ނިމިދިޔަ 5 އަހަރު ވެގެން ދިޔައީ ޅ. އަތޮޅު ހިންނަވަރުގެ ނަން ވަރަށް އާންމުކޮށް މީޑިއާތަކުގައި ލިޔެވުނު 5 އަހަރަށެވެ. އެރަށަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ނިސްބަތްވެވަޑައިގަންނަވާ ރަށް ކަމަށްވުމުން މިނަމާއި ގިނަ ބަޔަކު ރައްޓެހިވި އެވެ.

ހިންނަވަރަކީ އެމްޑީޕީއަށް ވަރަށް ހާއްސަ ރަށެކެވެ. ރާއްޖޭގެ ނިސްބަތުން ބޮޑު އާބާދީއެއް އޮންނަ މި ރަށަކީ ރައީސް ޞާލިހު 25 އަހަރު ވަންދެން މެމްބަރުކަން ކުރެއްވި ދާއިރާގައި ހިމެނޭ ހަމައެކަނި ރަށެވެ. ގިނަ ސިޔާސީ ޕާޓީތައް އެކުލެވޭ ނިޒާމު ރާއްޖެއަށް ތައާރަފުވީއްސުރެއް ހިންނަވަރުގައި ރަސްކަން ކުރަމުން އަންނަނީ އެމްޑީޕީންނެވެ.

ރައްޔިތުންގެ މަޖިލީހުގެ އިންތިހާބަކީ ކޮންމެ ފަހަރަކުވެސް ހިންނަވަރަށް ވާދަވެރި ސިޔާސީ ބަހުސެއް ގެނުވާ އިންތިހާބެކެވެ. އެމްޑީޕީން މެޖޯރިޓީ ނަގާ މި ރަށުން އެނޫން ޕާޓީއެއްގެ މެމްބަރަކަށް މި އިންތިހާބު ކާމިޔާބު ކުރުމަކީ ގާތްގަނޑަކަށް ނުވާނެ ކަމެކޭ ދެންނެވިދާނެ އެވެ.

2014 ވަނަ އަހަރުގެ މަޖިލިސް އިންތިހާބާއި 2019 ވަނަ އަހަރުގެ މަޖިލިސް އިންތިހާބުގައިވެސް އެމްޑީޕީން ހިންނަވަރު ގޮނޑި ދިފާއު ކުރީ ކުޑަ ތަފާތަކުންނެވެ. ތާރީހަށް ބަލާއިރު އެރަށުގައި ސިޔާސީ އޮއިވަރު ކޮންމެވެސް ވަރަކަށް ބަދަލުވުމުގެ މަލަމަތި މިވަނީ ފެންނަން ފަށައިފަ އެވެ. މިފަހަރުގެ އިންތިހާބަކީ އަނެއްކާވެސް ސިޔާސީ އޮއިވަރުގައި އައިސްފައިވާ ބަދަލު ތަޖުރިބާ ކޮށްލަން ލިބޭނެ ފުރުސަތެކެވެ.

މަޖިލިސް އިންތިހާބުގައި ހިންނަވަރު ދާއިރާއަށް ތިން ކެނޑިޑޭޓަކު މިފަހަރު ވާދަކުރެ އެވެ. އެއީ ކެނޑިޑޭޓު ނަމްބަރު 01 މުހައްމަދު އަބްދުއްރަހުމާން، ޕީއެންސީ ކެނޑިޑޭޓު، ކެނޑިޑޭޓު ނަމްބަރު 2 ޖީހާން މަހަމޫދު، އެމްޑީޕީ ކެނޑިޑޭޓު އަދި ކެނޑިޑޭޓު ނަމްބަރު 3 އަބްދުއް ސަލާމް މޫސާ، އަމިއްލަ ކެނޑިޑޭޓެވެ. ރައީސް ޞާލިހުގެ އާއިލާއަށް ނިސްބަތްވެވަޑައިގަންނަވާ ޖީހާން އަކީ މިހާރުވެސް އެދާއިރާ ތަމްސީލު ކުރައްވަމުން ގެންދަވާ ކެނޑިޑޭޓެވެ.

