އައްޑޫ ސިޓީގައި ފެނުގެ ހިދުމަތް ކެނޑޭތާ އެތައް ދުވަހެއް ވީއިރުވެސް އެމައްސަލަ ހައްލުވެފައި ނުވާތީ ސަރުކާރަށް ފާޑުކިޔުން އަމާޒުވެއްޖެ އެވެ.

މާލޭ ސިޓީ ފިޔަވައި ރާއްޖޭގައި އެންމެ ބޮޑު އާބާދީއެއް އޮންނަ އައްޑޫ ސިޓީގައި ދެމުން ގެންދާ ފެނުގެ ހިދުމަތް ދޭތެރެ ދޭތެރެއިން ކެނޑެން ފެށީ ކުރީގެ ރައީސް އިބްރާހިމް މުހައްމަދު ޞާލިހުުގެ ސަރުކާރުގަ އެވެ. މިމައްސަލައަށް ދާއިމީ ހައްލެއް ނުލިބި ގިނަ އަހަރުތަކެއް ވެފައިވާއިރު ރައީސް ޑރ. މުހައްމަދު މުއިއްޒުގެ ސަރުކާރުން މަޖިލިސް އިންތިހާބުގެ ކެމްޕެއިން ތެރޭގައި ފެނުގެ މައްސަލަ ވަގުތީގޮތުން ހައްލު ކުރި އެވެ.

މިކަމަށް އިޝާރާތް ކުރައްވައި ވާހަކަ ދައްކަވަމުން މޭޔަރު އަލީ ނިޒާރު "އެކްސް" ގައި ކުރެއްވި ޕޯސްޓެއްގައި ވިދާޅުވީ އައްޑޫގެ ގުޅިފައިވާ ރަށްތަކަށް ފެން ސަޕްލައި ކޮށްދިނުމުގައި ދިމާވެފައިވާ މައްސަލައަށް ހައްލު ނުލިބޭތީ ރައްޔިތުންގެ ޝަކުވާ އިތުރުވަމުން ދާކަމަށެވެ. އޭނާ ވިދާޅުވީ މިމައްސަލައަށް ދާއިމީ ހައްލެއް ނުލިބި މިހާ ގިނަ ދުވަސް ވެގެންދިއުމަކީ ނުކުޅެދުމެއް ކަމަށެވެ. އަދި ހައްލު އަވަސްކޮށްދިނުމަށް ފެނަކަ މެނޭޖުމެންޓަށް ދަންނަވާ ކަމަށްވެސް މޭޔަރު ވިދާޅުވި އެވެ.

އައްޑޫ ސިޓީއަށް ފެނުގެ ހިދުމަތް ދެނީ ފެނަކަ ކޯޕަރޭޝަނުންނެވެ. އެކުންފުނިން ބުނީ އައްޑޫގެ ފެން ޕްލާންޓަށް ދޭތެރެ ދޭތެރެއިން މައްސަލަތަކެއް ދިމާވަމުން ދާކަމަށެވެ. އެހެންކަމުން މިމައްސަލަ ހައްލު ކުރަން އެމްޑަބްލިއުއެސްސީއާއެކު ސަރުކާރުން މަސައްކަތް ކުރަމުން ދާކަމަށް ފެނަކައިން ބުންޏެވެ.

ސަރުކާރުން ވަނީ އައްޑޫ ސިޓީގެ ފެނުގެ މައްސަލަ ހައްލު ކުރަން އެމްޑަބްލިއުއެސްސީއާއެކު އެއްބަސްވުމެއްގައި ސޮއިވެސް ކޮށްފަ އެވެ. އެއް އަހަރު ދުވަހުން ނިންމާ ގޮތަށް ސޮއިކުރި މިމަޝްރޫއަށް 282 މިލިއަން ރުފިޔާ ހަރަދުވާނެކަމަށް ސަރުކާރުން ބުނެ އެވެ.