ރާއްޖޭގެ އެންމެ ބޮޑު ސިޔާސީ ޕާޓީ، އެމްޑީޕީގެ ޗެއާޕާސަންގެ މަގާމުގައި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ހުންނަވަނިކޮށް ދެވަނަ އިންތިހާބުން ބޮޑު ނާކާމިޔާބީއަކާއި ކުރިމަތިލާން ޖެހިއްޖެ އެވެ.

ފައްޔާޒު އެމްޑީޕީގެ ޗެއާޕާސަންކަމުގައި ހުންނަވަނިކޮށް އެންމެ ފުރަތަމަ އެޕާޓީއަށް ކުރިމަތިލާން ޖެހުނީ 2023 ވަނަ އަހަރުގެ ރިޔާސީ އިންތިހާބާ އެވެ. މިއިންތިހާބުން އެމްޑީޕީ ބަލިވީ އޭރު ވެރިކަމުގައި އޮވެ ހުރިހާ ބާރުތަކާއި، ކެމްޕެއިން ކުރުމަށް ގިނަ އަދަދެއްގެ ފައިސާވެސް އޮވެމެ އެވެ.

އިއްޔެ ބޭއްވި ރައްޔިތުންގެ މަޖިލީހުގެ އިންތިހާބުގައިވެސް އެމްޑީޕީއަށް މިވަނީ ބޮޑު ނާކާމިޔާބީއަކާއި ކުރިމަތިލާން ޖެހިފަ އެވެ. 19 ވަނަ ރައްޔިތުންގެ މަޖިލީހުގައި 67 ގޮނޑި އެމްޑީޕީން ތަމްސީލު ކުރިނަމަވެސް 20 ވަނަ ރައްޔިތުންގެ މަޖިލީހުގައި އެޕާޓީއަށް ލިބުނީ އެންމެ 10 ގޮނޑި އެވެ. މިއީ މިހާތަނަށް އެމްޑީޕީއަށް ރައްޔިތުންގެ މަޖިލީހުގައި ލިބުނު އެންމެ ކުޑަ ތަރުހީބެވެ.

ކޮންމެ މަޖިލިސް އިންތިހާބެއްގައިވެސް ސާފު އަގުލަބިއްޔަތު ލިބެނީ ވެރިކަން ކުރާ ޕާޓީއަށެވެ. އެގޮތުން މިފަހަރުވެސް އިންތިހާބުގެ މެޖޯރިޓީ ނަންގަވައި 68 ގޮނޑި ކާމިޔާބު ކުރީ ކޮންގްރެސް ޕާޓީންނެވެ.

އަމިއްލަ ގޮތުން ވާދަކުރެއްވި 11 މެމްބަރަކު ވަނީ ގޮނޑި ކާމިޔާބު ކުރައްވައިފަ އެވެ. މީގެ އިތުރުން އެމްޑީއޭއަށް 2 ގޮނޑި، ޖުމްހޫރީ ޕާޓީއަށާއި އެމްއެންޕީއަށް އެއް ގޮނޑި ވަނީ ލިބިފަ އެވެ.

މިފަހަރުގެ މަޖިލީހުގައި ޑިމޮކްރެޓްސް އަދި އަދާލަތު ޕާޓީގެ އެއްވެސް މެމްބަރަކު ނުތިއްބަވާނެ އެވެ. ކުރީގެ ރައީސް އަބްދުﷲ ޔާމީންގެ ޕީއެންއެފް އުފައްދަން ކުރިމަތިކުރުވި ގޮންޖެހުންތަކާއިއެކު އެޕާޓީގެ ޓިކެޓުގައި އެއްވެސް ގޮނޑިއަކަށް މިފަހަރު ވާދައެއް ނުކުރެވުނެވެ.