އެއްވެސް މަޝްރޫޢުއެއް ހުއްޓާލަފައި ނުވާނެކަމަށާއި އެހެން އެކިޔަނީ އިދިކޮޅުކަަމަށް ރައީސް މުއިއްޒު ވިދާޅުވުމުން، އެމަނިކުފާނު އެ ހައްދަވަނީ ދޮގުކަމަށް މަގޫދޫގެ ރައްޔިތުން ބުނެފިއެވެ.

އާންމުންނަށް ރައީސަށް ސުވާލުކުރެވޭ ގޮތަށް ރައީސް އޮފީހުން ސިލްސިލާކޮށް ކުރިއަށް ގެންދާ ''ރައީސްގެ ޖަވާބު'' ގެ ހޮނިހުރު ދުވަހުގެ ސެގްމެންޓުގައި އާންމުންގެ މީހަކު ވަނީ، ކުރީ ސަރުކާރުން ފަށާފައިވާ މަޝްރޫއުތައް މި ސަރުކާރުން ހުއްޓާލާފައިވާ ކަމަށް ބުނެ އިދިކޮޅު ފަރާތްތަކުން ދައްކަމުންދާ ވާހަކަތަކާ ގުޅޭ ގޮތުން ސުވާލުކޮށްފައެވެ.

އެމީހާ އަށް ރައްދު ދެއްވަމުން ރައީސް މުއިއްޒު ވިދާޅުވީ ކުރީ ސަރުކާރުން މަޝްރޫޢުތައް ހުއްޓާލާފައި ވަނިކޮށް އެމަނިކުފާނު ވެރިކަމަށް އައުމަށްފަހު މަޝްރޫޢުތައް ކުރިޔަށް ގެންދާން ފައްޓާފައިވާނެކަމަށެވެ. ރައީސް ގެ ވާހަކަތައް މިފަދައިން ހުރި ނަމަވެސް ދާދި ފަހުން މި ސަރުކާރުން ވަނީ ފ.މަގޫދޫގައި އަޅަން ފަށާފައިވާ އެއާޕޯޓްގެ މަސައްކަތް ހުއްޓާލާފައެވެ. މިކަން ކޮށްފައިވަނީ އެ އަތޮޅުގެ ނިލަންދޫ ދާއިރާގެ ގޮނޑިއަށް ރައީސް ގެ ކޮއްކޯފުޅު ވާދަކުރައްވާތީ ނިލަންދޫގައި އެއާޕޯޓް އެޅުމަށްޓަކައެެވެ.

އެ ރަށުގެ ކައުންސިލުން ވެސް ވަނީ ޗެނަލް 13 އަށް މިކަން ކަށަވަރުކޮށްދެއްވާފައެވެ. އެގޮތުން ކައުންސިލުން ބުނީ 200 އަށް ވުރެ ގިނަ މުވައްޒަފުން އެއާޕޯޓް ހެދުމަށްޓަކައި މަސައްކަތް ކުރާއިރު، މަޝްރޫއު ހުއްޓުނު ފަހުން އެމީހުން މަސައްކަތް ނުކުރާކަމަށެވެ.

ރައީސް މުއިއްޒު އެއްވެސް މަޝްރޫޢުއެއް ހުއްޓައިގެން ނުއުޅުއްވާކަމަށް ވިދާޅުވުމުން މި ޗެނެލުން ވަނީ މަގޫދޫގެ ބައެއް ރައްޔިތުންނާ މިކަމާ ބެހޭގޮތުން ސުވާލުކޮށްފައެވެ. ރައްޔިތުން ބުނާގޮތުން ރައީސް އެ ހައްދަވަނީ ސީދާ ދޮގެކެވެ. މަޝްރޫއުތައް ހުއްޓާނުލާކަމަށް ރައީސް ކިތަންމެ ވަރަކަށް ކީ ކަމުގައި ވީ ނަމަވެސް މަގޫދޫ އެއާޕޯޓްގެ މަސައްކަތް ކުރިޔަށް ނުދާކަމަށްވެސް އެ ރައްޔިތުން ވަނީ މައުލޫމާތު ދީފައެވެ.

އެ ރަށުގެ އެއާޕޯޓް މަސައްކަތް ހުއްޓާލުމާ ގުޅިގެން ސިލްސިލާ ގޮތެއްގައި އެ ރަށުގައި އަންނަނީ އިހުތިޖާޖްތައްވެސް ކުރިޔަށް ގެންދަމުންނެވެ.