އީދު ވިލޭރެއަކީ އަބަދުވެސް މުސްލިމުންނަށް ޚާއްސަ ރެއެކެވެ. ނަމަވެސް މިފަހަރުގެ ފިޠުރު އީދު ދިވެހިންގެ ތެރެއިން ބަޔަކަށް ޚާއްސަވީ އެހެން ސަބަބެއްވެސް އޮތެވެ. އެއީ އެރެއަކީ ރާއްޖޭގެ ސިޔާސީ މެދު އުޑުގައި ފިޔަޖަހާލި އެންމެ އަލި ގަދަ ތަރި، ރައީސް އަބްދުﷲ ޔާމީން އަލަށް އުފެއްދެވި ޕާޓީގެ އިފްތިތާހީ ޖަލްސާވެސް އެރޭ އޮތުމުންނެވެ.

އަލަށް އުފައްދާ ރާއްޖޭގެ އެންމެ ސިޔާސީ ޕާޓީއަށް ވާނެކަމަށް އިއުލާންކޮށްފައިވާ ޕީއެންއެފްގެ އިފްތިތާހީ ޖަލްސާއަށް ވަގުތު ކުޑަތަންވަމުން ދިޔަ ވަރަކަށް ޖަލްސާކުރާ މާލަމަށް ވަންނަމުން ދިޔަ މީހުންގެ އަދަދު ގިނަވާން ފެށިއެވެ. ނަމަވެސް މި މަންޒަރަކި ސަރުކާރު ހިންގަން ތިބި މީހުންނަށް ބަލަން ކެތް ކުރެވޭ ވަރު މަންޒަރަކަށްވީހެނެއް ހިޔެއް ނުވެއެވެ.

މިހެން ދަންނަވަން މިޖެހެނީ އެރޭ އެކަން ވިޔަ ނުދޭން ސަރުކާރުން ހޭވި ހަޑީގެ ސަބަބުންނެވެ. ތަނަށް އެސްއޯ ފުލުހުން ރަޔަޓު ގިޔަރުގައި އައިސް އާންމު ރައްޔިތުންނަށް ކުރިމަތިލީ އިޒްރޭލު ސިފައިން ފަލަސްތީނު ރައްޔިތުންނާ ކުރިމަތިލާ އުސޫލުންނެވެ. ހަތިޔާރެއް ނެތް އާންމުންގެ ތެރެއަށް ޕެޕަރ ސްޕްރޭ ޖަހާ ޝީލުޑާ މުގުރިބުރިތަކުން އަނިޔާކުރީ ހަމަ އެއް ލަމައެއް ނުބަލާ މުސްކުޅި އެއް ޒުވާނެއް ތަފާތު ކުރުމެއް ނެތިއެވެ.

އީދު ހަދިޔާގެ ގޮތުގައި އެ ރައްޔިތުންނަށް ދިނީ ދުވަހަކުވެސް ހަނދާނުން ފިލާނެވަރު ހަދިޔާއެއް ނޫންކަން ޔަގީނެވެ. އަދި އެއީ ރާއްޖޭގެ ތާރީޚުގައި ކަޅު އަކުރުން ލިޔެ ޑިމޮކްރެސީގެ ޅަފަތުގައި އޮތް މި ރާއްޖޭގެ ނަން ކިލަނބުވެގެން ދިޔަ ކަމެކެވެ.

މީގައި ދެން އޮތް އެންމެ އަޖާއިބުކުރުވަނިވި ކަމަކީ އެރޭގެ އެ ހާދިސާ ހިނގީ ކީއްވެ ކާކުގެ އޯޑަރަށްކަން އެނގޭ ވެރިއަކު ނެތުމެމެވެ. މިއި އަޖާއިބަކަށްވުރެ ހަގީގަތުގައި ބިރުވެރިކަމެކޭ ބުނެވޭނެއެވެ. އެހެނީ އެ ހާދިސާއާ ގުޅިގެން ރައީސުލްޖުމްހޫރިއްޔާއިން ފެށިގެން ގޮސް ފުލުހުންގެ މުއައްސަސާގެ އިސްވެރިން ދައްކާފައިހުރި ވާހަކަތަކުންނެވެ.

ފުލުހުންގެ ސީޕީ އަލީ ޝުޖާއަށް ވެސް އަދި ފުލުހުންގެ ވަޒީރު އަލީ އިހުސާނަށްވެސް މިއިން ކަމެއް ނޭނގޭކަމަށް ވިދާޅުވާއިރު، އެސްއޯ ފުލުހުން އޮޕަރޭޓުކުރަމުން އަންނަ ގޮތަށް ބަލާނަމަ ނުވަތަ ސްޓޭންޑާޑް އޮޕަރޭޓިން ޕްރޮސީޖަރއަށް ބަލާއިރު މިއީ ވާނެ ގޮތެއް ނޫނެވެ. އެންމެ ފުރަތަމަ އޮޕަރޭޝަނަކަށް އެސްއޯ ތައްޔާރުވާނީ ވެސް އެމީހުންނަށް އެފަދަ ކޮމާންޑެއް އައިސްގެންނެވެ. ނަމަވެސް ކަންވެ ނިމިގެން ދިޔައިރު މިއިން ކަމެއް އެނގޭ ވެރިއަކު އުޑުހިޔާ ދަށުގައި ނެތުމުން ދޭހަވަނީ ދެ ގޮތެކެވެ.

އެއް ގޮތަކީ ފުލުހުންގެ ވެރިންނާ ސަރުކާރުގެ ވެރިން ދޮގު ހަދަނީއެވެ. އަނެއް ގޮތަކީ ފުލުހުންގެ ޗެއިން އޮފް ކޮމާންޑް ވެރިންނަށް ގެއްލިފައި އޮތީއެވެ. ފަހުން މި ދެންނެވި ގޮތަށް ކަން އޮތްކަމަށް ވަނީ ނަމަ މިއީ ނުރައްކަލުގެ ރަނގަބީލެކެވެ. އެހެނީ އޭގެ ސަބަބުން ދެވަނަ 7 ފެބްރުއަރީ އެއް ވުޖޫދުވެދާނެތީއެވެ.