ލ. ފޮނަދޫ މެދު އަވަށުގައި އަބްދުއްރަހީމްގެ އާއިލާއިން ހިންގާ އަރާފާ ޓްރޭޑާސްއިން އެ ދާއިރާގައި ހިމެނޭ ރަށްރަށުގެ ގޭގެއަށް ބެހި ތެލި ސެޓުތައް އަނބުރާ ފޮނުވަން ފަށައިފިކަން ހާމަވެއްޖެއެވެ.

މައުލޫމާތު ލިބިފައިވާ ގޮތުގައި އެ ތެލި ސެޓުތައް އަނބުރާ ފޮނުވަން ފަށާފައިވަނީ އެއީ ރިޝްވަތުގެ ގޮތުގައި ބެހި ސާމާނުކަން ރައްޔިތުންނަށް އެނގުމުންނެވެ.

އެ ދާއިރާގެ ބައެއް ރައްޔިތުންނާ ހަވާލާދީ "އަދަދު" ނޫހުގައި ރިޕޯޓުކޮށްފައިވާ ގޮތުގައި ތެލި ސެޓު ހިފައިގެން ގޭގެއަށްދާ އެޖެންޓު ތެލި ސެޓު ހަދިޔާ ކުރުމަށް ފަހު ނިކުންނަން ދަމުން އަތުން އިޝާރާތްކޮށް އަދުރޭގެ ކެންޑިޑޭޓު ނަމްބަރު ދައްކާ، އަދުރޭއަށް ވޯޓު ދިނުމަށް ބުނަމުންދާ ކަމަށެވެ.

އަދުރޭ މި ފަހަރުގެ މަޖިލީހުގައި ވާދަ ކުރާ ފޮނަދޫ ދާއިރާގައި ހިމެނޭ، ފޮނަދޫ އާއި މާމެންދޫގެ ގޭގެއަށް ހަދިޔާ ކުރަންފެށި ތެލިސެޓުތަކަކީ އަރާފާ ޓްރޭޑާސްގެ ފަރާތުން ހަދިޔާ ކުރާ ތެލި ސެޓު ތަކެކެވެ. އެގޮތުން އެ ތެލި ސެޓުގެ ބޭރުގައި "އަރަފާ ޓްރޭޑާސްގެ ހެޔޮ އެދުން ތަކާއެކު" މިހެން ލިޔެފައިވާއިރު، އަރަފާ ޓްރޭޑާސްއަކީ އަބްދުއްރަހީމްގެ ގެ، "އަރާއިރު"އަށް ރެޖިސްޓަރީ ކޮށްފައިވާ ވައިޓް ލިންކްސް ޕްރައިވެޓް ލިމިޓެޑުގެ ދަށުން ހިންގާ ފިހާރައެއް ކަން ފާހަގަކޮށްލެވެއެވެ.

ވައިޓް ލިންކްސް ޕވޓ. ލމޓ.ގެ މެނޭޖިން ޑިރެކްޓަރަކީ އަބްދުއްރަހީމްގެ އަންހެން ދަރިފުޅު ފާތިމަތު ސޮބާހާ އެވެ. އެ ކުންފުނީގެ ޑިރެކްޓަރަކީ އަދުރޭގެ އަނބިމީހާ ދިޔާނާ ހުސެއިންއެވެ.

މި ފަދަ ކަމެއް ފެންމަތިވެފައިވާއިރު މަޖިލިސް އިންތިހާބާ ދިމާކޮށް ސަރުކާރު ހިންގާ ޕާޓީއިން ވެސް ކޮރަޕްޝަންގެ އަމަލުތަކާ ދައުލަތުގެ މުދާ ނަހަމަ ގޮތުގައި ބޭނުންކޮށް އިންތިހާބަށް ކެމްޕެއިންކުރަމުން ގެންދާތީ އެކަން ހުއްޓާލުމަށް ޓްރާންސްޕޭރެންސީ މޯލްޑިވްސްއިން އަންގާފައިވެއެވެ.