ސަރުކާރުން އެއްވެސް މަޝްރޫޢުއެއް ނުހުއްޓާނެ ކަމަށާއި ހުއްޓާފައި ވެސް ނުވާނެ ކަމަށް ތަކުރާރުކޮށް އަންނަނީ ބުނަމުންނެވެ. ހާއްސަކޮށް ފ.މަގޫދޫ އެއާޕޯޓްގެ މަސައްކަތް ހުއްޓާލުމަށްފަހު، ރައީސް ޑރ.މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާ ވާދަކުރައްވާ ދާއިރާގައި އެއާޕޯޓް އަޅަން ނިންމެވުމާއި ގުޅުވާ ދައްކާ ވާހަކަތައް ދޮގުކޮށް ރައީސް މުއިއްޒުވެސް، ސަރުކާރުގެ އެހެން ފަރާތްތަކުން ވެސް ބުނަމުން އަންނަނީ މަޝްރޫޢުތައްް ހުއްޓާފައި ނުވާނެކަމަށެވެ.

ކަން މިހެން ހުރުމާއެކު، ރައްޔިތުންނާ ހަމަޔަށް އަޅުގަނޑުމެން ގެނެސްދޭން ބޭނުންވީ ހަގީގަތެވެ. މަސައްކަތް ހުއްޓާލާފައިނުވާނެ ކަމަށް ބުނާ ފ.މަގޫދޫ އެއާޕޯޓް ގެ ހާލަތު މިހާރު އޮތް ގޮތް ފެނިފައި ސަރުކާރުން އެ ދައްކާ ވާހަކައަކަށް އިތުބާރުކޮށް ޔަގީން ކުރާނީ ދެލޮލުގައި ކަނު ބަނދެގެން ތިބޭ ދެތިން މީހުން އެކަންޏެވެ

މަންޒަރު ވަރަށް ސާފެވެ. އެއާޕޯޓްގެ މަސައްކަތް ކުރަމުން އަންނަނީ ސަރުކާރުގެ ކުންފުނި އެމްޓީސީސީން ނެވެ. އެއާޕޯޓްގެ މަސައްކަތް ހުއްޓާލުމާއި ގުޅިގެން މަގޫދޫގެ ރައްޔިތުން މުޒާހަރާކުރާތީ، އެމްޓީސީސީން ބުނީ މަސައްކަތް ހުއްޓާލާފައިނުވާނެ ކަމަށެވެ. 200 އަށްވުރެ ގިނަ މުވައްޒަފުން މަސައްކަތް ކުރަން ހަމަޖައްސާފައިވާއިރު އެންމެ މުވައްޒަފަކު ވެސް މަސައްކަތައް ނުދާކަމަށް މަގޫދޫގެ ކައުންސިލުން ވެސް ބުނެއެވެ. ކަން މިހެން ހުރުމުން ދޭހަވަނީ އެމްޓީސީސީގެ މިބުނާ 200 މުވައްޒަފުންނަށް ސަރުކާރުން ޕްރެޝަރުކޮށްގެން މަސައްކަތްތައް ނުނެރެނީކަމެވެ.

އެމްޓީސީސީން ވެސް އެއާޕޯޓްގެ މަސައްކަތް ކުރިޔަށް ދާކަމަށް ބުނިއިރު ސަރުކާރު ހިންގާ ޕާޓީގެ ތަރުޖަމާނު ދައްކަވަނީ ހެއްވާ ވާހަކައެކެވެ. އާދެ، ހީނާ ވިދާޅުވާގޮތުން ނަމަ އެެއާޕޯޓް އެޅުން ހުއްޓާލީ ރައްޔިތުންނަށްޓަކާއެވެ. އަހަރެމެން ބޮޑުވީ އަބަދުވެސް ރައްޔިތުންނަށްޓަކައި މީހުން ކަންކަން ކޮށްދެއްވާ ވާހަކަ އަޑުއަހައިގެންނެވެ. ރައްޔިތުންނަށްޓަކައި ކަމެެއް ހުއްޓާލި ވާހަކަ އަޑު އިވުނު މިއީ ފުރަތަމަ ފަހަރެވެ. ދެން ހީނާ ދައްކާ ވާހަކައިގައި މިހާރު އެއްވެސް ބުރަދަނެއް ނުހުރެއެވެ. ނަމަވެސް އަޅުގަނޑު ބުނަން މިއުޅޭ ވާހަކައަކީ ސަރުކާރުގެ ފަރާތުން ޖަވާބު ދެއްވި ދެ މީހަކު ދައްކާ ވާހަކަތައް ދިމާ ނުވާ ވާހަކައެވެ. އެކަކު ހުއްޓާފައި ނުވާނެ ކަމަށް ބުނާއިރު އަނެެއްކަކު މި ބުނަނީ ހުއްޓާލާފައި ވާނެ ކަމަށެވެ.

