ރައްޔިތުންގެ މަޖިލިސް އިންތިހާބުގެ ވަގުތީ ނަތީޖާ އިލެކްޝަން ކޮމިޝަން (އީސީ) އިން އާންމުކޮށްފިއެވެ. 

އީސީއިން އާންމުކުރި ނަތީޖާއިން ދައްކާ ގޮތުން މެޖޯރިޓީ ގޮނޑި ކާމިޔާބުކުރި ސަރުކާރު ކޯލިޝަނުގެ އިސް ޕާޓީ ޕީއެންސީއަށް 66 ގޮނޑިއެއް ކާމިޔާބު ކުރި އެވެ. އަދި އިދިކޮޅު އެމްޑީޕީއަށް 12 ގޮނޑިއެއް ކާމިޔާބުކުރެވުނެވެ. އޭގެ އިތުރުން އެމްއެންޕީއަށް ގޮނޑިއެއް، ޖުމްހޫރީ ޕާޓީއަށް ގޮނޑިއެއް އަދި އެމްޑީއޭއަށް ދެ ގޮނޑި ކާމިޔާބު ކުރެވުނެވެ. 

މި އިންތިހާބުގައި އަމިއްލަ ގޮތުން ވާދަކުރި 11 މެންބަރަކަށް ވެސް ގޮނޑި ކާމިޔާބުވި އެވެ. 

މާލެ ހިމެނޭހެން ބޮޑެތި ގިނަ ދާއިރާތަކެއްގެ ގޮނޑި ކާމިޔާބުކުރީ ކޮންގްރެސް ޕާޓީއިންނެވެ. އިދިކޮޅު އެމްޑީޕީއިން މާލޭގެ ތިން ދާއިރާއެއް، އައްޑޫއިން ދެ ދާއިރާއެއް ކާމިޔާބުކުރި އެވެ. ކުޅުދުއްފުށި ސިޓީ އާއި ފުވައްމުލަކު ސިޓީގެ ހުރިހާ ގޮނޑިއެއްް ކާމިޔާބުކުރީ ޕީއެންސީއިންނެވެ.