ނިމިދިޔަ އާދިއްތަ ދުވަހު ބޭއްވި ރައްޔިތުންގެ މަޖިލީހުގެ އިންތިހާބުގެ ރަސްމީ ނަތީޖާތައް އިއުލާންކުރަން ފަށައިފި އެވެ.

އިލެންޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި ބުނި ގޮތުގައި ރަސްމީ ނަތީޖާ އިއުލާންކުރަން ފެށީ އިންތިހާބާ ގުޅިގެން ބޮޑު މައްސަލައެއް ދިމާވެފައި ނުވުމާއި، އަދި އަލުން ވޯޓު ފޮށްޓެއް ގުނަަން ޖެހޭ ހާލަތެއް މެދުވެރިވެފައި ނުވާތީ އެވެ.

20 ވަނަ ރައްޔިތުންގެ މަޖިލީހުގައި 93 މެމްބަރުން ތިއްބަވާނެ އެވެ. އެމެމްބަރުން އިންތިހާބުކުރަން ބޭއްވި އިންތިހާބުގައި ޖުމްލަ 368 ކެނޑިޑޭޓުން ވާދަކުރި އެވެ.

އިންތިހާބުގައި ވަނީ 602 ވޯޓު ފޮށި ބެހެއްޓި އެވެ. އެއީ ތެރޭގައި މާލެ ސަރަހައްދުގައި 241 ފޮށި އަދި ރިސޯޓުތަކުގައި 34 ވޯޓު ފޮށި ހިމެނެ އެވެ.

އިންތިހާބުގައި އެންމެ ގިނަ ގޮނޑި ކާމިޔާބުކުރީ ވެރިކަންކުރާ ޕީއެންސީއިންނެވެ. އެގޮތުން ޕީއެންސީގެ ޓިކެޓުގައި ވާދަކުރި 66 ކެންޑިޑޭޓުން ގޮނޑި ކާމިޔާބުކުރި އެވެ. އިންތިހާބަށް ފަހު އިތުރު ހަތް މެމްބަރަކު ވަނީ އެޕާޓީއަށް ސޮއިކޮށްފަ އެވެ. އެހެންކަމުން މިހާރު ޕީއެންސީ މެމްބަރުންގެ އަދަދު ވަނީ 75 އަށް އުފުލިފަ އެވެ.