ހަނގުރާމައިގައި ބައިވެރިވުމަށް ސީރިއާއަށް ގޮސް ހާލުގައި ޖެހިފައި ތިބި 21 ދިވެއްސަކު ރާއްޖެ ގެނެސްފިއެވެ.

މިކަން ހާމަކޮށްފައިވަނީ ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މައުލޫމާތުދެއްވަމުންނެވެ.

އެގޮތުން ހޯމް މިނިސްޓަރު އަލީ އިހުސާން ވިދާޅުވީ، ސީރިޔާ އަދި ތުރުކީއާއި ގުޅޭ ބޯޑަރުގައި ދިވެހި 5 އާއިލާއެއް ހާލުގައި ޖެހިފައިވާކަމަށެވެ. އަދި އެމީހުން ރާއްޖެ އަންނަށް ބޭނުންވާ ކަމުގެ މައުލޫމާތު ދިވެހި ސަރުކާރަށާއި އެ ވުޒާރާއަށް ލިބިފައިވާކަމަށްވެސް ފާހަގަކުރައްވާފައިވެއެވެ.

މައުލޫމާތު ލިބިފައިވާ ގޮތުގައި އެ ޢާއިލާ ތަކުގެ ތެރޭގައި ހިމެނެނީ 5 އަންހެނުންނާއި، 1 ފިރިހެނަކާއި، 18 އަހަރު ނުފުރޭ 15 ކުޑަކުދިންނެވެ. 

މިނިސްޓަރު އިހްސާން އިތުރަށް ވިދާޅުވީ، އެމީހުން ރާއްޖެ އަންނަން ބޭނުންވާ ކަމުގެ މަޢުލޫމާތު ލިބުމާއި އެކު، އެމީހުންނަކީ ދިވެހިންކަން ކަށަވަރު ކުރުމުގެ މަސައްކަތް ދިވެހި ފުލުހުންނާއި، ނެޝަނަލް ރީ އިންޓެގްރޭޝަން ކޮމިޝަނާއި ގުޅިގެން ފެއްޓެވި ކަމަށާއި، އެ މަސައްކަތް ކުރަމުންދިޔަ ދިވެހި ފުލުހުންގެ ޓީމުން އެތައް ފަހަރެއްގެ މަތިން އެ ސަރަހައްދަށް ގޮސް، އެ އާއިލާ ތަކުގެ ހާލު ބަލައި އެސެސްމެންޓްތައް ހަދާފައިވާ ކަމަށެވެ. 

ރާއްޖެ އަނބުރާ ގެނެވުނު އާއިލާތަކުގެ އެންމެންގެ މެޑިކަލް އެސެސްމެންޓް ހެދުމަށްފަހު އެމީހުން މިހާރު ވަނީ ހިންމަފުށީގައި ހުންނަ ނެޝަނަލް ރީ އިންޓެގްރޭޝަން ސެންޓަރަށް ގެންދެވިފައި ކަމަށްވެސް އެ ބައްދަލުވުމުގައި ވަނީ މައުލޫމާތުދެއްވާފައެވެ.

މީގެ ކުރިންވެސް ސީރިއާއިން ރާއްޖެއަށް ގެނެވުނު ޢާއިލާއެއް ނެޝަނަލް ރީ އިންޓެގްރޭޝަން ސެންޓަރަށް ގެންގޮސް، އެމީހުން ރިހެބިލިޓޭޓްކޮށް ކާމިޔާބުކަމާއެކު ރީ އިންޓެގްރޭޓެ ކުރެވި، މިހާރު މުޖުތަމަޢުގައި ދިރިއުޅެމުންދާކަން ފާހަގަކޮށްލެވެއެވެ.