ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި ފުވައްމުލަކު ދެކުނަށް ވާދަކުރެއްވި ނަޒުރާ ނަސީމުގެ ބޭބެ، ކުރީގެ ނާއިބު ރައީސް ފައިޞަލް ނަސީމް އޭނާއާ ދެކޮޅަށް އެންޓިކެމްޕެއިން ކުރެއްވިކަމަށް ފުވައްމުލަކު ދެކުނު އެމްޑީޕީ ގޮފިން ބުނެފިއެވެ.

އެގޮފިން ނެރުނު ބަޔާނުގައި ބުނީ ނިމިދިޔަ ރިޔާސީ އިންތިހާބުގައި ފުވައްމުލަކު ދެކުނު ދާއިރާ ގައި އެމްޑީޕީ ބަލިވީ 500 ވޯޓުން ކަމަށާއި އެކަމަކު މިފަހަރުގެ މަޖިލިސް އިންތިހާބުގައި އެ އަދަދު 48 އަށް ކުޑަވި ކަމަށެވެ.

ނަމަވެސް ގޮނޑި ނެގުމަށް ހުރަހަކަށްވީ ފައިސަލް ނަސީމްކަމަށް ތުހުމަތުކޮށް ބަޔާނުގައި ބުނީ، ފުނާޑު އަދި ދޫޑިގަމަށް ނިސްބަތްވާ ރައްޔިތުންނަށް ފައިސަލް ގުޅާ، ނަޒްރާއަށް ވޯޓު ނުދޭން އެދިވަޑައިގެންފައިވާ ކަމަށެވެ.

ނަޒްރާގެ ކެމްޕޭނަށް ފައިސަލް ނުގެނެވޭނެ ކަމަށާއި އެމަނިކުފާނުގެ ތާއީދު އޮތީ ޕީއެންސީގެ ކެންޑިޑޭޓަށް ކަމަށް ވާދަވެރި ކެމްޕޭނު ޓީމުން ބުނަމުން ދިޔަ ކަމަށާއި ޒިންމާދާރު މަގާމެއް ފުރުއްވާފައިވާ ބޭފުޅަކު ނިސްބަތްވާ ޕާޓީގެ ކެންޑިޑޭޓަށް ތާއީދު ނުކޮށް ވާދަވެރި ކެންޑިޑޭޓަށް ތާއީދު ކުރުމަކީ އެ ދާއިރާގެ އެމްޑީޕީ މެންބަރުންނާއި ސަޕޯޓަރުންގެ ހައްގަށް އުނިކަމެއް ލިބުނު ކަމެއް ކަމަށް އެ ބަޔާނުގައި ވަނީ ބުނެފައެވެ.

ނަޒޫގެ ފިރިކަލުން ކުރީގެ ޔޫތު މިނިސްޓަރު އަހުމަދު މަހްލޫފު ވެސް ވަނީ ފައިސަލަށް ބޮޑެތި ތުހުމަތުތަކެއް ކުރައްވާފައެވެ.