އީދު ވިލޭރެއެވެ. މުޅި ގައުމު ތައްޔާރުވަމުން ދިޔައީ އިދު އުފާ ފާޅުކުރުމުގައެވެ.

ރައީސް އަބްދުﷲ ޔާމީންގެ ސަޕޯޓަރުންނަށް އެރޭ ވެފައި އޮތީ ދެ އީދު އެއް ފަހަރާ އަންނާނެ ފަދަ ރެއަކަށެވެ. އެތައް ބައެއްގެ އެތައް ބުރަ މަސައްކަތުން އުފެއްސި ސިޔާސީ ޕާޓީ، އަދި އެތައް ބައެއްގެ ސިޔާސީ އުއްމީދުތަކާ ގުޅިގެފައި އޮތް ޕީޕަލްސް ނެޝަނަލް ފްރޮންޓު (ޕީއެންއެފް) އިފްތިތާހުކުރުން އެރޭ އޮތުމާ އެކުއެވެ.

އެރޭގެ ގަޑިން 8:30 ވުމާ އެކު ރައްޔިތުން މަޑުން މަޑުން އެ ޖަލްސާ ބާއްވަން ހަމަޖެހިފައި އޮތް ޣިޔާޘުއްދީން އިންޓަރނޭޝަނަލް ސްކޫލަށް ޖަމާވާން ފެށިއެވެ.

ގިނައީ ރައީސް ޔާމީން ދެކެ ލޯބިވާ އިސް ރައްވެހިންނެވެ. ބަލި ހާލުގައިވެސް އަދި ރޯދަ މަހުގެ ފަހު ރޯދައަށް ފަހު ވެފައި ތިބި ވަރުބަލި ކަމާއެކު އެ އެންމެ މެމްބަރުންގެ ހިތުގައި ރައީސް ޔާމީންއާ މެދު ލޯތްބާ އިހުތިރާމު ފެނިގެން ދިޔައީ އެކަމުންނެވެ.

އެންމެންގެ މޫނުމަތިންވެސް ކާމިޔާބީގެ ހިނިތުންވުން ދިއްލާލާފައި ހުރީ އީދު މާމަލުގައި ހުވަދުލަމުން އައި ފަދައިިންނެވެ.

ޖަލްސާއަަށް ވަގުތު ކުޑަތަން ވަމުން ދަނިކޮށް ބޭރުން ބާރު އަޑުތަކެއް އިވެން ފެށިއެވެ. އެތެރޭގައި ތިބި މީހުން ދިވެފައި ބޭރަށް ނިކުތެވެ. އަސްތާ ކަމަކު ދާކަށް ނެތެވެ. ފުލުހުން އައިސް މުޅިތަން ހިސޯރުކޮށް ސްކޫލުގެ މެއިން ގޭޓު ބަންދުކުރީއެވެ.

ބޭރުގައި ޖަލްސާއަށް ވަޑައިގެން ތިއްބެވި އެތައް ބަޔަކު ތިއްބެވެ. ނުވަދެވިގެން އޭރު އަޑު ގަދަކުރަމުން ދެއެވެ. ވެގެން އުޅޭ ގޮތެއް ސާފުކޮށްލަން އަހާލާނެ ބަޔަކުވެސް ނެތެވެ. އެހެނީ ޕާޓީގެ އިސް ފަރާތްތައްވެސް އެތައް ދުވަހުގެ ބުރަ މަސައްކަތުގެ ކާމިޔާބީ ފާހަގަކުރަން ބާއްވާ ޖަލްސާއަށް ވަޑައިގެންނެވުމަށް ތައްޔާރުވާން ގެއަށް ވަޑައިގެން ތިއްބެވުމުންނެވެ.

ކޮންެމެ އަކަސް ފަހުން އެނގުނު ގޮތުގައި ފުލުހުން އައީ މަތިން އައި އޯޑަރަކަށެވެ. އެޑިއުކޭޝަން މިނިސްޓްރީއިން ފުލުހުންނަށް ފޮނުވި އީމެއިލްއަކާ ގުޅިގެން މަތިން އައި އޯޑަރެއްކަމަށް އެތަނަށް އައި ފުލުހުންގެ ކޮމާންޑަރަކު ފަހުން މައުލޫމާތު ދީފައިވެއެވެ.

މުޅި ހިސާބުގައި އަޑު ގުގުމާލާފައި ހުރީ ތަނަށް ނުވަދެވިގެން ޝަކުވާގެ އަޑުތަކެވެ. އަސާސީ ހައްގަކަށް އަރައިނުގަނެވޭނެ ކަމަށް ބުނެ އެތައް ބަޔަކު ދިޔައީ އިހުތިޖާޖުވެސް ކުރަމުންނެވެ. މީގެ ތެރެއިން ފެނުނު އެންމެ އަޖާއިބު ކުރުވަނިވި މަންޒަރަކީ މިނިވަން މުއައްސަސާއެއްގެ ގާނޫނީ ވާޖިބަކަށް ހުރަސްވެސް އެޅި އެޅުމެވެ.

