ޔަހޫދީ އިސްރާއިލުން ޣައްޒާގެ ދެކުނުގައިވާ މީހުން ދިރުއުޅޭ ސަރަހައްދުތަކަށް ބޮމުގެ ހަމަލާތަކެއް ދީފިއެވެ.

އިސްރާއީލުގެ އަސްކަރިއްޔާއިން ވަނީ ދެކުނުގެ ސިޓީއެއް ކަމަށްވާ ޚާން ޔޫނިސް އަށް ހުއްޓުމެއްނެތި އާޓިލަރީ ބޮން ގޮއްވާލައި އިރުމަތީ ފަރާތުގައި މީހުން ދިރިއުޅޭ ސަރަހައްދުތަކަށް ވައިގެ ހަމަލާތަކެއް ދީފަ އެވެ.

މީގެ އިތުރުން ލުބުނާނުގެ ދެކުނު ބެއިރޫތަށް އިސްރާއީލުން ދިން ޑްރޯން ހަމަލާއެއްގައި ހަމާސްގެ އިސް އޮފިޝަލް ޞާލިހް އަލް އަރޫރީ ވެސް ވަނީ ޝަހީދުކޮށްލާފަ އެވެ. މިކަމާ ގުޅިގެން އިސްރާއީލުން ޒިންމާ އުފުލާފައެއް ނުވެއެވެ.

ފަލަސްތީނުގެ ރެޑް ކްރެސެންޓުން ހާމަ ކޮށްފައިވާ ގޮތުގައި ޣައްޒާގެ ދެކުނުގެ ޚާން ޔޫނިސްގައި ހުންނަ އެލް އަމާލް ސިޓީ ހޮސްޕިޓަލަށް އިސްރާއީލުން ދިން ހަމަލާއެއްގައި ފަލަސްތީނުގެ ފަސް މީހަކު ޝަހީދުވެފައެވެ.

އޮކްޓޯބަރު މަހުގެ ހަތް ވަނަ ދުވަހުން ފެށިގެން ޔަހޫދީ އިސްރާއީލުން ޣައްޒާއަށް ދެމުން އަންނަ އަނިޔާވެރި ހަމަލާތަކުގައި މިހާތަނަށް 22،313 މީހުން ޝަހީދުވެފައިވާ ކަމަށް ޣައްޒާގެ ސިއްހަތާބެހޭ ވުޒާރާއިން ވަނީ ހާމަކޮށްފަ އެވެ. އަދި މި ހަމަލާތަކުގައި 57،296 މީހުނަށް ވަނީ އެކި ވަރުގެ ޒަހަމްތައް ލިބިފައެވެ. މި ހަމަލާތަކުގައި ފަލަސްތީން އެތައް ރައްޔިތެއްގެ ގެދޮރު ވަނީ ގެއްލިގެން ގޮސްފައެވެ.