ކެނެރީ މަގުގައި ހުންނަ މއ.ރަބީއު ވިލާގައި އަލިފާނުގެ ހާދިސާ ހިނގަން މެދުވެރިވީ ކަމާ ބެހޭ ފަރާތްތަކުގެ އިހުމާލުން ކަން ހާމަވެއްޖެއެވެ.

ބުދަ ދުވަހުގެ ރޭ ގަޑިން 20:30 ހާއިރު އަލިފާނުގެ ހާދިސާއެއް ހިނގައިގެން އުޅޭކަން ސޯޝަލް މީޑިޔާގައި ދައުރުވެފައިވާ ވީޑިޔޯތަކުން އެނގެއެވެ.

މީގެ އެއްދުވަސް ކުރިން، ޕީއެންއެފްގެ ފަރާތުން ކުރިޔަށް އޮތް މަޖިލިސް އިންތިޚާބްގައި މައްޗަންގޯޅި އުތުރަށް ވާދަކުރައްވާ އައްސަދު ޝަރީފް ވަނީ ކަންބޮޑުވުން ފާޅުކުރައްވާ ފޭސްބުކްގައި ވީޑިޔޯ އެއްވެސް ހިއްސާކޮށްފައެވެ.

އެގޮތުން އައްސަދުގެ ފޭސްބުކް ވީޑިޔޯގައި އޭނާ ވިދާޅުވީ މއ.ރަބީއު ވިލާ އަކީ ބާވެ، ވީރާނާވެ ބޮލައް ވެއްޓެމުންދާ ގެޔެއް ކަމަށެވެ.

އެގޭގައި ކުށްކުރާ މީހުންނާ، މަސްތުވާތަކެތި ބޭނުންކުރާ މީހުންގެ ހާއްޔަކަށް ވެފައިވާކަމަށް ވެސް އައްސަދު ވަނީ ވިޑިޔޯގައި ވިދާޅުވެފައެވެ.

އޭގެ އިތުރުން އައްސަދު ވިދާޅުވީ އެ ހިސާބުގެ މީހުން ތިބެނީ ބިރުން ކަަމަށެވެ.

އެތައް ފަހަރެއްގެ މަތިން ކަމާބެހޭ އިދާރާތަކަށް ޝަކުވާ ހުށަހަޅެމުން ވެސް އެއްވެސް ފަރާތަކުން އަޅާލަފައި ނުވާކަމަށްވެސް އައްސަދުގެ ވާހަކަތަކުގައި ވަނީ ފާހަގަވެފައެވެ.

މީގެ އެއްދުވަސް ކުރިން އައްސަދުގެ ވީޑިޔޯގައި ވަނީ ރައީސް މުއިއްޒު ގެ ހައުސިންގް މިނިސްޓަރުކަމުގައި ހުންނެވި އިރުވެސް އަދި މާލޭ ސިޓީ ކައުންސިލްގެ މޭޔާރު ގެ މަގާމްގައި ހުންނެވި އިރުވެސް މިކަމަށް އަޅާލާފައިނުވާ ކަމަށް ވިދާޅުވެފައެވެ.

ބުދަ ދުވަހުގެ ރޭ އަލިފާނުގެ ހާދިސާ ހިނގުމުން ރައީސް މުއިއްޒު އެ ސަރަހައްދަށް ވަޑައިގަތުމުން ގިނަ ބަޔެއްގެ ފާޑުކިޔުން ރައީސް މުއިއްޒަށް ވަނީ އަމާޒުވެފައެވެ.

އަދި މި އަލިފާނުގެ ހާދިސާ ހިނގަން މެދުވެރިވި ސަބަބުވެސް ހާމަކޮށްދިނުމަށް ގިނަ ފަރާތްތަކުން އަންނަނީ ގޮވާލަމުންނެވެ.