ރައީސް ޞާލިހުގެ 25 އަހަރުގެ ލެގަސީ ދިފާއު ކުރުމުގެ ފުރުސަތު މިފަހަރުވެސް މިއޮތީ ޖީހާން އަށެވެ. މަޖިލީހުގައި މިދާއިރާ ތަމްސީލު ކުރުމުގައި އެއް ދައުރު ފުރިހަމަކޮށްފައިވާ ޖީހާނަކީ ހިންނަވަރު އެމްޑީޕީ މެމްބަރުންގެ މެދުގައި މަގުބޫލު ޝަހުސިއްޔަތެކެވެ. މިދިޔަ 5 އަހަރުގެ ތެރޭގައި އެެރަށަށް އައިސްފައިވާ ތަރައްގީގައި ޖީހާންގެ ރޯލު ބޮޑުކަން ފާހަގަކޮށް މިއަދިވެސް އޭނާއަށް އެރަށުގައި ބޮޑު ތާއީދެއް އެބަ އޮތެވެ.

އެހެންނަމަވެސް ޖީހާންއަށް ސިޔާސީ ގޮތުން އޮތް ގޮންޖެހުންތައްވެސް ކުޑައެއް ނޫނެވެ. އޭނާގެ ކުރީގެ ފިރިމީހާގެ ޕޮލިސް ކޭސްއެއް ފެންމަތިވެ އެކަމާއި ގުޅިގެން ވަރަށް ގިނަ ވާހަކަތައް އޮތީ ދެކެވިފަ އެވެ. އަދި މި މައްސަލައިގައި މަޖިލީހުގައި ޖީހާން ކަން ކުރި ގޮތާއި އޭރުގެ ސަރުކާރުން ކަންތައް ކުރި ގޮތުން މުޅި ރާއްޖޭގައި އޭނާއަށް އޮތް މަގުބޫލުކަމަށް ކޮންމެވެސް ވަރެއްގެ އަސަރުތަކެއް ކުރި އެވެ. އެހެންނަމަވެސް ފެންނަ މަންޒަރުތަކުން މާ ބޮޑު އުނދަގުލަކާއި ނުލައި ޖީހާންއަށް މި ގޮނޑި ކާމިޔާބު ކުރެވިދާނެކަމަށް ދެންނެވިދާނެ އެވެ.

މިފަހަރުގެ އިންތިހާބުގައި ޕީއެންސީން ވާދަކުރާ މުހައްމަދު އަބްދުއްރަހުމާން، ނުވަތަ އާންމު ނަމުންނަމަ މޯޑު، އަށް އޮތް ތާއީދު ރަށުގައި ކުޑައެއް ނޫނެވެ. ހާއްސަކޮށް ހިންނަވަރުގައި ސިޔާސީ ގޮތުން ނަން ކިޔޭ އެތައް ބައެއްގެ ތާއީދު މިފަހަރު އޮތީ މޯޑުއަށްކަމަށް ދެންނެވިދާނެ އެވެ.  އޭގެ ތެރޭގައި އެމްޑީޕީއަށް ނިސްބަތްވާ ބަޔަކުވެސް އެބަ ހިމެނެ އެވެ.

މޯޑުއަކީ ރަށުގެ އެތައް ބަޔަކާއި ރައްޓެހި އެމީހުންނާއި އެކުވެރި މޫނެކެވެ. ހަމައެކަނި ޕީއެންސީ ނުވަތަ ޕީޕީއެމް މެމްބަރުންގެ ތެރޭގައި އެކަންޏެއް ނޫނެވެ. ޖުމްލަކޮށް މުޅި ރައްޔިތުންގެ މެދުގައި މޯޑުގެ މަގުބޫލުކަން ވަނީ އިތުރުވެފަ އެވެ. ސިޔާސީ ގޮތުން މާ ބޮޑު ބުރަދަނެއް މޯޑުގެ ކިބައިގައި ނެތެއް ކަމަކު ރަށު ތަރައްގީގެ ރޫހު އޭނާގެ ކިބައިގައި އެބަ ހުއްޓެވެ.

އެހެންނަމަވެސް މޯޑުއަށް ގޮންޖެހުން ކުރިމަތިވެފައިވަނީވެސް ޕީއެންސީގެ ތެރެއިންނެވެ. އޭނާއަކީ ސަރުކާރު ކެނޑިޑޭޓަށް ވިނަމަވެސް ޕީއެންސީ ފިކުރުގެ ރައްޔިތުން އެރަށުގައި އޮތީ ބައިބައިވެފަ އެވެ.

