ގައުމުތަކުގެ ސަފީރުކަމަށް އައްޔަން ކުރަން ފޮނުވި ނަންތަކުގެ ތެރެއިން ބައެއް ބޭފުޅުންނަށް ރުހުން ދިނުމަށް މިއަދު މަޖިލީހުން ފާސްކޮށްފިއެވެ.

މިއަދުގެ ޖަލްސާގައި ރުހުން ދިން ސަފީރުންނަކީ؛

• ޔޫއޭއީގައި ހުންނަވާ ރާއްޖޭގެ ސަފީރު ކަމަށް މުހައްމަދު ހުސެން ޝަރީފް

• އދ.ގައި ހުންނަވާ ރާއްޖޭގެ ދާއިމީ މަންދޫބު ކަމަށް ޑރ. އަލީ ނަސީރު މުހައްމަދު

• އިނގިރޭސިވިލާތުގައި ހުންނަވާ ރާއްޖޭގެ ސަފީރު ކަމަށް ޑރ. އިރުތިޝާމް އާދަމް

• ސްރީ ލަންކާގައި ހުންނަވާ ރާއްޖޭގެ ސަފީރު ކަމަށް މަސްއޫދު އިމާދު

• މެލޭޝިއާގައި ހުންނަވާ ރާއްޖޭގެ ސަފީރު ކަމަށް ޑރ. މަރިޔަމް ޝަބީނާ އަހުމަދު

• ޔޫރަޕިއަން ޔޫނިއަން އަދި ބެލްޖިއަމްގައި ހުންނަވާ ރާއްޖޭގެ ސަފީރު ކަމަށް ގީލާ އަލީ

• ޖެނީވާގައި ހުންނަވާ އދ.ގެ އޮފީސްތަކަށް ރާއްޖޭން ކަނޑައަޅާފައި ހުންނަވާ ދާއިމީ މަންދޫބަކަށް ޑރ. ސަލްމާ ރަޝީދު

• ސިންގަޕޫރުގައި ހުންނަވާ ރާއްޖޭގެ ސަފީރުކަމަށް މުހައްމަދު ލުވޭޒު އެވެ.

ސަފީރު ކަމަށް އައްޔަން ކުރެއްވި ބޭފުޅުންގެ ތެރެއިން މުހައްމަދު ހުސައިން ޝަރީފަކީ މީގެ ކުރިން ލަންކާގައި ހުންނަވާ ރާއްޖޭގެ ސަފީރު ކަމާއި ރައީސް އޮފީހުގެ ވަޒީރުކަމާއި ތަރުޖަމާނުގެ އިތުރުން ޔޫތު މިނިސްޓަރުކަން ވެސް ކުރައްވާފައިވާ ބޭފުޅެކެވެ. މިވަގުތު އޭނާ ހުންނެވީ ފޮރިން މިނިސްޓްރީގައި އެމްބެސެޑާ އެޓް ލާޖުގެ މަގާމުގައެވެ.

ބެލްޖިއަމާއި ޔޫރަޕިއަން ޔޫނިއަންއަށް އައްޔަންކުރަން ފޮނުއްވި ގީލާއަކީ ޕީޕީއެމްގެ ފުރަތަމަ ސަރުކާރުގައި ހެލްތު މިނިސްޓްރީގެ ޕާމަނަންޓު ސެކެޓްރީކަން ކުރެއްވި ކަނބަލެކެވެ. އަދި، މިހާރު ސަރުކާރު ހިންގާ މައި ޕާޓީ ޕީއެންސީގެ ސެކެޓްރީ ޖެނެރަލްކަން ވެސް އޭނާ އަދާކުރެއްވިއެވެ.

ސްރީލަންކާއަށް އައްޔަނުކުރަން ފޮނުވި މަސްއޫދަކީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ސަރުކާރުގައި ރައީސް އޮފީހުގައި މީޑިއާ ސެކްރެޓަރީކަން ކުރެއްވި ބޭފުޅެކެވެ.