ކޮންމެ ގޮތަކަށް ވާހަކަތައް ހުއްޓަސް މަގޫދޫ އެއާޕޯޓްގެ މަަސައްކަތެއް ކުރިޔަަކަށް ނުދެއެވެ. ނިލަންދޫގައި އެއާޕޯޓް އަޅަން ނިންމެވި ނިންމުމަކީ ވަރަށްވެސް ބޯ ގޯސް ނިންމެވުމެކެވެ. މަގޫދޫ އާއި ނިލަންދޫ އެހާ ކައިރީގައި އޮންނަ އިރު، މަގޫދޫ އެއާޕޯޓަށް ހަމަގައިމުވެސް ނިލަންދޫގެ ރައްޔިތުންނަށް ދާކަށް އުނދަގުލެެއް ނުވާނެއެވެ.

ހިނގަ ހިނގާ އޮތް މަޝްރޫއުއެއްގައި ފުލުސްޓޮޕް މި ޖެހީ ކޮއްކޯފުޅަށް ނިލަންދޫ އިން ވޯޓު ހޯދައިދިނުމުގެ ބޭނުމުގައެވެ. މިކަން އެންމެ ބޮޑަށް ޔަގީންވީ ނިލަންދޫގެ މަޝްހޫރު"ހަލީލް" އާއިލާ އޮތްގޮތައް ސިޔާސީ މަގާމްތަކަށްލުމުންނެވެ. އަދި ހާއްސަކޮށް މިދޭތެރޭއިން ސޯޝަލް މީޑިޔާގައި ދައުރުވި، ނިލަންދޫގެ ހަލީލް އާއިލާ އަށް ނިސްބަތްވާ ހެލްތް މިނިސްޓާރ އަބްދުﷲ ހަލީލް ވީޑިޔޯގައި ދެއްކެވި ވާހަކަތަކުންނެވެ. އެގޮތުން އެހެން ރަށްރަށަށް ހިދުމަތް ކުރުމުގައި ނުބަލާވަރު ނިލަންދޫ އަށް ބަލާނެކަމަށާ ރައީސް މުއިއްޒަށް ދޯކާ ނުދޭން ހަލީލް ވަނީ ވީޑިޔޯގައި ވިދާޅުވެފައެވެ. ދޯކާ ގެ މާނައަކީ ސައުދާ ނޫން އެހެން މީހަކަށް ވޯޓު ނުދޭށޭއެވެ. ސައުދާ ނުހޮވިއްޖާ ނިލަންދޫގެ އެއާޕޯޓް ނޭޅޭނެކަމަށް ހަލީލްގެ ވާހަކަތަކުން ވަނީ ދޭހަވެފައެވެ.

މިއީ ކަންކަން ހުރިގޮތެވެ. މަގޫދޫގެ އެއާޕޯޓްގެ މަސައްކަތް އޮތީ ހުއްޓިފައެވެ. މިކަމުގެ ހެކި އަޅުގަނޑުމެންގެ އަތުގައި ހުރި އިރު ސަރުކާރުން ދެން ވެސް ދޮގު ހެދުން ހުއްޓާލަން ވެެއްޖެނޫންހެއްޔެވެ؟