މި ސަރުކާރުން މިނިވަން ނޫސްވެރިކަމަށް ހުރަސްއަޅަނީ ގަސްތުގައި ކަމަށް (މޯލްޑިވިއަން ޑިމޮކްރެޓިކް ޕާޓީ) އެމްޑީޕީން ބުނެފިއެވެ.

ބައިނަލްއަގްވާމީ ނޫސްވެރިކަމުގެ ދުވަހުގެ ތަހުނިޔާ ހުރިހާ ނޫސްވެރިންނަށް އަރުވަމުން އެމްޑީޕީން ވަނީ ނޫސްބަޔާނެއް ނެރެފައެވެ.

އެގޮތުން އެ ބަޔާނުގައި އެމްޑީޕީން ބުނީ ޑިމޮކްރަސީގެ ހަތަރު ވަނަ ބާރުގެ ގޮތުގައި ނޫސްވެރިން އަދާކުރަމުންދަނީ ރާއްޖޭގެ ކުރިމަގަށް ބޭނުންތެރި އަދި މުހިންމު މަސައްކަތްތަކެއްކަމަށެވެ.

މިއަހަރުގެ ނޫސްވެރިންގެ ދުވަސް ބައްދަލު ކުރި އިރު ސަރުކާރަށް ފާޑުކިޔާ ދެ ނޫހެއް ބްލޮކް ކޮށް ހިޔާލު ފާޅުކުރުމަށް ހުރަސްއެޅި ކަމަށް އެމްޑީޕީން ވަނީ އެ ބަޔާނުގައި ފާހަގަކޮށްފައެވެ.

އިތުރަށް އެ ބަޔާނުގައި ވަނީީ ނޫސްވެރިންނަށް ރައީސް އޮފީހަށް ފޯނު ނުވެއްދޭ ގޮތަށް އެ އޮފީހުގެ އުސޫލުތައް ކުއްލި ގޮތަކަށް ބަދަލުކުރުމަކީ ވެސް ބަލައިގަނެވޭނެ ކަމެއް ނޫންކަމަށް ފާހަގަކޮށްފައެވެ.

އަދި ފާއިތުވި ދުވަސްތަކުގެ ތެރޭގައި ނޫސްތަކަށާއި ޓީވީ ސްޓޭޝަންތަކަށާއި އަދި ވަކިވަކި ނޫސްވެރިންނަށް އިންޒާރު ދިނުމާއި ބިރު ދެއްކުން އިތުރުވެފައިވާކަމީ ކަންބޮޑުވާކަމެއް ކަމަށާއި މި އިންޒާރުތަކަކީ ސީރިއަސް މައްސަލަތަކެއްގެ ގޮތުގައި ބަލައި ފިޔަވަޅު އެޅެން ޖެހޭނެ މައްސަލަތަކެއް ކަމަށް ވެސް އެމްޑީޕީން ވަނީ ފާހަގަކޮށްފައެވެ.