ޕީޕަލްސް ނޭޝަނަލް ފްރޮންޓް (ޕީއެންއެފް) އުފެއްދުމަށް ބާއްވާ ޖަލްސާ އޮންނާނެ ތާރީހު ވަރަށް އަވަހަށް އިއުލާން ކުރާނެ ކަމަށް އެ ޕާޓީން ބުނެފިއެވެ.

އިލެކްޝަންސް ކޮމިޝަން (އީސީ) ން ސިޔާސީ ޕާޓީގެ ޤާނޫނުގެ 12 ވަނަ މާއްދާގައިވާ ގޮތުގެ މަތިން ޕީއެންއެފް ގެ ނަމުގައި ސިޔާސީ ޕާޓީ އެއް އުފެއްދުމަށް ބޭނުންވާ 3000 މީހުން ގެ ސޮއި ކޮމިޝަނަށް ހުށަހަޅާފައިވާތީ ވަނީ އެ ޕާޓީގެ މުއައްސިސް އަދި ރައީސް އަބްދުﷲ ޔާމީން އަބްދުލްގައްޔޫމްގެ ދޮށީ ދަރިކަލުން ޒެއިން ޔާމީން އަބްދުލްގައްޔޫމަށް ޕާޓީ އުފެއްދުމުގެ ޖަލްސާ ބޭއްވުމަށްޓަކައި ހުއްދަ ދީފައެވެ.

މިކަމާ ގުޅިގެން "ފްރޮންޓް" އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީއެންއެފް ގެ ފަރާތުން ވާހަކަދައްކަވަމުން އެ ޕާޓީ އުފެއްދުމުގައި އިސްކޮށް އުޅުއްވާ މުހައްމަދު މަލީހް ޖަމާލް ވިދާޅުވީ މިދިޔަ މަރުހަލާގައި އުންމީދުކޮށްގެން ތިބީ، ޕީއެންއެފްގެ އެންމެ ބޮޑު ރައުސްމާލު ރައީސް ޔާމީންގެ މިނިވަންކަމަށް އެދި އެދިކަމަށެވެ.

މަލީހް ވިދާޅުވީ އަދުގެ ސަރުކާރުން ރައީސް ޔާމީން މިނިވަންކުރައްވަން ކުރާ އެއްވެސް މަސައްކަތެއް ކުރާ މަންޒަރު ނުފެންނަކަމަށެވެ.

ޕާޓީ އުފެއްދުމުގެ ސޮއި ހޯދުމާއި އަދި މެމްބަރޝިޕް ކަންކަން ކުރިޔަށް ގެންދިޔުމުގައި ކުރެވުނު ތަޖުރިބާގައި އީސީގެ މެމްބަރުންނަށާ އީސީގެ ހުރިހާ މުވައްޒަފުންނަށް މަލީހް ވަނީ ރައީސް ޔާމީންގެ ނަންފުޅުގައި އަދި ޕާޓީގެ ފަރާތުން ޝުކުރު އަދާކޮށްފައެވެ.

އިތުރަށް މަލީހް ވިދާޅުވީ ޕީއެންއެފް ވެގެންދާނީ ރައްޖޭގެ އެންމެ ބޮޑު ސިޔާސީ ޕާޓީއަށް ކަމަށެވެ.

ދިވެހި ގައުމީ މަސްލަހަތު ހިމާޔަތް ކުރާނެ ކަމަށާއި، ދިވެހި ގައުމިއްޔަތު އެންމެ ބޮޑަށް ހިމާޔަތް ކުރާނެ ޕާޓީ ކަމަށާއި، އިސްލާމްދީން ކުރި އަރުވާނެ ޕާޓީއަށް ޕީއެންއެފް ވެގެންދާނެ ކަމަށް ޕާޓީގެ ފަރާތުން ވާހަކަދައްކަވަމުން މަލީހް ވަނީ ވިދާޅުވެފައެވެ.

ޕާޓީ އުފެއްދުމަށް ބާއްވާ ޖަލްސާ އޮންނާނެ ތާރީހެެއް ވީ އެންމެ އަވަހަކަށް އިއުލާން ކުރެވިގެންދާނެ ކަމަށް މަލީހް ވަނީ ވިދާޅުވެފައެެވެ.