ސަރުކާރު ވަޒީރުން އެއް މޭޒެއްގެ ދޮށުގައި ކެބިނެޓު ބައްދަލުވުމެއް ނުބާއްވާތާ މިއަދަށް އެއް މަސް ދުވަސް ވެއްޖެ އެވެ.

އެންމެ ފަހުން ވަޒީރުންގެ މަޖިލީހުގެ ބައްދަލުވުމެއް ބޭއްވީ މިދިޔަ މާޗު މަހުގެ 17 ވަނަ ދުވަހު އެވެ. ކެބިނެޓު ބައްދަލުވުމެއް ނުބާއްވާތާ އެއް މަސް ވެގެން ދިޔައިރު މިކަމާއި ގުޅިގެން މައުލޫމާތު ސާފު ކުރުމަށް ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލާއި ސުވާލު ކުރިނަމަވެސް އެއަށް ޖަވާބެއް ނުދެއްވަ އެވެ.

ސަރުކާރު ހިންގުމުގެ މަޝްވަރާތަކަށާއި މުހިންމު ނިންމުންތައް ނިންމުމަށް ކެބިނެޓު ބައްދަލުވުންތައް ބޭއްވުން ވަރަށް މުހިންމެވެ. އެހެންނަމަވެސް މި ދުވަސްވަރު ރައީސް މުއިއްޒު އުޅުއްވަނީ ކެމްޕެއިން ހަރަކާތްތަކުގައި ރަށްރަށަށް ދަތުރު ކުރެއްވުމުގަ އެވެ. ރަސްމީ ދަތުރުފުޅުތަކުގެ ނަމުގައި ދައުލަތުގެ ފައިސާއިން ހަރަދުކޮށްގެން ރައީސް ރަށްރަށަށް ވަޑައިގަންނަވާއިރު، އެރަށްރަށަށް ވަޑައިގެން ރައީސް ގެންދަވަނީ ޕީއެންސީ ކެނޑިޑޭޓުންނަށް މަޖިލިސް އިންތިހާބުގައި ވޯޓު ދޭން އެދިވަޑައިގަންނަވަމުންނެވެ.

ރައީސް މުއިއްޒު ވެރިކަމަށް ވަޑައިގެން ވިދާޅުވީ ސަރުކާރުގެ ކޮންމެ ވަޒީރަކުވެސް 24 ގަޑިއިރު ހޭދަ ކުރައްވާނީ ގައުމު ހިންގުމުގައި ކަމަށެވެ. އަދި ރައީސާއި ވަޒީރުންގެ ޕާފޯމެންސްވެސް ރަނގަޅުތޯ ނުވަތަ ނޫންތޯ ނިންމާނީ ރައްޔިތުންކަމަށް ރައީސް ވަނީ ވިދާޅުވެފަ އެވެ.

ވަޒީރުންގެ ބައްދަލުވުމެއް ނުބާއްވާތާ މަހެއް ވެފައިވާއިރު ރައީސް ނޫސްވެރިންގެ ބައްދަލުވުމެއް ނުބާއްވާތާވެސް މިހާރު ވަނީ ތިން މަސްދުވަސް ވެފަ އެވެ. ވެރިކަމަށް ވަޑައިގެންނެވުމުގެ ކުރިން ރައީސް ވިދާޅުވީ އެމަނިކުފާނު ވެގެންދާނީ ނޫސްވެރިންނާއި އެންމެ ރައްޓެހި ރައީސަށް ކަމަށެވެ. އެހެންނަމަވެސް ރައީސް މުއިއްޒުއަކީ އެމަނިކުފާނު ވިދާޅުވާ ބަހުގެ އިތުބާރު ނެތް ބޭފުޅެއްގެ ގޮތުގައި ގިނަ ބަޔަކު މިހާރު ދަނީ ސިފަކުރަމުންނެވެ.