ސަލާމް އަކީ ޕީއެންސީ ޓިކެޓު ހޯދުމަށް އެޕާޓީގެ ޕްރައިމަރީގައިވެސް ވާދަކުރި ކެނޑިޑޭޓެކެވެ. އެހެންމަވަވެސް ޕްރައިމަރީގައި ބަލިވެ މޯޑުއަށް ޕީއެންސީ ޓިކެޓު ލިބުމުން ސަލާމް ނިންމީ އަމިއްލަ ގޮތުން އިންތިހާބުގައި ވާދަ ކުރާށެވެ.

ސަލާމްއަކީ ހިންނަވަރުގައި ބަސް ވިކޭ އާއިލާއަކަށް ނިސްބަތްވާ ރައްޔިތެކެވެ. އެއާއިއެކު އޭނާއަކީ ޒަމާނުއްސުރެއް ރަށުގެ ރައްޔިތުންނާއި ގާތް ގުޅުމެއް ބާއްވަމުން އައިސްފައިވާ މީހެކެވެ. މިއާއިއެކު ސަރުކާރުގެ ތެރެއިންނާއި އިދިކޮޅުންވެސް ސަލާމްއަށް ތާއީދު އެބަ އޮތެވެ.

ސަލާމް އަކީ މޯޑު އަދި ޖީހާންއަށްވެސް ކުރިމަތިވެފައިވާ ގޮންޖެހުމެކެވެ. ދެ ކޮޅުންވެސް ވޯޓުތަކެއް ސަލާމްއަށް އައުމުގެ ފުރުސަތު ބޮޑެވެ. ފެންނަ މަންޒަރުތަކުން އޭނާއަށްވެސް ރަށުގެ ނިސްބަތުން ގިނަ ވޯޓުތަކެއް ލިބޭނެއޭ ދެންނެވިދާނެ އެވެ.

މަޖިލިސް އިންތިހާބަށް ގާތްގަނޑަކަށް ހަފްތާއަކަށް ވެފައިވާއިރު ކެމްޕެއިން ފޯރި ހިންނަވަރުގައި އޮތީ ވަރަށް ބޮޑަށް ގަދަވެފަ އެވެ. ތިން ކެނޑިޑޭޓުންވެސް ގެންދަނީ ކެމްޕެއިން ޖަލްސާތައް ބާއްވައި ޑޯޓުޑޯ އިވެންޓުތައްވެސް ކުރިއަށް ގެންދަމުންނެވެ.

ހިންނަވަރު ގޮނޑި ޖީހާންއަށް ދިފާއު ކުރެވިއްޖެނަމަ އަނެއްކާވެސް އެމްޑީޕީއަށް ބޮޑު ކާމިޔާބީއެއް ލިބޭނެ އެވެ. މިގޮނޑި މޯޑު ކާމިޔާބު ކޮށްފިނަމަ ޕީއެންސީއަށް މިއީ ތާރީހީ މޮޅަކަށް ވާނެ އެވެ. އަދި ސަލާމްއަށް ގޮނޑި ކާމިޔާބު ކުރެވިއްޖެނަމަ ދެޕާޓީއަށްވެސް ލިބޭނެ މިއީ ވަރަށް ބޮޑު ނާކާމިޔާބީއަކަށް ވާނެ އެވެ.

ފެންނަ މަންޒަރުތަކުން ވަކި ނަތީޖާއެއް ނިކުމެދާނެކަމަށް ދަންނަވަން އަދި އަވަހެވެ. ހިންނަވަރުގެ ގިނަ ބަޔަކު ގަބޫލު ކުރަނީ މިފަހަރުގެ އިންތިހާބުވެސް އެމްޑީޕީން ފަސޭހަ ކަމާއިއެކު ކާމިޔާބު ކުރާނެ ކަމަށެވެ. އަދި އަނެއްބަޔަކު ބުނަނީ މިއީ ހިންނަވަރުގައި ބަދަލުގެ އޮއިވަރު ފެށޭ އިންތިހާބު ކަމަށެވެ.