ދިވެހި ފުލުހުންގެ ތަރުޖަމާނުގެ މަގާމުގައި ހުރި އަހުމަދު ޝިފާން މަގާމުން ވަކިކޮށްފިކަމަށް މައުލޫމާތުލިބިއްޖެއެވެ.

ފުލުހުންގެ ތަރުޖަމާނުގެ މަގާމުގެ އިތުރުން އޮފީސް އޮފް ދި ކޮމިޝަނާގެ ވެރިޔާގެ މަގާމުގައިވެސް ހުރި ޝިފާން ވަނީ އެ ދެމަގާމުންވެސް ވަކިކޮށް އެހެން މަގާމަކަށް ބަދަލުކޮށްފައިކަން "ތޭރަ އޮންލައިން"އަށް ވަނީ މައުލޫމާތު ލިބިފައެވެ.

މައުލޫމާތު ލިބިފައިވާ ގޮތުގައި ޝިފާން އެ މަގާމުތަކުން ވަކިކުރިކަން އޭނާއަށް ވަނީ އަންގާފައެވެ. އަދި މަގާމުން ވަކިކުރި ސަބަބަކީ ކޮމިޝަނަރ އޮފް ޕޮލިސް އަލީ ޝުޖާއުގެ ހިތްހަމަ ނުޖެހުންތަކެއް ޝިފާންއާ މެދު އޮވެގެން ކަމަށް މުއުތަބަރުކޮށް "ތޭރަ އޮންލައިން"އަށް މައުލޫމާތު ލިބިފައިވެއެވެ.

އެގޮތުން ސީޕީ ޝުޖާއު ވަނީ އެމަނިކުފާނުގެ ދަށުން ތިއްބަވާ ޑީސީއިންގެ އެއްބާރުލުން ނުލިބޭ ކަމަށް ބުނެ ދާޚިލީ ވަޒީރު އަލީ އިހުސާން އަރިހު ޝަކުވާ ދަންނަވާފައި ކަމަށްވެސް ވަަރަށް މުއުތަބަރުކޮށް ވަނީ މައުލޫމާތު ލިބިފައެވެ.

މީގެ ކުރިންވެސް ފުލުހުންގެ ހިދުމަތުގެ ތަރުޖަމާނުގެ މަގާމު އަދާކުރެއްވި ޝިފާނު ފުލުހުންގެ ތަރުޖަމާނުގެ މަގާމަށް އަލުން އައްޔަންކުރީ މި އަހަރުގެ ފެބްރުއަރީ މަހު އެވެ. އޭނާ މަގާމުން ވަކިކުރި ސަބަބެއް މިހާތަނަށް ފުލުހުންގެ ހިދުމަތުން ހާމަނުކުރެއެވެ.