އިސްރާއީލުން ޣައްޒާއަށް އިންސާނީ އެހީ ވެއްދުމަށް ވަގުތީގޮތުން ދެ މަގެއް ހުޅުވާލަން ނިންމާފައިވާކަން ހާމަކޮށްފިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން މިކަން ހާމަކޮށްފައި މިވަނީ ޣައްޒާގައި ހިނގަމުންދާ ހަނގުރާމައަށް ކުރިއަށް އޮތް ތަނުގައި އެމެރިކާއިން ދޭ އެއްބާރުލުން ބިނާވެފައިވަނީ އާންމުންނާއި އެހީތެރިކަން ފޯރުކޮށްދޭ މަސައްކަތްތެރިންގެ ރައްކާތެރިކަމަށް އިސްރާއީލުން އިތުރު ފިޔަވަޅުތަކެއް އެޅުމުގެ މައްޗަށް ކަމަށް ރައީސް ޖޯ ބައިޑަން ވިދާޅުވިތާ ކުޑަ އިރުކޮޅެއް ފަހުންނެވެ.

އިސްރާއީލުން ބުނީ ޣައްޒާއަށް އިންސާނީ އެހީތެރިކަން ފޯރުކޮށްދިނުން އިތުރުކުރުމަށް ފިޔަވަޅުތައް އަޅަމުން އަންނަ ކަމަށާއި އޭގެ ތެރޭގައި ޣައްޒާގެ އުތުރުގެ ސަރަހައްދަށް ދަތުރުކުރާ މުހިންމު ބޯޑަރު އަލުން ހުޅުވުން ހިމެނޭ ކަމަށެވެ.

ނަތަންޔާހޫގެ އޮފީހުން ބުނީ ޣައްޒާއަށް މީހުން ވަނުމާއި ބޭރަށް ދިއުމަށް ހަމަޖެހިފައިވާ ހަމައެކަނި ޕެސެންޖަރު ޓާމިނަލްގެ ގޮތުގައި އެތައް އަހަރެއް ވަންދެން މަސައްކަތް ކުރަމުން އައި އެރޭޒް ކްރޮސިން ވަގުތީ ގޮތުން ހުޅުވާނެ ކަމަށެވެ. އަދި އިސްރާއީލުން އެގައުމުގެ އަޝްދޯދު ބަނދަރު ބޭނުންކޮށްގެން ޣައްޒާއަށް ދަތުރުކުރާ އެހީގެ ޝިޕްމަންޓްތައް ޕްރޮސެސްކުރުމުގެ ހުއްދަ ދޭނެ ކަމަށާއި އެހެން ލޭންޑް ކްރޮސިންއެއް މެދުވެރިކޮށް އުރުދުންގެ އެހީގެ ޝިޕްމަންޓްތައް އިތުރުކުރުމުގެ ފުރުސަތު ދޭނެ ކަމަށް ވެސް އެ ބަޔާނުގައި ވެއެވެ. އެ އިއުލާނުގައި އެހީގެ ސާމާނު އެތެރެއަށް ވަންނާނެ މިންވަރާއި ބާވަތްތަކުގެ ތަފްސީލެއް ހާމަކޮށްފައެއް ނުވެއެވެ.

ވައިޓް ހައުސްގެ ނޭޝަނަލް ސެކިއުރިޓީ ކައުންސިލްގެ ތަރުޖަމާނު އެޑްރިއެން ވޮޓްސަން ވަނީ ނަތަންޔާހޫގެ ފިޔަވަޅުތަކަށް މަރުހަބާ ވިދާޅުވެ، އެ ޕްލޭން "މިހާރުން މިހާރަށް ހަލުވިކަމާއެކު ތަންފީޒު ކުރަން ޖެހޭ" ކަމަށް ވިދާޅުވެފަ އެވެ.

އެހީ ފޯރުކޮށްދިނުމަށް އާ ދެ މަގެއް ހުޅުވާލަން ނިންމީ މިދިޔަ ބުރާސްފަތި ދުވަހު ބައިޑަން ނަތަންޔާހޫއަށް ވަރުގަދަ އިންޒާރެއް ދީފައި ވަނިކޮށެވެ.

އިސްރާއީލުން ޣައްޒާއަށް ދިން ވައިގެ ހަމަލާތަކުގައި ކާބޯތަކެތީގެ އެހީ ފޯރުކޮށްދިނުމަށް މަސައްކަތްކުރާ ހަތް މީހަކު މަރުވިތާ ކުޑަ ދުވަސްކޮޅެއް ފަހުން ބައިޑަން އާއި ނަތަންޔާހޫ ގާތްގަނޑަކަށް 30 މިނެޓު ވަންދެން ފޯނުން ގުޅުއްވާ ވާހަކަ ދައްކަވާފައިވާއިރު، އަހަމަލާއާއި ގުޅިގެން ދެ ލީޑަރުންގެ ގުޅުން ވަނީ ވަރަށްބޮޑަށް ހީނަރުވެފައެވެ.