ޓީވީ ސްޓޭޝަންތަކަށް އިންޒާރުދޭ މައްސަލަ ބެލުމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ގޮވާލައިފިއެވެ.
އެމްޖޭއޭއިން ބަޔާން ނެރެ މައްސަލަ ބަލަން ގޮވާލާފައިވަނީ ރާއްޖެ ޓީވީ އަދި ޗެނަލް 13 އަށް ސަރުކާރަށް ތާއިދު ކުރާ ފަރާތްތަކުން ދިން އިންޒާރާ ގުޅިގެންނެވެ.
އެމްޖޭއޭއިން ބުނީ މި ފިނޑި އަމަލު އެމްޖޭއޭގެ ފަރާތުން ހަރުކަށި އިބާރާތުން ކުށްވެރި ކުރާކަމަށެވެ.
މިފަދަ އިންޒާރުތަކެއް ނޫސްވެރިންނާއި މީޑިއާތަކަށް އައުމަކީ ނޫސްވެރިން މިނިވަންކަމާއެކު މަސައްކަތް ކުރުމަށް ހުރަސް އެޅި، މުޅި ނޫސްވެރިކަމަށްވެސް ބޮޑު ގޮންޖެހުމެއް ކުރިމަތިވާނެ ކަމެއް ކަމަށް އެ ޖަމިއްޔާއިން ގަބޫލު ކުރާކަމަށް ވެސް ވަނީ އެ ބަޔާނުގައި ބުނެފައެވެ.
އެ ދެ ޓީވީ ސްޓޭޝަނަށް އިންޒާރުވެސް ދީފައިވަނީ ޝޯޝަލް މީޑިއާގައި ކާކުން ނެނގޭ ގޮތަށް ހަރަކާތްތެރިވަމުން އަންނަ ވަގު އެކައުންޓަކުން ކަމަށް ވިޔަސް މިއީ، ސަަމާސާއެއް ކަމަށް ނުބަލައި، ސީރިއަަސް މައްސަލައެއްގެ ގޮތުގައި ނަގައި،މި ކަން ކުރި ބަޔަކު ހޯދައި، މި މައްސަލަ ވީހާވެސް އަވަހަކަށް ތަހުގީގު ކުރުމަށް އެމްޖޭއޭ އިން ވަނީ ގޮވާލާފައެވެ.
މިފަދަ އިންޒާރުތައް ނުބަލައި ދޫކޮށްލުމަކީ، އެމްޖޭއޭއިން ދެކޭ ގޮތުގައި ނޫސްވެރިންނާއި މީޑީއާތަކަށް އިންޒާރު ދިނުން އާންމު ކަމަކަށްވެ، އެކަން ކުރާ މީހުންނަށް ދެވޭ ހިތްވަރެއްގެ ގޮތުގައި ކަމަށް ވެސް އެ ބަޔާނުގައި ވަނީ ބުނެފައެވެ.
ބަޔާނުގައި އިތުރަށް ބުނެފައިވަނީ އެފަދަ ކަންކަން ދޫކޮށްލުމުން ނަތީޖާއެއްގެ ގޮތުން ނޫސްވެރިން މަސައްކަތް ކުރަން އޮތް މާހައުލަކީ ނުރައްކާތެރި، ބިރުވެރިކަމަކަށް ހުށަހެޅިފައިވާ މާހައުލަކަށް ބަދަލުވެގެން ދާކަމަށެވެ.
