ރައީސް އަބްދުﷲ ޔާމީން ޖަލުގައި ހުންނެވިއިރު އެމަނިކުފާނު މިނިވަން ކުރުމަށް އަނބިކަނބަލުން ފާތިމަތު އިބްރާހިމް ދީދީ އާއި ދަރިކަލުން ޒެއިން އަބްދުﷲ ޔާމީން މުޒާހަރާއަށް ނުކުންނެވި ނަމަ އެ ދެ ބޭފުޅުން ހައްޔަރުކުރަން ޕީޕީއެމް/ޕީއެންސީގެ އޮފީސް ތެރެއިން ފުލުހުންނަށް އެންގިސްކަމަށް ރައީސް ޔާމީން ވިދާޅުވެއްޖެއެވެ.

ރައީސް ޔާމީން މިނިވަންކުރަން ގޮވާލާ އެމަނިކުފާނުގެ ވަފާތެރި އާންމު މެމްބަރުން މަގުމަތީގައި ކުރިއަށް ގެންދިޔަ އިހުތިޖާޖުގައި ރައީސް ޔާމީންގެ އަނބިކަބަލުންނާ ދަރިކަލުން ބައިވެރި ނުވާކަމަށާ އެހެންކަމުން ރައީސް ޔާމީނަށް އެންމެ ވަފާތެރި އަތްބަކީ ވެސް ދަރިއަކީވެސް ޕީޕީއެމް/ޕީއެންސީގައި ތިއްބެވި ލީޑަރުން ކަމަށް ޕިއެންސީގެ ޗެއަރޕާސަން ގެ މަގާމުގައި ހުރި އަދި މި ސަރުކާރުގެ އިސް ވަޒީރު އަބްދުއްރަހީމު ވިދާޅުވެފައިވެއެވެ.

ޕިއެންއެފްއިން އާދިއްތަ ދުވަހުގެ ރޭ ބޭއްްވި ޖަގަހަ ޖަލްސާގައި ރައީސް ޔާމީން ވަނީ އަދުރޭގެ އެ ވާހަކަތަކަށް ރައްދު ދެއްވާ ބަހުގެ ހަމަލާތަކެއް އަމާޒުކުރައްވާފައެވެ.

އެގޮތުން ރައީސް ޔާމީން ވިދާޅުވީ، މުޒާހަރާގެ ކަންކަން ކުރިއަށް ދިޔަ ގޮތް ކުރިންވެސް ވިދާޅުވެދެއްވާފައިވާނެ ކަމަށާ އެހެންކަމުން އެމަނިކުފާނުގެ އާއިލާއިން މަގު މައްޗަށް ނުކުތްނަމަ އެމީހުން ހައްޔަރުކުރަންވެސް އޯޑަރު ދޭނީ ޕީޕީއެމް/ޕީއެންސީ އޮފީސްތެރެއިންކަން ފަހުމުވެފައި އޮންނެވި ކަމަށެވެ.

ރައީސް ޔާމީން ވަނީ ދެ ޕާޓީގެ ލީޑަރުންނަށް އެމަނިކުފާނު މިނިވަން ނުކުރެވުމުން އެކަން އެމަނިކުފާނުގެ އާއިލާގެ ބޮލުގައި އަޅުވަނީ ކީއްވެގެން ކަމާމެދު ސުވާލު އުފައްދަވާފައެވެ. އަދި އެމަނިކުފާނު ވަނީ ހައްޔަރުގައި ހންނެވީ ވަކި މީހެއްގެ ފިރިއަކަށް ވުމުން ނޫންކަމާ ހައްޔަރުގައި ހުންނެވީ ސިޔާސީ ގޮތުން ކުރަމުން އައި މަސައްކަތުގެ ސަބަބުން އެކަން ހުއްޓުވުމުގެ ނިޔަތުގައި ކުރި ހުކުމެއްގެ ސަބަބުންކަމަށް ވިދާޅުވެ އެހެންކަމުން އަނބިކަބަލުން މަގުމައްޗަށް ނުކުންނަވަން ޖެހިވަޑައިނުގަންނަވާނެކަން ހާމަކޮށްދެއްވާފައެވެ.

ރައީސް ޔާމީން މިނިވަން ކުރަން މެޑަމް ފާތުން ނުނިކުންނަވާ ކަމަށް އަދުރޭ ވިދާޅުވެފައިވާއިރު މެޑަމް ފާތުން ވަނީ ޑރ. މުއިއްޒު ވެރިކަމަށް ގެނައުމަށް ނުހަނު ގިނަ މަސައްކަތްކުރައްވާ އަމަލީ ގޮތުން މަގުމައްޗަށް ނުކުމެ ވަޑައިގެން ކެމްޕެއިންގައިވެސް ބައިވެރިވަޑައިގެންފައިކަން ގިނަ ބަޔަކު ދަނީ ފާހަގަކުރަމުންނެވެ. އަދި އެއީ އެކަމަނާ ފިރިކަލުންގެ ހައްގުގައި ނިކުންނެވި ނިކުތުމެއްކަމަށް ވެސް ގިނަބަޔަކު ވަނީ ބުނެފައެވެ.