މާރިޗު 15 ގެ ކުރިން އިންޑިއާ ސިފައިން ބާލަން ދިވެހި ސަރުކާރުން އިންޑީއާ ސަރުކާރުގައި އެދިފައިވާނެ ކަމަށް ރައީސް އޮފީހުން ހާމަކޮށްފިއެވެ.
ވަޒީރުންގެ މަޖިލީހުން ނިންމަވާފައިވާ ނިންމުންތަކާ ގުޅޭ މައުލޫމާތު ނޫސްވެރިންނާ ހިއްސާ ކުރުމަށް ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ވާހަކަފުޅުދައްކަވަމުން ވިދާޅުވީ، މިހާތަނަށް އިންޑިއާ ސިފައިން ދިވެހިރާއްޖެއިން އަނބުރާ ފޮނުވާލުމާ ގުޅިގެން 11 މަޝަވަރާގެ ބައްދަލުވުމެއް ކުރިއަށް ގެންގޮސްފައިވާނެކަމަށެވެ. އަދި އާދިއްތަ ދުވަހު 12 ވަނަ ބައްދަލުވުން ވަނީ ކުރިއަށް ގޮސްފައިކަމަށްވެސް އަމަނިކުފާނު ވިދާޅުވިއެވެ.
އާދިއްތަ ދުވަހު ކުރިއަށް ދިޔަ ބައްދަލުވުމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައިވެރިވެވަަޑައިގެންފައި ވާއިރު އެމަނިކުފާނާއި އެކު އިންޑިއާގެ ސަފީރާއި ޖޮއިންޓް ސެކްޓްރީއާއި އިންޑިއާގެ އިސް ފަރާތްތައް ބައިވެރިވެވަޑައިގަންނަވާފައިވެއެވެ.
މި ބައްދަލު ވުމުގައި ރައީސް ވަނީ ރާއްޖޭގައި ގާއިމުވެ ތިބި އިންޑިއާ ސިފައިން އަނބުރާ ގެންދިއުމަށް އެދިލައްވާފައިކަމަށްވެސް ނާޒިމް ވަނީ ހާމަކުރައްވާފައިއެވެ.
މިވަގުތު ރާއްޖޭގައި ތިބި އިންޑިއާ ސިފައިންގެ ޖުމްލަ އަދަދަކީ 88 ކަމަށް ސަރުކާރުން ވަނީ ހާމަކޮށްފައިއެވެ.
ރާއްޖޭގައި ޑޯނިއާ އޮޕަރޭޓް ކުރުމަށް އިންޑީއާގެ ބައެއް ސިފައިން ދިވެހި ރާއްޖޭގައި ތިބިކަމުގައި ވީނަމަވެސް އެމީހުން ވެސް ރާއްޖެއިން އަނބުރާ އިންޑިއާއަށް ދިޔުމަށް ސަރުކާރުން އެދޭނެ ކަމަށާއި، ސިފައިންގެ ބަދަލުގައި ޑޯނިއާ އޮޕަރޭޓުކުރުމަށް، ސިވިލް މީހުން ތިބުން އެއީ މައްސަލައެއް ނޫން ކަމަށް ވެސް ނާޒިމް ވިދާޅުވިއެވެ.
