ސަރުކާރު ޒިންމާދާރުކުރުވުމަށް ޓަކައި ޚަބަރުތައް ގެނެސްދޭ ޓީވީ ސްޓޭޝަންސްތަކަށް އިންޒާރުދިނުމުގެ ސިލްސިލާއެއް އާންމުވެފައިވަނިކޮށް، މީޑިޔާ ރިންގް ޕްރައިވެޓު ލިމިޓެޑްގެ ދަށުން ހިންގާ ޗެނަލް13 އާ އަދި އެ ޓީވީ ސްޓޭޝަންއާ ގުޅުން ހުރި އެހެން ހުރިހާ މީޑިއަމްތައްވެސް ނައްތާލާނެކަމުގެ އިންޒާރުދީފިއެވެ.

މީގެ ކުރިންވެސް ހުޅުޖަހައި ރޯކޮށްލި ރާއްޖެ ޓީވީގެ ނޫސްވެރިޔަކަށް އޭނާ މަސައްކަތް ކުރާ ޓީވީ ސްޓޭޝަންގެ ދުވަސް ދުއްވައިލާނެ ކަމަށާއި މިފަހަރު ހޭ އަރުވައިލާނެ ކަމަށެވެ. އަދި މިއީ "އަހަރުމެންގެ ވެރިކަން" ކަމަށްވެސް އޭގައި ބުނެފައިވެއެވެ.

މި ޚަބަރު ތޭރަ އޮންލައިންގައި ޝާއިއުކުރުމުން އެ ޚަބަރަށް ކޮމެންޓްކުރި ޝަހީމް އަބްދުﷲގެ ނަމުގައި އިން އެފްބީ އެކައުންޓަކުން ބުނެފައިވާ ގޮތުގައި ސަރުކާރާ ދެކޮޅަށް ޚަބަރު ގެންނަނީ ފިތުނަ އުފައްދާ ޓީވީ ސްޓޭޝަންތަކަކުން ކަމަށާ އެފަދަ ތަންތަން ނައްތާލަން ޖެހޭ ކަމަށެވެ. އެގޮތުން އެ ފަދަ ޚަބަރު ގެެނެސްދޭ ޓީވީތައް އަންދާ އަޅިއަށް ހަދާ ނައްތާލަން ޖެހޭ ކަމަށް އެ އެފްބީ އެކައުންޓުން ކޮމެންޓުކޮށްފައިވެއެވެ.

ރައީސް މައުމޫން އަބްދުލްގައްޔޫމުގެ ޒައާމަތުގައި ނޫސްތައް މެދުވެރިކޮށް ރައްޔިތުންގެ ފިކުރާ ކުޅުނުހެން މިހާރު ނުކުޅެވޭނެކަމަށް ބުނެ އެމީހާ ވަނީ އެންމެ ފުރަތަމަ ނައްތާލާނީ ޗެނަލް13ކަމަށް ލިޔެ އިންޒާރު ދީފައެވެ.

މިކަން މިހާރު ކަމާ ގުޅުން އިދާރާތަކަށް އެ ޓީވީ ސްޓޭޝަންގެ ފަރާތުން ދަނީ ހުށަހަޅަމުންނެވެ. މި ނޫނަސް ޗެނަލް 13 އަށް އެކި ފަހަރު މަތިން ސަރުކާރަށް ތާއީދު ކުރާ ފަރާތްތަކުން އިންޒާރު ދީފައިވެއެވެ. އަދި އެ ފަދަ ފަރާތްތަކުގެ އިންޒާރުތަކަށް ހިތްވަރުދީ ސަރުކާރުގެ ސިޔާސީ މަގާމުތަކުގައި ތިއްބަވާ ބައެއް ފަރާތްތަކުން ކޮމެންޓުކޮށްފައިވެސް ވެއެވެ.