ރައީސް ޑރ. މުހައްމަދު މުއިއްޒުގެ ސަރުކާރުން މަޖިލިސް އިންތިހާބާ ދިމާކޮށް ދޫކުރި މީހުންގެ ތެރޭގައި ބޮޑެތި ކުށްވެރިން ހިމެނޭކަން ހާމަވެއްޖެއެވެ.

ހަސަން ކުރުސީގެ ނަމުގައި އެކްސްގައި ކޮށްފައިވާ ޕޯސްޓެއްގައިވަނީ މި ސަރުކާރުން މަޖިލިސް އިންތިހާބާ ދިމާކޮށް ދޫކުރި މީހުންގެ ލިސްޓެއް ހާމަކޮށްފައެވެ.

އެ ލިސްޓުގައި ހިިމެނޭ ބައެއް މީހުންނަކީ މަސްތުވާ ތަކެތި ބޭނުންކުރުމާ އޭގެ ވިޔަފާރިކުރުމުގެ އިތުރުން ބޮޑެތި މާރާމާރީތަކާ ވައްކަމުގެ އެތައް މައްސަލައެއްގައި ހުކުމް އައިސްފައިވާ މީހުންނެވެ.

އެގޮތުން އެ ލިސްޓުގައި ހިމެނޭ އެކަކީ ބޮޑެތި ކުށްތަކުގެ 17 މައްސަލައެއްގައި ހުކުމް އިއްވާފައިވާ މ. ލޭންޑް އޮފް ގާރޑްން މުހައްމަދު އިޚްވާޖު އަލީއެވެ. އޭނާގެ އިތުރުން ވެސް މަސްތުވާ ތަކެއްޗާ ފޭރުމާ ވައްކަމުގެ އެތައް މައްސަލައެއްގައި 25 އަހަރަށް ހުކުމް އިއްވާފައި ތިބި މީހުން ވެސް ހިމެނެއެވެ.

މި ފަދަ ލިސްޓެެއް އާންމުވެފައި މިވަނީ މި ސަރުކާރުގެ ފުލުހުންގެ ތަރުޖަމާނު، އެސިސްޓެންޓު ކޮމިޝަނަރ އޮފް ޕޮލިސް އަހުމަދު ޝިފާން، މިހާރު މާލޭގައި ހިނގަމުންދާ ވައްކަންތައް އިތުރުވަނީ ބޮޑެތި ކުށްވެރިންތަކެއް ނިމިދިޔަ ސަރުކާރުގައި ރިޔާސީ އިންތިހާބާ ދިމާކޮށް ދޫކޮށްލާފައިވާތީ ކަމަށް ވިދާޅުވެފައިވާ ދަނޑިވަޅެއްގައެވެ.

މި ލިސްޓާ ގުޅިގެން މޯލްޑިވްސް ކަރެކްޝަނަލް ސާވިސްގެ މީޑިޔާ އޮފިސަރ ޔުސްރީން ވިދާޅުވީ، އެމްސީއެސްއިން އެއްވެސް ކުށްވެރިއެއްގެ ނަމެއް ހާމަނުކުރާނެ ކަމަށާ އެމްސީއެސްއިން ކުށްވެރިން ދޫކުރާ ހާލަތްތަކަކީ، ހުކުމް ތަންފީޒުކޮށް ނިމުމުންނާ ރައީސުލްޖުމްހޫރިއްޔާ ދެއްވާ މައާފުގެ ތެރެއިންނާ އަދި ޕެރޯލްގެ ތެރެއިން ކަމަށެވެ.

އެހެންކަމުން މި ލިސްޓާ މެދު އެއްޗެއް ދެންނެވެން ނެތް ކަމަށް ޔުސްރީނު ވިދާޅުވިއެވެ.