މީގެ ފަހުން ރައީސް އޮފީހަށް ނޫސްވެރިންގެ ބައްދަލުވުންތަކަށް ފޯނު ނުވެއްދޭނެ ކަމަށް އެންގި މައްސަލައިގައި ރައީސް އޮފީހުން ހަގީގަތް އޮޅޭ ގޮތަށް ޚަބަރު ފަތުރާފައިވާތީ، މޯލްޑިވްސް މީޑިޔާ ކައުންސިލުން އެކަން ކުށްވެރިކޮށްފިއެވެ.

ނޫސްވެރިންނާ ރައީސް އޮފީހުން ބައްދަލުނުކުރާތާ ތިން މަސް ފާއިތުވީ ފަހުން އާދިއްތަ ދުވަހު ވަނީ ނޫސްވެރިންގެ ބައްދަލުވުމެއް ބާއްވާފައެވެ. އެ ބައްދަލުވުމަށް ދިޔަ ނޫސްވެރިންނަށް ރައީސް އޮފީހުގެ މުވައްޒަފަކު ވަނީ ފޯނު އެ އޮފީހަށް ނުވެއްދޭނެކަމަށް އަންގާފައެވެ.

އެއީ ކޮން އުސޫލަކުން ހިނގާ ކަމެއްތޯ ނޫސްވެރިން ސުވާލުކުރުމުން ޖަވާބުގައި އެ މުވައްޒަފު ވިދާޅުވެފައިވަނީ މިހާރު އޮންނަ ޕްރޮޓޮކޯލު ކަމަށާ އެ ޕްރޮޓޮކޯލުއަށް އަމަލުކުރަމުންދާތާ ދެ މަސް ވަރު ވެދާނެ ކަމަށެވެ. ނަމަވެސް ނޫސްވެރިން އެކަން ކުރިން އަންގާފައި ނުވާކަން ހާމަކޮށް ފޯނާ ނުލާ ވަނުމަށް ދެކޮޅު ހަދާފައެވެ.

ނޫސްވެރިން ރައީސް އޮފީސް ތެރޭގައި ކުރި އެ އިހުތިޖާޖާ އެކު އެދުވަހަށް އެކަނި ފޯނު ވެއްދޭނެ ހުއްދަ ދިނެވެ. އަދި އޭގެ ފަހުން ބާއްވާ އެއްވެސް ބައްދަލުވުމަކަށް ފޯނު ނުވެެއްދޭނެކަން އަންގާފައިވެއެވެ. އެކަމާ ގުޅިގެން ނޫސްވެރިންގެ ބައްދަލުވުން ނުފެށި 20 ވަރަކަށް މިނިޓުވެސް ހޭދަވިއެވެ.

މިކަމާ ގުޅިގެން ނޫސްވެރިޔާ މުޒައްޔިން ނާޒިމް ނޫސްވެރިންގެ ބައްދަލުވުގައި ވަކާލާތުކުރުމުން ރައީސް އޮފީހުގެ ޗީފު ސްޕޯކްސްޕާސަން ހީނާ ވަލީދު ވިދާޅުވީ، އެކަން އެހެން ތަކުރާރު ވިޔަ ނުދިނުމަށް އެ އޮފީހުން މަސައްކަތްކުރާނެ ކަމަށެވެ.

މިކަމާ ގުޅިގެން ނެރުނު ބަޔާނެއްގައި ބުނެފައިވަނީ، އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގެ ކުރިން ހިނގާދިޔަ ކަންކަން ގަސްތުގައި އޮޅުވާލާ އާއްމުންނަށް ހަގީގަތް އޮޅޭ ގޮތަށް ރައީސުލްޖުމްހޫރިއްޔާގެ އޮފީހުން ޝާއިއުކޮށްފައިވާ ކޮމެންޓްތަކާ ހެދި އެމްޖޭއޭ އަދި ނޫސްވެރިން އިންތިހާއަށް ނުތަނަވަސްވެފައިވާ ކަމަށެވެ.

