ހޯމް މިނިސްޓަރު އަލީ އިހުސާން އާއި ފުލުހުންގެ އިސް ވެރިންތަކެއް ކްރިމިނަލް ކޯޓުގެ ހުރުމަތް ކެނޑިކަމަށް ނިންމައި އެމައްސަލައިގައި ފިޔަވަޅު އަޅަން ނިންމައިފި އެވެ.

ކްރިމިނަލް ކޯޓުން ބުނީ މިނިސްޓަރު އިހުސާން އާއި ޗީފް ސުޕްރިޓެންޑެންޓް އަހުމަދު ޝާކިރުގެ އިތުރުން ޗީފް އިންސްޕެކްޓަރު އަހުމަދު ވަހީދާއި ސަބް އިންސްޕެކްޓަރު މަމްދޫހު އަސަން އެކޯޓުގެ ހުރުމަތް ކަނޑާފައިވާ ކަމަށެވެ. ކޯޓުން ބުނީ އިހުސާނާއި ފުލުހުންގެ އިސް ވެރިން ފަނޑިޔާރުންގެ ރައްކާތެރިކަން ގެއްލުވައިލުމާއިއެކު ފަނޑިޔާރުންނަށް ނުފޫޒުވެސް ފޯރުވާފައިވާ ކަމަށެވެ.

ކްރިމިނަލް ކޯޓުން މައުލޫމާތު ދޭގޮތުގައި އެމައްސަލަ މިހާރު ވަނީ ގާޒީންގެ ކުރިއްލި މަޖިލީހަށް އެޖެންޑާވެސް ކޮށްފަ އެވެ.

އަންނަ ބުރާސްފަތި ދުވަހުގެ މެންދުރު 1:00 ގައި އެމައްސަލައިގައި ވަކި ގޮތެއް ނިންމާނެކަމަށް ކޯޓުން ވަނީ ބުނެފަ އެވެ.

މިނިސްޓަރާއި ފުލުހުންގެ ވެރިންތަކެއް ކޯޓުގެ ހުރުމަތް ކެނޑީ ކޮން މައްސަލައެއްގައި ކަމެއް ކޯޓުން ހާމައެއް ނުކުރެ އެވެ. އެހެންނަމަވެސް ޗެނަލް 13 އަށް މައުލޫމާތު ލިބޭ ގޮތުގައި ކޯޓުން ބަލަމުން ދަނީ 119 ކިލޯގެ މަސްތުވާތަކެތީގެ މައްސަލައެއް ސާބިތުނުވި މައްސަލައިގައި ފުލުހުން އޭޕްރީލް 4، ގައި ބޭއްވި ނޫސްވެރިންގެ ބައްދަލުވުމެއްގައި ދެއްކި ވާހަކަތަކަކާ ގުޅޭ މައްސަލައެކެވެ.

އެނޫސްވެރިންގެ ބައްދަލުވުމުގައި ފުލުހުން ވަނީ ސީދާ ވަކި ފަނޑިޔާރެއްގެ ނަން ބުނެ އެ ފަނޑިޔާރަށް ވަރަށް ބޮޑަށް ފާޑު ކިޔައިފަ އެވެ. އަދި ކްރިމިނަލް ކޯޓަށްވެސް ބަހުގެ ހަމަލާތަކެއް ފުލުހުން ދީފައި ވެއެވެ.