ރައްޔިތުންގެ މަޖިލިސް އިންތިހާބުގައި އައްޑޫ ސިޓީގެ ދާއިރާތަކަށް ވާދަކުރައްވާ ޕީއެންސީ ކެނޑިޑޭޓުންނަށް ތާއީދު ހޯއްދެވުމަށް ރައީސް ޑރ. މުހައްމަދު މުއިއްޒު ބައިވެރިވެވަޑައިގެން ބޭއްވި ޖަލްސާގައި 500 އެއްހާ އައްޑޫ މީހުންވެސް ބައިވެރި ނުވާކަން ހާމަވެއްޖެ އެވެ.

އައްޑޫ ސިޓީގައި މިހާތަނަށް ބޭއްވި އެންމެ ބޮޑު ޖަލްސާގެ ގޮތުގައި ރައީސް މުއިއްޒުގެ ސަރުކާރުން އަޑު ފަތުރަމުން ގެންދަނީ މިމަހު 12 ވަނަ ދުވަހުގެ ރޭ ޕީއެންސީން ބޭއްވި ޖަލްސާ އެވެ. އަދި މިއީ އައްޑޫ ސިޓީގެ ބަދަލުވަމުންދާ ސިޔާސީ އޮއިވަރުގެ ބޮޑު މަންޒަރުކަމަށް ސަރުކާރުން ދަނީ ބުނަމުންނެވެ.

ޕީއެންސީގެ ޖަލްސާ ބޭއްވި ހޯލަކީ ގާތްގަނޑަކަށް 450 މީހުންގެ ޖާގައިގެ ހޯލެކެވެ. އެ ޖަލްސާއަށް އައްޑޫ ސިޓީގެ ހުރިހާ އަވަށަކުން މީހުން ގެންދިޔަ އެވެ. މީގެ އިތުރުން ސަރުކާރު އިސް ވެރިންގެ ޓީމެއް ޖަލްސާ ބޭއްވި ތާރީހުގެ ތިން ދުވަސް ކުރިން އެރަށަށް ފޮނުވި އެވެ. މި ޖަލްސާގައި ސަރުކާރު ސިޔާސީ މަގާމުތަކުގައި ތިއްބެވި 50 އެއްހާ ބޭފުޅުންގެ ވަފުދެއް ބައިވެރިވި އެވެ.

މައުލޫމާތު ލިބިފައިވާ ގޮތުގައި އެ ޖަލްސާއައް ހާޒިރުވީ ގާތްގަނޑަކަށް 500 އާއި ގާތްކުރާ އަދަދެއްގެ މީހުންނެވެ. އޭގެ ތެރޭގައި އައްޑޫ ސިޓީގެ ދާއިރާތަކަށް ވޯޓު ނުލެވޭ އެތައް ބަޔަކުވެސް ހިމެނެ އެވެ.

ޕީއެންސީގެ އިސް ބޭފުޅުން އައްޑޫއަށް ވަޑައިގެން އެދިލެއްވީ މަޖިލިސް އިންތިހާބަކީ ސިޔާސީ ވޯޓެއް ނޫން ކަމަށެވެ. އެހެންކަމުން މި ވޯޓު ލުމުގެ ކުރިން ސިޓީއާއިމެދު ވިސްނުމަށް ރައީސް މުއިއްޒުވެސް އެދިވަޑައިގެންނެވި އެވެ. މިގޮތަށް އެމަނިކުފާނު އެދިވަޑައިގެންނެވީ ސިޔާސީ ގޮތުން ޕީއެންސީގެ މާ ބޮޑު ބުރަދަނެއް އައްޑޫ ސިޓީގައި ނެތުމުންކަމަށް ބެލެވެ އެވެ.

މަޖިލިސް އިންތިހާބަށް ހަފްތާއަކަށް ވެފައިވާއިރު ސަރުކާާރުން ދަނީ ސަރުކާރު ވެރިންގެ ނުފޫޒު އޮތް ދާއިރާތަކުގައި ރައީސް ބައިވެރިވެވަޑައިގެން ޖަލްސާތައް ބާއްވަމުންނެވެ. އެހެންނަމަވެސް ގިނަ ޖަލްސާތަކުގައި ފެނިގެންދަނީ މަދު ބަޔަކު ހާޒިރުވާ މަންޒަރެވެ. އަދި އެޖަލްސާތަކަށް މީހުން ގެންދަނީ މަޖުބޫރުކޮށްގެން ހާޒިރީ ބަލަހައްޓައިގެން ކަމަށްވެސް ވަނީ މައުލޫމާތު ލިބިފަ އެވެ.