މިދިޔަ ރަމަޟާން މަހު ޢުމްރާގެ އަޅުކަން އަދާކުރުމަށް މަޝްއަރު ޓުއާސްގެ ފަރާތުން ޢުމްރާއަށް ދިޔަ ފަރާތްތަކުގެ ތެރެއިން ސަޢުދީގައި ތާށިވި ހުރިހާ ޢުމްރާވެރިން އެ ގުރޫޕަގް ޚަރަދުގައި އަނބުރާ ރާއްޖެ ގެނެސްފިއެވެ.

މި ގުރޫޕުގެ ޙަވާލުގައި ދިޔަ 50 ވަރަކަށް ޢުމްރާވެރިން މައްކާގައި ތާށިވީ، ޢުމްރާގެ އަޅުކަމަށް ދިއުމަށް ނެގި ޓިކެޓުގެ ޗެކް ބައުންސް ވުމާއި ގުޅިގެންނެވެ. މި މައްސަލަ ދިމާވެފައިވަނީ ކަނޑައަޅާފައިވާ މުއްދަތުގައި ފައިސާ ދައްކާފައި ނުވުމުންނެވެ.

އެ ގުރޫޕް އިން ހާމަކޮށްފައިވާ ގޮތުގައި މިދިޔަ ހަފްތާގެ ބުރާސްފަތި، ހުކުރު އަދި ހޮނިހިރު ދުވަހުގައި ޢުމްރާއަށް ގޮސް ތާށިވެފައިވާ ހުރިހާ ފަރާތްތައް އެނބުރި ގެނެސް ނިމިފައިވާ ކަމަށެވެ.

ފްލައިޓް ޗާޓަރު ކުރުމާއި ޓިކެޓަށްވާ ފައިސާއަށް ދޫކުރާ ޗެކް ބައުންސްވެގެން މީގެ ކުރިން ވެސް މަޝްއަރު ޓުއާސްއިން ވަނީ އިހުމާލުވެފައެވެ. އިސްލާމިކް މިނިސްޓަރީން ވެސް ވަނީ މިކަން ބަލައި، އެކަަމަށް ސަމާލުވުމަށް އެދިފައެވެ.

ރާއްޖެއިން އުމްރާއަށް މީހުން ގެންދިޔުމާ ބެހޭ އުސޫލުގެ ދަށުން ހުއްދަނެތި ޢުމްރާއަށް މީހުން ގެންދިޔުމަކީ މަނާކަމެއް ކަމަށް މިނިސްޓްރީން ބުނެފައިވެއެވެ.

ޙައްޖާއި ޢުމްރާއަށް މީހުން ގެންދާ ބައެއް ގުރޫޕުތަކުން އަމަލު ކުރާ ނުރަނގަޅު އުސޫލުތަކުގެ ސަބަބުން އެތައް ބަޔަކަށް މީގެ ކުރިން ލަނޑު ލިބިފައި އެބަހުއްޓެވެ.

އިސްލާމީ ކަންތައްތަކާބެހޭ ވުޒާރާގެ ވެބްސައިޓުގައި ދިވެހިރާއްޖެއިން އުމްރާއަށް މީހުން ގެންދިއުމުގެ ހުއްދަ ދެވިފައިވާ ކުންފުނިތަކުގެ ލިސްޓުވަނީ އާންމުކޮށްފައެވެ. ޢުމްރާއަށް މީހުން ގެންދިއުމުގެ ހުއްދަ ޖުމްލަ 50 ކުންފުންޏަކަށް ދީފައިވާއިރު، ހަތަރު ކުންފުންޏެއްގެ ހުއްދަ މިދިޔަ މަހަށް އޮތީ ހަމަވެފައެވެ.