މާލެ ސިޓީގެ ހަތަރު ސަރަހައްދެއްގައި ފިތުރު އީދު ނަމާދު ބޮޑު ޖަމާއަތުގައި ކުރާނެ ކަމަށް އިސްލާމިކް މިނިސްޓްރީން ހާމަކޮށްފިއެވެ.

އެ މިނިސްޓްރީއިން ހާމަކޮށްފައިވާ ގޮތުގައި، 1445 ވަނަ އަހަރު މާލެސިޓީގައި ފިތުރު އީދުނަމާދު ކުރުމަށް ހަމަޖެހިފައިވަނީ 4 މައިދާނުގެ އިތުރުން 22 މިސްކިތެއްގައި ކަމަށެވެ.

އެގޮތުން، މާލޭގައި ބޮޑު ޖަމާއަތުގައި އީދު ނަމާދު ކުރުމަށް މާފަންނު ސްޓޭޑިއަމް ގައި ހަމަޖެހިފައިވާއިރު، ވިލިމާލޭގައި ބޮޑު ޖަމާއަތް އޮންނާނީ ވިލިނގިލި ބޯޅަދަނޑުގައެވެ.

މީގެ އިތުރުން ހުޅުމާލެ ފޭސް 1 ގައި ބޮޑު ޖަމާއަތް ބާއްވަން ނިންމާފައިވަނީ ސިންތެޓިކް ޓެރެކް ސަރަހައްދުގައެވެ. އަދި ހުޅުމާލެ ފޭސް-2 ގެ ބޮޑު ޖަމާއަތް ބާއްވަން ނިންމާފައިވަނީ ކްރިކެޓް ސްޓޭޑިއަމް ސަރަހައްދުގައެވެ.

އިސްލާމިކް މިނިސްޓްރީން ބުނީ މޫސުން ތަން ނުދިނުމުގެ ސަބަބުން މައިދާންތަކުގައި ކުރުމަށް ހަމަޖެހިފައިވާ ބޮޑު ޖަމާއަތުގެ އީދު ނަމާދު ކެންސަލް ކުރަން ޖެހިއްޖެނަމަ މާލެ ސިޓީގައި އީދު ނަމާދު ކުރާނީ މާލޭގައި ހުކުރު ކުރާ ހުރިހާ މިސްކިތެއްގައި ކަމަށެވެ.

މިއަހަރު ފިތުރު އީދު ނަމާދުކުރުމަށް ނިންމާފައިވަނީ ހެނދުނު 7:00 ގައެވެ.