ކުރިއަށް އޮތް ރައްޔިތުންގެ މަޖިލީހުގެ ތިމަރަފުށީ ދާއިރާގެ ޓިކެޓު އިބްރާހިމް ސަނާހުއަށް ދިނުމަށްފަހު އެ ތާއީދު އަނބުރާ ގެނެސް ރައީސް ޑރ. މުހައްމަދު މުއިއްޒު އޭނާ ބާކީކޮށްލައިފިއެވެ.

މިއަދު ހަވީރު ތިމަރަފުށީގައި ސިޔާސީ މަސްރަހު ހޫނެވެގެން ގޮސްފައިވާއިރު އެ މައްސަލަ ބޮޑުވީ ސަނާހު ހުއްޓާ އަމިއްލަ ގޮތުން ވާދަކުރާ ކެންޑިޑޭޓު އަހުމަދު ރިޔާޒުގެ ކެމްޕެއިން ޖަގަހަ ހުޅުވުމަށް ސަރުކާރުގެ އިސްވެރިންތަކެއް ގޮސް ޕީއެންސީ ލޯގޯއާ އެކު އެ ޖަގަހަ ހުޅުވުމަށް މަސައްކަތްކުރުމުންނެވެ.

މަސްރަހު ހޫނުވެ ރަށު ރައްޔިތުން ވަނީ ނުކުމެ ސަރުކާރުގެ ވެރިން ލަދު ގަންނުވާލާފައެވެ. އެގޮތުން އަހުމަދު ރިޔާޒަށްއ ތާއީދު ނެތް ކަމަށާ ސަންޓޯ ނޫން ކެންޑިޑޭޓެއް މި ފަހަރު ތިމަރަފުށީ ދާއިރާގެ ގޮނޑީގައި ނީންނާނެކަމަށް ވެސް ވަނީ ބުނެފައެވެ.

މިއާ އެކު މި ކަމާ ގުޅިގެން ޗެނަލް13 އިން ޕީއެންސީ އިން ހިސޯރުކޮށްފައި އޮތް ޕީޕީއެމް މީޑިޔާ ގްރޫޕުގައި އެކަމާ ގުޅިގެން ސުވާލުކުރުމުން އެއްވެސް ޖަވާބެއް ދީފައިނުވެއެވެ. ނަމަވެސް އަހުމަދު ރިޔާޒުގެ ކެމްޕެއިނަށް ތިމަރަފުއްޓަށް ދިޔަ ސަރުކާރުގެ ވަފްދުގެ އިސް ފަރާތެއް ކަމަށާ މަސްވެރިކަމާ ބެހޭ ވަޒީރު އަހުމަދު ޝިޔާމަށް ގުޅާލުމުން ފޯނު ނުނަންގަވާ ހުންނެވުމަށް ފަހު ފަހުން ގުޅުއްވާ ވިދާޅުވީ އެއީ އެކަން އޮތް ގޮތް ކަމަށާ ރައީސް މުއިއްޒު މިހާރު ސަނާހުއަށް ތާއީދުނުކުރާ ކަމަށެވެ. އަދި ރައީސް މުއިއްޒު ސަނާހުއަށް އިތުބާރު ނުކުރާ ކަމަށްވެސް ވަނީ ވިދާޅުވެފައެވެ. ނަމަވެސް އިތުބާރު ނުކުރާ ސަބަބެއް ވިދާޅުވެ ދެއްވާފައިނުވެއެވެ.

މިކަމާ ގުޅިގެން ގިނަ ބަޔަކު ވަނީ ސަރުކާރުން ކަންކަން ކުރަމުން ދަނި ވަރަށް ޚުދުމުހުތާރުކޮށް ކަމަށް ބުނެ ފާޑުކިޔާފައެވެ. ސަނާހުއަކީ ނިމިދިޔަ ރިޔާސީ އިންތިހާބުގައި އިދާރީ ގޮތުންނާ އަދި އަމަލީ ގޮތުންވެސް ރައީސް މުއިއްޒު ހޮއްވެވުމަށް ގިނަ ބުރަ މަސައްކަތްތަކެއް ކުރި ބޭފުޅެކެވެ. އެގޮތުން އޭނާ ވަނީ ރައީސް މުއިއްޒު އަރިހު ކެމްޕެއިންގެ ހުރިހާ ދަތުރުތަކެއްހެން ބައިވެރިވެވަޑައިގެންފައެވެ. އަދި ކެމްޕެއިންގެ ހުރިހާ ކަމެއް ކުރިއަށް ގެންދިޔައީވެސް ސީދާ ސަނާހުގެ ބެލުމުގެ ދަށުންނެވެ.

މިފަދަ ކަމެއް ފެންމަތިވެފައިވާއިރު ނިމިދިޔަ ޕްރައިމަރީގައި ތައްޔާރީތަކުގައިވެސް ވަކި ވަކި ކެންޑިޑޭޓުން އައްޔަންކޮށް އެހެންކެންޑީޑޭޓުން ބާކީ ކުރަން ފެށި މައްސަލަވެސް ދިމާވެ ބައެއް ކެންޑިޑޭޓުންނަށް ނަން އަނބުރާ ނެގުމަށް ވެސް އަންގާ ހަމަނުޖެހުންތަކެއް އުފެދުނެވެ

ސަރުކާރުން ވަނީ ސަނާހު ނޫނަސް ޓިކެޓު ދީފައި ތިބި އިތުރު ކެންޑީޑޭޓުންވެސް ބާކީކޮށްލާ އެހެން ކެންޑިޑޭޓުންނަށް ތާއީދުކޮށްފައެވެ. މިއީ ޑިމޮކްރެސީގައި ހުތުރު ކަމެއްކަން ގިނަ ބަޔަކު ފާހަގަކުރެއެވެ.