ވަގުތު ކުޑަތަންވަމުން ދިޔަ ވަރަކަށް މަސްރަހު ދިޔައީ ހޫނުވެ ބަހުގެ ހަމަލާތައްވެސް ރައްދުކުރަމުންނެވެ. އެއާއެކު ދެން ފެނިގެން ދިޔައީ ހިތް ވަރުގަދަ ފަހުލަވާނުންތަކެއްގެ މަސައްކަތުން ގޭޓު ހުޅުވި މަންޒަރެވެ. އެއާއެކު މީހުން ގަނޑު ދެމި ގަތީ ހިނި ހޮރަކުން ހިނިތަކެއް ނުކުތް ފަދައިންނެވެ، ރައްޔިތުން ތިބި އެހާ ވެސް ރައީސް ޔާމީންގެ ޕާޓީ އިފްތިތާހުކުރަން ބޭނުންވެފައެވެ.

ނަމަވެސް ފުލުހުންނަށް މަތިން އޯޑަރު ފޮނުވާ މުޅި ތަނަށް ޕެޕަރ ސްޕްރޭ ޖަހާލީ ތިޔަހެން ބަލާފައެއް ނޫނެވެ. ރޯދަ ވީއްލި ގޮތަށް ހުސް ގޮހޮރާ ތިބިމީހުންވެސް ތިއްބާ އިސްރައްވެހިންވެސް ގިނަ ތަނަކަށް ޕެޕަރ ސްޕްރޭ ޖެހީ އިންޒާރަކާ ވެސް ނުލައެވެ. މިއީ ފުލުހުންގެ ކޯޑް އޮފް ކޮންޑަކްޓާ ޚިލާފު ކަމެކެވެ.

އެއާ އެކު ފެނިގެން ދިޔައީ މިރުހު ދުމުގެ އަސަރު ފޯރާ އެކި މީހުން ކޮށި އަރާ ނޭވާ ހާސްވެ ވެއްޓެމުން ދިޔަ މަންޒަރެވެ. އީދު ވިލޭރޭ ރައްޔިތުންނަށް ދިން އީދު ހަދިޔާ ފުރިހަމަ އެހެން ނޫންތޯއެވެ.

މިއާއެކު ވެސް ފަހުލަވާނުން ދޫ ދިނުމެއް ނެތި ވަދެ ސްކޫލުގެ ހޯލު ފުރާލީ އަޒުމާ އުއްމީދުގައެވެ. ރައީސް ޔާމީންގެ ފިކުރު ނައްތާނުލެވޭނެކަން ސާބިތުކޮށްދެމުންނެވެ. އިސްރަށްވެހިން ބުނަމުން ދިޔައީ އަނިޔާއަކަށް ބެލުމެއް ނެތް ކަމަށެވެ. އެހެނީ ރައީސް ޔާމީންވެސް ގެންދަވަނީ އެ ރައްޔިތުންގެ ހައްގުގައި އެތައް އަނިޔާއެއް ތަހައްމަލުކުރަމުން ކަމަށްވާތީ ކަމަށެވެ.

ރަޔަޓު ގިޔަރުގައި ފުލުހުން ފޮނުވާ އާރާ ބާރު ދައްކާލީ ވެރިކަމަށް ގެންނަން އެތައް ބުރަ މަސައްކަތެއް ކުރި ބަޔަކަށެވެ. މުގުރާ ޝީލްޑާ މިރުހު ދުމުން އީދު ހަދިޔާ ދިނީ އެބައެއްގެ ވޯޓުން ހޮވާފައި ހުރި ވެރިމީހެކެވެ.

އިޒްރޭލު ސިފައިންގެ މިސާލު ފެނިގެން ދިޔަ އެރޭގެ ހަނދާންތަކަކީ ދިވެހިރާއްޖޭގެ ޑިމޮކްރެސީގެ ހަޔާތުގައި ކަޅު އަކުރުން ލިޔެވޭނެ ހަނދާންތަކެކެވެ.

ސިޔާސީ ޕާޓީ އެއް އުފައްދަން އުޅުމުން ހަޖަމް ނުވި ސަރުކާރެކެވެ. އަނިޔާވެރިކަމާ ދެކޮޅަށް އައި ސަރުކާރަކުން އީދު ހަދިޔާއަކަށް ދިނީ އަނިޔާއެވެ.

100 މީހުންވެސް ހަަމަ ނުވާނެ ކަމަށް ބީރުބޮލް ވަޒީރު ވިދާޅުވި ޖަލްސާއަށް ދިޔަ މީހުން ފެނި އާޝޯޚުވެގެން ސަރުކާރަށް ގޮތް ހުސްވެ ޗެއިން އޮފް ކަސްޓަޑީއާ ޚިލާފަށް ފުލުހުން ނެރެ ދައްކާލީ ސުލްހަވެރި ސިޔާސީ އެއްވުމަކަށް ހުރަސް އެޅި މަންޒަރެވެ. ޗީޗީ އައްޗީޑިއެވެ. ދެން ޑިމޮކްރެސީ އޭ ފާފަޅޮލޭ އެހެންވީމާ ނުކިއްޗަެވެ.