ރައްޔިތުންގެ މަޖިލީހުގެ އިންތިޚާބު 2024 ގައި ވޯޓު ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީ އާންމުކޮށް އެލިސްޓަށް ޝަކުވާ ހުށަހެޅުމަށް ބަކީ އޮތީ 5 ދުވަސް ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

މާރިޗު 17 ވާ ދުވަހު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބު 2024 ގައި ވޯޓު ދިނުމުގެ ޙައްޤު ލިބިފައިވާ މީހުންގެ ރަޖިސްޓަރީ 2024 ޖަނަވަރީ 10 ވަނަ ދުވަހު ޢާންމުކޮށްފައެވެ.

އިންތިޚާބު 2024ގައި ވޯޓުދިނުމުގެ ހައްގު ލިބިފައިވާ މީހުންގެ ރަޖިސްޓަރީ އާންމުކޮށް، ރަޖިސްޓަރީއަށް ޝަކުވާ ހުށަހެޅުމުގެ ފުރުސަތު ހުޅުވާލައިފައިވާއިރު އެއަށް ޝަކުވާ ހުށްއެޅުމަށް ބާކީ ދެން އޮތީ އެންމެ ފަސް ދުވަހެވެ.

އިލެކްޝަންސް ކޮމިޝަނުން ވަނީ ވޯޓު ލުމުގެ ހައްގު ލިބޭ މީހުންގެ ލިސްޓު، އެ މީހަކު ވޯޓުލާ ދާއިރާ އެނގޭ ގޮތަށް ގެޒެޓުކޮށްފަ އެވެ.

މީގެ އިތުރުން އެސްއެމްއެސް މެދުވެރިކޮށް ވެސް ލިސްޓުގައި ނަން އޮތްތޯ ބެލޭނެ އެވެ.

އީސީން ބުނީ ޝަކުވާ ބަލައިގަންނާނީ މާލެ ފިޔަވައި މީހުން ދިރިއުޅޭ އެހެން ރަށަކުން އެ ރަށެއްގެ ކައުންސިލް އިދާރާއިން ކަމަށެވެ. އަދި އައްޑު އާއި ފުވައްމުލަކު ސިޓީގެ އަވަށު އޮފީސްތަކުންނާއި ކުޅުދުއްފުށި ސިޓީ ކައުންސިލްގެ އިދާރާއިން ޝަކުވާ ބަލައިގަންނާނެ ކަމަށް އީސީން ބުންޏެވެ.

މާލޭގައި ޝަކުވާ ބަލައިގަންނާނީ ދަރުބާރުގޭގައި ހުންނަ އިންތިހާބާ ބެހޭ މަރުކަޒުންނެވެ.

ރައްޔިތުންގެ މަޖިލީހުގެ އިންތިހާބު 17 މާޗުގައި ބާއްވަން ނިންމާފައިވާކަން އީސީން އާންމުކޮށްފައިވާއިރު، އެއީ ރޯދަ މަހުގެ ހަތް ވަނަ ދުވަސްކަން ފާހަގަކޮށްލެވެއެވެ.