ގްރޭޓާ މާލެ ސަރަހައްދުގައި ޗިކުންގުންޏާ ހަލުވިކަމާއި އެކު ފެތުރެމުންދާތީ މަދިރި ކޮންޓްރޯލް ކުރުމުގެ ގޮތުން މި ސަރަޙައްދު ފޮގް ކުރުމަށް އެޗް.ޑީ.ސީ އާއި މާލެ ސިޓީ ކައުންސިލް އިން ނިންމައިފިއެވެ.
މަދިރީގެ ޒަރީއާއިން ޖެހޭ ޗިކުނުގުންޏާ އަކީ ގަދަ ހުމާއެކު، ހުޅުތަކުގައި ރިއްސާ ނުރައްކާތެރި ބައްޔެކެވެ. މާލެ ސިޓީ ކައުންސިލާއި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިސްނަގައިގެން މާލެ އާއި ހުޅުމާލެ ފޮގް ކުރުމުގެ މަސައްކަތް ފަށާފައިވާއިރު، މާލެސިޓީ ކައުންސިލުން މީގެ 5 ވަރަކަށް ދުވަސްކުރިން ވަނީ ހަރަކާތެއްވެސް ކުރިއަށް ގެންގޮސްފައެވެ.
ރާއްޖޭގެ އެކ ހިސާބުތަކަށް ބޯކޮށް ވެހޭ ދުވަސްވަރަކަށް ވުމާއިއެކު، މަދިރި އާލާވާފަދަ ތަންތަން ނައްތާލުމަށް އިސްކަމެއްދީ، އާންމު ސާފުތާހިރުކަމަށް ސަމާލުކަން ދިނުމަށް މާލެ ސިޓީ ކައުންސިލުން ވަނީ އިލްތިމާސްކުރައްވާފައެވެ.
މިދިޔަ މަހު އެކަނިވެސް މަދިރީގެ ޒަރީއާއިން ޖެހޭ ބައްޔެއް ކަމަށްވާ ޗިކުން ގުންޏާގެ 129 ކޭސް ރިޕޯޓުކޮށްފައިވާކަމަށާއި މިއަހަރު ޖުމްލަ 134 ކޭސް އެ އިދާރާއަށް ހުށަހަޅާފައިވާކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މައުލޫމާތުދެއެވެ. މީގެ ތެރެއިން 4 ކޭސް އެއް ފިޔަވާ ދެން ހުރި ހުރިހާ ކޭސް އެއް މާލެ ސަރަހައްދުން ފެނިފައިވާއިރު، މި ބަލި ޖެހުމުން ހުން އައުމާއިއެކު ބޮލުގައި ރިއްސައި ހުޅުތަކުގައި ރިއްސުން ފަދަ އަލާމާތްތައް ފެންނާނެއެވެ.
އެހެންކަމުން، މި ބަލިން ރައްކާތެރިވުމަށްޓަކައި މަދިރި ގިނަވާ ވަގުތުތަކުގައި ކުޑަދޮރުތައް ލެއްޕުމާއި ބޭރަށް ނިކުންނައިރު މީހާގެ ހަންގަޑު ފޮރުވޭފަދަ ހެދުން އެޅުމަކީ މުހިންމު ކަމެކެވެ.
