ދިވެހި ސަރުކާރު ބަދަލު ކުރުމަށްޓަކައި އިންޑިއާއިން ސިފައިން ފޮނުވަން އިންޑިއާގެ ވެރިކަން ކުރާ ޕާޓީ ބީޖޭޕީއަށް ނިސްބަތްވާ ގާނޫނު ހަދާ މަޖިލީހުގެ ކުރީގެ މެންބަރެއް ކަމަށްވާ ސުބްރަމާނިއަން ސްވާމީ ގޮވާލައިފިއެވެ.

ސުބްރަމާނިއަން އެކްސްގައި ކުރި ޕޯސްޓްގައި ބުނެފައިވަނީ ރައީސް ޑރ. މުއިއްޒު ޗައިނާއަށް ކުރެއްވި ރަސްމީ ދަތުރުފުޅަށް ފަހު އިންޑިއާގެ ބޮޑުވަޒީރަށް މާރިޗް 15 ގެ ކުރިން ރާއްޖޭގައި ތިބި އިންޑިއާ ސިފައިން ފޭބުމަށް މުހުލަތެއް ދީފައިވާ ކަމަށެވެ. އަދި މި މުހުލަތުގެ ތެރޭގައި އިންޑިއާ ސިފައިން ނުފައިބައިފިނަމަ ފިޔަވަޅުތަކެއް އަޅާނެ ކަމުގެ އިންޒާރުވެސް ދީފައިވާ ކަމަށް އޭނާގެ ޓްވީޓްގައި ވަނީ ބުނެފައެވެ.

އަދި މި ވެރިކަން ބަދަލު ކުރުމަށްޓަކައި އިންޑިޔާގެ ސިފައިން ގެންނަން ޖެހޭނެ ކަމަށް އޭނާ ބުނުމުން ވަރަށް ގިނަ ދިވެހިން އަންނަނީ އެކަމާ ކަންބޮޑުވުން ފާޅުކޮށް ފާޑުކިޔަމުންނެވެ.

އެގޮތުން ދިވެހި ރާއްޖޭގެ ރައްޔިތުން އިންތިހާބު ކުރި ވެރިކަމެއް ހަނގުރާމަމަތީ މަތިންދާ ބޯޓާއި މަނަވަރު ފޮނުވައިގެން ބަދަލުކޮށް ރައީސުލް ޖުމްހޫރިއްޔާ ވެރިކަމުން ދުރުކަރަން އިންޑިޔާގެ ނުފޫޒް ގަދަ ބޮޑަކު ގޮވާލި ގޮވާލުން ދިވެހި ރައްޔިތެއްގެ ހައިސިއްޔަތުން ކުށްވެރިކުރާކަމަށްވެސް ބައެއް ފަަރާތްތަކުން އަންނަނީ ސޯޝަލް މީޑިޔާގައި ބުނަމުންނެވެ.

‏ދުނިޔޭގެ އެންމެ ބޮޑު ޑިމޮކްރަސީ ކަމަށް ދައުވާ ކުރާ ގައުމަށް ދިވެހި ރާއްޖޭގެ ރައްޔިތުން ޑިމޮކްރެޓިކް ހަމަތަކުގެމަތިން އިންތިހާބުކުރި ވެރިކަމެއް ބާރުގެ ބޭނުންކޮށްގެން ވައްޓާލަން ގޮވިދާނެތޯ ސުވާލުވެސް ބައެއް ފަރާތްތަކުން ވަނީ އުފައްދާފައެވެ.

ރާއްޖޭގަ ތިބި އިންޑިޔާ ސިފައިންގެ ބަޔަކު ތިބީ ދިވެހިންނަށް ޑޯނިޔާ އާ ހެލިކޮޕްޓަރު ދުއްވަން ނޭނގޭތީ ނޫން ކަމަށާއި އެހެން ބޭނުމެއްގައި ކަން މިހާރު ޔަގީންވެއްޖެ ކަމަށްވެސް އެ ފަރާތުން ވަނީ ހިއްސާކޮށްފައެވެ.

އެހެންކަމުން ރައްޔިތުންގެ ނިންމުމާ އެއްގޮތަށް އިންޑިޔާ ސިފައިން ރާއްޖެއިން ފައިބަން ޖެހޭނެ ކަމަށް ރާއްޖޭގެ ރައްޔިތުން އަންނަނީ ގޮވާލަމުންނެވެ.

ރައީސް ޑރ.މުއިއްޒު ވަނީ އަންނަ މާޗު މަހުގެ 15 ދުވަހުގެ ކުރިން، ރާއްޖޭގައި ތިބި ހުރިހާ އިންޑިއާ ސިފައިން ރާއްޖެ އިން ބޭލުމަށް އިންޑިއާ އަށް ހުށަހަޅުއްވައިފައެވެ.