ރާއްޖެ ބޮއިކޮޓް ކުރުމަށް ގޮވާލުމަށްފަހުވެސް އިންޑިއާގެ ފަތުރުވެރިން ރާއްޖެ އަންނަ ވަރު މަދުނުވާކަން ހާމަވެއްޖެއެވެ.

މިކަން ހާމަކޮށްފައިވަނީ، އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިންނެވެ.

މަޓާޓޯ އިން މިފަދައިން ހާމަކޮށްފައިވަނީ އިންޑިއާ އިން ރާއްޖެ އަންނަ ފަތުރުވެރިން ބުކިން ކެންސަލްކުރި މިންވަރު ބެލުމަށްޓަކައި ކުރި ސާވޭގެ ނަތީޖާ ހިއްސާކުރަމުންނެވެ.

މިގޮތުން މަޓާޓޯ އިން ބުނީ 2020 ވަނަ އަހަރުން ފެށިގެން ރާއްޖެ އަށް އިންޑިއާ އިން ފަތުރުވެރިން ޒިޔާރަތް ކުރުން އިތުރުވި ކަމަށާއި 2022 ވަނަ އަހަރާއި 203 ވަނަ އަހަރު ނިމުނު އިރު އިންޑިއާ އަކީ ރާއްޖެ އަށް އެންމެ ގިނައިން ފަތުރުވެރިން ޒިޔާރަތް ކުރާ ގައުމު ތަކުގެ ތެރޭގައި ހިމެނޭ ގައުމެއް ކަމަށެވެ.

މަޓާޓޯ ގެ ސާވޭ އިން ދައްކާގޮތުގައި ރާއްޖެއަށް އިންޑިއާއިން 2020 ވަނަ އަހަރު 62،690 ފަތުރުވެރިން ޒިޔާރަތްކުރިއިރު 2021 ވަނަ އަހަރު 292،000 ފަތުރުވެރިން ޒިޔާރަތްކުރި އެވެ. 2022 ވަނަ އަހަރު އިންޑިއާއިން 241،000 ފަތުރުވެރިން އަދި 2023 ވަނަ އަހަރު 209،100 ފަތުރުވެރިން ޒިޔާރަތްކުރި އެވެ.

ބުކިންތައް ކެންސަލް ކޮށްފައިވީ ނަމަވެސް މިއީ އިންޑިއާ ފަތުރުވެރިންގެ ޕީކް ސީޒަން ނޫންކަމަށާއި ފާއިތުވި އަހަރުތަކުގައި ވެސް މިދުވަސްވަރު އިންޑިއާ ފަތުރުވެރިންގެ އަދަދު ދަށްވާކަމަށް މަޓާޓޯ އިން ބުނެފައިވެއެވެ.

އިންޑިއާއިން ރާއްޖޭގެ ފަތުރުވެރިކަން ބޮއިކޮޓް ކުރުމުގެ ކެންޕޭނެއް ފެށުނީ ދާދި ފަހުން އިންޑިއާގެ ބޮޑު ވަޒީރު ނަރެންދްރަ މޯދީ ލަކްޝަދީޕަށް ވަޑައިގެން އެ ތަނުގެ ފަތުރުވެރިކަން ޕްރޮމޯޓް ކުރި ވީޑިއޯ އަކަށް ރާއްޖޭގެ ތިން ޑެޕިއުޓި މިނިސްޓަރަަކު ފާޑު ކިޔުމާއި ގުޅިގެނެވެ.

މި މައްސަލައާއި ގުޅިގެން ދެ ގައުމުގެ އެކްޓިވިސްޓުންގެ މެދުގައި ވަރުގަދަ ބަހުގެ ހަމަލާ ތަކެއް ބަދަލު ކޮށްފައިވާރު އެގައުމުން ވަނީ ރާއްޖޭގެ ފަތުރުވެރިކަން ބޮއިކޮޓް ކުރުމަށް ވެސް ގޮވާލާފައެވެ. އަދި އިންޑިއާގެ ބަޔަކު ވަނީ ދިވެހި ރާއްޖޭގެ ވެބްސައިޓްތަކެއް ހެކްކޮށް ސަރުކާރަށް އިންޒާރު ވެސް ދީފައެވެ.