މި އާދޭސްތައް ފޯރަނީ ބީރު ކަންފަތްތަކަކަށެވެ.

ހަމަލާތަކަށް ހުއްޓުމެއް ނުވަތަ މަޑުޖެހުމެއްވެސް އައިސްފައިނުވާއިރު މި ހަމަލާތަކުގައި އެތައް ބައެއް ވަނީ ވަންނާނެ ގެދޮރު ނެތުމުން މަގުމަތިވެފައިއެވެ.

ޔުނައިޓެޑު ނޭޝަންސް- އދ ގެ ގޮވާލުންތަކަށްެވެސް އިސްރާއީލުން އިޖާބަނުދޭކަން ފާހަގަކޮށްލަންޖެހެއެވެ.

އަދި އެމީހުންގެ މައިގަނޑު މަގްސަދަކީ "ފަލަސްތީނުގައި ދިރިއުޅޭ ޖަނަވާރުން" ދުނިޔޭން ނެތިކޮށްލަން ކަމަށްވެސް އިސްރާއީލުގެ އަސްކަރިއްޔާ އާއި ސަަރުކާރުން ވަނީ ފާޅުކަން ބޮޑުގޮތެއްގައި ހާމަކޮށްފައިއެވެ.

ނަމަވެސް ފަލަސްތީނުގެ މައުސޫމް ރައްޔިތުން ސަލާމަތްކުރުމަށް ދުނިޔޭގެ އެކި ކަންކޮޅުތަކުން އަޑު އުފުލަމުން ދާކަން ފާހަގަކޮށްލެވެއެވެ.