އެމްޖޭއޭއިން ބުނެފައިވަނީ އިއްޔެގެ ނޫސްވެރިންގެ ބައްދަލުވުމަށް ފޯނު ނުވެއްދޭނެ ކަން، ނޫސްވެރިންނަށް އެންގީ ބައްދަލުވުމަށް ނޫސްވެރިން ދިޔަ ފަހުން ކަމަށެވެ. މިކަން ދުރާލާ އަންގާފައި ނުތުމާއެކު، މަސައްކަތަށް ހުރަސްއެޅޭކަމަށް ބުނެ ނޫސްވެރިން އިހުތިޖާޖުކުރުމުން، އިއްޔެގެ ބައްދަލުވުމަށް ފޯނު ވެއްދޭނެ އިންތިޒާމު ރައީސް އޮފީހުން ހަމަޖައްސައިދިންކަން އެމްޖޭއޭއިން ފާހަގަކުރިއެވެ.

"ނަމަވެސް ނޫސްވެރިންނަށް އަންގާފައި ވަނީ، ދެން މީގެ ފަހުން، ކުރިއަަށް ހުރި ނޫސްވެރިންގެ ބައްދަލުވުންތަކަށް ފޯނު ނުވެއްދޭނެ ކަމަށެވެ." އެމްޖޭއޭއިން ބުނެފައިވެއެވެ.

އެމްޖޭއޭއިން ވަނީ ގިނަ އަދަދެއްގެ ނޫސްވެރިން ތިބި ތަނެއްގައި ހިނގާދިޔަ ކަމެއްގެ ހަގީގަތް ގަސްތުގައި އޮޅުވާލާ، ނޫސްތަކުން ރިޕޯޓްކުރި ވާހަކަތައް އޮޅުވާލަން ރައީސް އޮފީހުން ކުރި މަސައްކަތް ކުށްވެރިކޮށްފައެވެ.

މިނިސްޓަރުން ފިޔަވައި ރައީސް އޮފީހުގެ ބައްދަލުވުންތަކަށް ދާ އެއްވެސް ބަޔަކު މޮބައިލް ފޯނު ވެއްދުން މަނާކޮށްފައިވާފައިވަނީ މީގެ ދެމަހެއް ކުރިންނެވެ. ރައީސް އޮފީހުގެ ނޫސްވެރިންގެ ބައްދަލުވުންތަކަށްދާ ނޫސްވެރިންނަށް ފޯނު ނުވެއްދޭނެކަން ރައީސް އޮފީހުން އެންގުމުން ނޫސްވެރިން އަދި އާންމުންގެ ފާޑުކިޔުން އެކަމަށް އަމާޒުވިއެވެ. އެހެންނަމަވެސް ފަހުން ރައީސް އޮފީހުން ވަނީ އެވާހަކަތައް ދޮގުކޮށްފައެވެ.

ހީނާގެ ބަސްފުޅުންވެސް ފޯނު ވެއްދުން ނޫސްވެރިންނަށް މަނާކުރިކަން ހާމަވާއިރު، އެކަން އޮޅޭ ގޮތަށް ފަހުން ހީނާ ވަނީ ޓްވީޓުކުރައްވާފައެވެ. އަދި ނޫސްވެރިންނަށް ފޯނު ނުވެއްދޭނެކަމަށް އެންގި ކަމަށް ބުނެ ފަތުރަނީ ދޮގު ކަމަށް ހީނާ ވިދާޅުވިއެވެ. ނަމަވެސް ހީނާ ނޫސްވެރިންގެ ބައްދަލުވުމުގައި ދެއްކެވި ވާހަކަތައް ދަނީ މީސް މީޑިޔާގެ އެކި މަންސަތަކުގައި ދައުރުކުރަމުންނެވެ. އަދި ދޮގާ މަކަރާ އޮޅުވާލުން ނޫން ކަމެއް މި ސަރުކާރުން ނުކުރާ ކަމަށް ބުނެ ގިނަ ބަޔަކު ގެންދަނީ ނުރުހުން ފާޅުވެސް ކުރަމުންނެވެ.