އިއްޔެ ބޭއްވި ރައްޔިތުންގެ މަޖިލީހުގެ އިންތިހާބަކީ މިހާތަނަށް ރާއްޖޭގައި ބޭއްވި މަޖިލިސް އިންތިހާބުތަކުގެ ތެރެއިން ނިސްބަތުން އެންމެ މަދު މީހުން ވޯޓުލާން ނިކުތް އިންތިހާބަށް ވެއްޖެ އެވެ.
20 ވަނަ ރައްޔިތުންގެ މަޖިލިސް އެކުލަވައިލުމަށް އިއްޔެ ބޭއްވި އިންތިހާބުގައި ވޯޓުލުމުގެ ހައްގު ލިބިގެންވާ ޖުމްލަ މީހުންގެ އަދަދަކީ 284،663 އެވެ. އެހެންނަމަވެސް މި އިންތިހާބުގައި ވޯޓުލާން ނިކުތީ 215،860 މީހުންނެވެ. މިއީ ޖުމްލަ ވޯޓު ލުމުގެ ހައްގު ލިބިގެންވާ މީހުންގެ 75 އިންސައްތަ އެވެ.
2019 ވަނަ އަހަރުގެ މަޖިލިސް އިންތިހާބަކީ އެންމެ ގިނަ މީހުން ވޯޓުލާން ނިކުތް މަޖިލިސް އިންތިހާބެވެ. އެގޮތުން އެ އިންތިހާބުގައި 81 އިންސައްތަ މީހުން ވޯޓުލާން ނިކުތެވެ.
މީގެ އުތުރުން 2014 ވަނަ އަހަރުގެ މަޖިލިސް އިންތިހާބުގައި 79 އިންސައްތަ މީހުން ވޯޓުލާން ނިކުތްއިރު 2009 ވަނަ އަހަރުގެ މަޖިލިސް އިންތިހާބުގައި ވޯޓުލާން ނިކުތީ 78 އިންސައްތަ މީހުންނެވެ.
އިއްޔެ ވޯޓުލާން ނުނިކުންނަ މީހުންގެ ތެރެއިން ބޮޑު އިންސައްތައެއް ހިއްސާ ކުރަނީ ޒުވާނުންނެވެ. ދިރާސާތައް ދައްކާ ގޮތުން ޒުވާނުން ތިބީ ސިޔާސީ މީހުންދެކެ ފޫހިވެފަ އެވެ. އަދި ހާއްސަކޮށް މި ފަހުން މަޖިލީހުގެ ދެ ދައުރުގައިވެސް ޖަލްސާތަކުގައި މެމްބަރުންގެ އަހުލާގު ހުރި ގޮތުން ޒުވާނުންނަށް އެކަން ވަނީ ޖޯކަކަށް ވެގެން ގޮސްފަ އެވެ. މަޖިލިސް މެމްބަރުން ދައްކަވާ ގިނަ ވާހަކަތަކާއި އަމަލުކުރައްވާ ގޮތް ވެގެން ގޮސްފައިވަނީ ސޯޝަލް މީޑިއާ މީމްއަކަށެވެ.
